Sonia Gandhi Belonging Book | సోనియా గాంధీ ‘బిలాంగింగ్’ పుస్తకంలో కన్నీటి నిజాలు: ఆ త్యాగాలు ప్రతి ఒక్కరూ తెలుసుకోవాలి

• బిలాంగింగ్ మార్కెట్లోకి విడుదల
• కన్నీరు పెట్టించే కుటుంబ విషాదాలు
• 2004లో ప్రధాని పదవి త్యాగం
• యువత తప్పక చదవాలి
• పీసీసీ చీఫ్ మహేష్ కుమార్ గౌడ్

Sonia Gandhi Belonging Book | త్రినేత్ర న్యూస్ : ఏఐసీసీ మాజీ అధ్యక్షురాలు సోనియా గాంధీ రచించిన సరికొత్త పుస్తకం ‘బిలాంగింగ్: ఏ జర్నీ ఆఫ్ లవ్’ (Belonging: A Journey of Love) ఇటీవల మార్కెట్లోకి విడుదలైంది. ఢిల్లీ పర్యటనలో ఈ పుస్తకాన్ని కొనుగోలు చేసి కొన్ని అధ్యాయాలు చదివినట్లు టీపీసీసీ అధ్యక్షుడు, ఎమ్మెల్సీ మహేష్ కుమార్ గౌడ్ వెల్లడించారు. సోనియా గాంధీ తన జీవితంలో ఎదుర్కొన్న అత్యంత బాధాకరమైన వాస్తవాలు, ఎమోషనల్ సంఘటనలను ఇందులో నిష్కపటంగా పంచుకున్నారని ఆయన తెలిపారు.

విదేశీ కోడలిగా వచ్చి.. భారతీయతను అక్కున చేర్చుకుని

ఇటలీలో జన్మించినప్పటికీ, 1968లో రాజీవ్ గాంధీని వివాహం చేసుకున్న తర్వాత సోనియా గాంధీ భారతీయ సంస్కృతి, కట్టుబాట్లు, సంప్రదాయాలను అణువణువునా ఆకళింపు చేసుకున్నారని మహేష్ గౌడ్ గుర్తుచేశారు. ఒక ఆదర్శ భార్యగా, రాహుల్ గాంధీ, ప్రియాంక గాంధీలకు తల్లిగా, సుదీర్ఘ కాలం కాంగ్రెస్ పార్టీ అధ్యక్షురాలిగా దేశ ప్రజల గుండెల్లో చెరగని స్థానాన్ని సంపాదించుకున్నారని ప్రశంసించారు.

ఇందిర, రాజీవ్ మరణాలు.. గుండెకోత మిగిల్చిన క్షణాలు

ఈ పుస్తకంలో సోనియా గాంధీ తన జీవితంలో అనుభవించిన తీవ్ర మానసిక క్షోభను హృద్యంగా అక్షరబద్ధం చేశారని పీసీసీ చీఫ్ పేర్కొన్నారు. తన ఒడిలోనే అత్తగారు ఇందిరా గాంధీ ప్రాణాలు విడవటం, విమాన ప్రమాదంలో మరిది సంజయ్ గాంధీ దుర్మరణం చెందడం, ఆ తర్వాత బాంబు దాడిలో భర్త రాజీవ్ గాంధీ శరీర భాగాలు ఛిద్రమైపోవడం ఆమెను ఎంతటి వేదనకు గురిచేశాయో పుస్తకం చదివితే అర్థమవుతుందన్నారు. ఎన్ని విపత్తులు ఎదురైనా దేశం కోసం నిలబడిన త్యాగశీలి ఆమె అని కొనియాడారు.

2004లో ప్రధాని పదవి తృణప్రాయంగా త్యాగం

భారత రాజకీయాలను సమగ్రంగా ఆకళింపు చేసుకున్న సోనియా గాంధీ, 2004లో కాంగ్రెస్ అధికారంలోకి వచ్చినప్పుడు తిరుగులేని నాయకురాలిగా ఉన్నారని గుర్తుచేశారు. స్వయంగా దేశ ప్రధాని అయ్యే పూర్తి అవకాశం ఉన్నప్పటికీ, పదవిపై ఏమాత్రం వ్యామోహం చూపకుండా ఆ పదవిని తృణప్రాయంగా వదులుకున్నారని తెలిపారు. ఆర్థికవేత్త, విద్యావంతుడైన డాక్టర్ మన్మోహన్ సింగ్‌ను ప్రధానమంత్రి పీఠంపై కూర్చోబెట్టి త్యాగధనుల కుటుంబ కోడలిగా తన ఔన్నత్యాన్ని చాటుకున్నారని చెప్పారు.

చౌకబారు విమర్శలు వద్దు.. పుస్తకాన్ని ప్రతి ఒక్కరూ చదవాలి

కొందరు స్వార్థపరులు ప్రతి అంశాన్నీ పొలిటికల్ కోణంలోనే చూస్తూ చౌకబారు విమర్శలు చేస్తున్నారని, అలాంటి మాటలను ఎవరూ పట్టించుకోవాల్సిన అవసరం లేదని మహేష్ గౌడ్ స్పష్టం చేశారు. సోనియా గాంధీ భారత సమకాలీన చరిత్రలో ఒక తిరుగులేని అధ్యాయమని, ఆమె ప్రస్థానం యావత్ దేశానికి స్ఫూర్తిదాయకమని చెప్పారు. దేశ ప్రజలు, ముఖ్యంగా తెలంగాణ రాష్ట్ర యువత, మహిళలు ఈ పుస్తకాన్ని చదివి వాస్తవాలను, త్యాగాలను తెలుసుకోవాలని ఆయన కోరారు.