Polytechnic Courses | పాలిటెక్నిక్‌లో 10 కొత్త కోర్సులు..! మొత్తం సీట్లు 18,300..!!

Polytechnic Courses | త్రినేత్ర‌.న్యూస్ : మీరు ప‌దో త‌ర‌గ‌తి త‌ర్వాత పాలిటెక్నిక్ కోర్సులు చేయాల‌నుకుంటున్నారా..? ఇంజినీరింగ్, టెక్నాల‌జీ కోర్సులు చేసి ఉన్న‌తంగా స్థిర‌ప‌డాల‌నుకుంటున్నారా..? అయితే తెలంగాణ స్టేట్ టెక్నిక‌ల్ ఎడ్యుకేష‌న్ ట్రైనింగ్ బోర్డు మీలాంటి విద్యార్థుల కోసం సువ‌ర్ణావ‌కాశాన్ని క‌ల్పిస్తుంది. 2026-27 విద్యాసంవ‌త్స‌రానికి గానూ 10 కొత్త కోర్సుల‌ను ప్ర‌వేశ‌పెడుతుంది. ఈ కొత్త కోర్సుల వివ‌రాలు తెలుసుకుందాం.

కొత్త కోర్సులు ఇవే..

సెమీ కండ‌క్ట‌ర్ టెక్నాల‌జీ, అడ్వాన్స్‌డ్ మ్యానుఫ్యాక్చ‌రింగ్ టెక్నాల‌జీ, ఎయిర్‌క్రాఫ్ట్ మెయింటెనెన్స్ ఇంజినీరింగ్, ఆటోమేష‌న్ అండ్ రోబోటిక్స్‌, బయో టెక్నాల‌జీ, సివిల్ ఇంజినీరింగ్‌(బిల్డింగ్ స‌ర్వీసెస్ ఇంజినీరింగ్), సివిల్ ఇంఇజీనిరింగ్‌, రియ‌ల్ ఎస్టేల్ అండ్ వాల్యూయేష‌న్, క‌న్‌స్ట్ర‌క్ష‌న్ టెక్నాల‌జీ అండ్ మేనేజ్‌మెంట్‌, ఇంటిరీయ‌ర్ డిజైన్ అండ్ ల్యాండ్‌స్కేప్ డిజైన్ వంటి కోర్సుల‌ను కొత్త‌గా ప్ర‌వేశ‌పెడుతున్న‌ట్లు అధికారులు తెలిపారు.

ప్ర‌భుత్వ పాలిటెక్నిక్ కాలేజీల్లో ప్ర‌వేశాల సంఖ్య‌ను పెంచ‌డంతో పాటు.. విద్యార్థుల‌కు నైపుణ్యంతో కూడిన కోర్సుల‌ను అందించాల‌నే ఉద్దేశంతోనే కొత్త కోర్సుల‌ను ప్ర‌వేశ‌పెట్టేందుకు బోర్డు నిర్ణ‌యించింద‌ని బోర్డు సెక్ర‌ట‌రీ ఏ పుల్ల‌య్య‌ పేర్కొన్నారు. గ్రామీణ విద్యార్థులు ఈ సువ‌ర్ణ అవ‌కాశాన్ని వినియోగించుకోవాల‌ని సూచించారు.

కొత్త కోర్సుల్లో సీట్లు 2280

కొత్త కోర్సుల్లో మొత్తం సీట్లు 2,280 ఉండ‌గా.. ఇందులో సెమీకండ‌క్ట‌ర్ టెక్నాల‌జీలో 720, ఆటోమేష‌న్ అండ్ రోబోటిక్స్‌లో 480, అడ్వాన్స్‌డ్ మ్యానుఫ్యాక్చ‌రింగ్ టెక్నాల‌జీలో 240 సీట్లు అందుబాటులో ఉన్నాయ‌న్నారు. ఈ కోర్సుల‌ను మొద‌ట‌గా ప్ర‌భుత్వ పాలిటెక్నిక్ కాలేజీల్లోనే ప్ర‌వేశ‌పెడుతామ‌న్నారు.

మొత్తం సీట్లు - 18,300

2025-26 విద్యాసంవ‌త్స‌రంలో ప్ర‌భుత్వ పాలిటెక్నిక్ కాలేజీల్లో మొత్తం 13,050 సీట్లు అందుబాటులో ఉన్నాయి. ఈ విద్యాసంవ‌త్స‌రానికి కొత్త‌గా ప్ర‌వేశ‌పెట్ట‌బోయే కోర్సుల్లో 2,880 సీట్లు అందుబాటులోకి రానున్నాయి. ఇక మొత్తంగా 2026-27 విద్యాసంవ‌త్స‌రానికి మొత్తం 18,300 సీట్లు అందుబాటులోకి రానున్నాయని సెక్ర‌ట‌రీ పేర్కొన్నారు.