Telangana Auto Drivers Welfare Board | ఆటో డ్రైవర్లకు తెలంగాణ సర్కార్ శుభవార్త: త్వరలో వెల్ఫేర్ బోర్డు.. ఒక్కో ఆటోకు రూ.1.5 లక్షల సబ్సిడీ

Telangana Auto Drivers Welfare Board | త్రినేత్ర న్యూస్ : తెలంగాణలోని లక్షలాది మంది ఆటో డ్రైవర్లు, రవాణా రంగ కార్మికుల సంక్షేమానికి కాంగ్రెస్ ప్రభుత్వం సరికొత్త భరోసా ఇచ్చింది. ఆటో కార్మికులు, వారి కుటుంబాల అభ్యున్నతి కోసం త్వరలోనే ప్రత్యేక 'సంక్షేమ బోర్డు' (Welfare Board) ఏర్పాటు చేయనున్నట్లు రాష్ట్ర ఉప ముఖ్యమంత్రి మల్లు భట్టి విక్రమార్క ప్రకటించారు. శనివారం రాత్రి ప్రజాభవన్‌లో హైదరాబాద్ నగర ఆటో డ్రైవర్ల సంఘాల జేఏసీ (JAC) నాయకులకు ఆయన ఆత్మీయ విందు ఏర్పాటు చేశారు. రవాణా శాఖ మంత్రి పొన్నం ప్రభాకర్, ఎస్సీ అభివృద్ధి శాఖ మంత్రి అడ్లూరి లక్ష్మణ్‌లతో కలిసి భట్టి విక్రమార్క స్వయంగా ఆటో సంఘాల నేతలతో కలిసి భోజనం చేసి, వారి సాధకబాధకాలను అడిగి తెలుసుకున్నారు.

ప్రజా ప్రభుత్వంలో ప్రజల అవసరాలు, కార్మికుల సంక్షేమమే ప్రథమ ప్రాధాన్యమని, ఆటో డ్రైవర్లు ఎదుర్కొంటున్న సమస్యలన్నింటినీ మానవీయ కోణంలో పరిష్కరిస్తామని స్పష్టం చేశారు.

కిలోమీటర్‌కు రూ.14కు పెంపు.. జీవో జారీ

ఆటో డ్రైవర్ల విజ్ఞప్తులను లోతుగా పరిశీలించి రవాణా శాఖ మంత్రి పొన్నం ప్రభాకర్ కేబినెట్ దృష్టికి తెచ్చారని డిప్యూటీ సీఎం తెలిపారు. ప్రస్తుత ధరల పెరుగుదలను పరిగణనలోకి తీసుకుని, ఇప్పటివరకు కిలోమీటర్‌కు రూ.11గా ఉన్న ఆటో ఛార్జీని రూ.14కు పెంచుతూ ప్రభుత్వం జీవో జారీ చేసిందని వెల్లడించారు.

2014లో ఉమ్మడి రాష్ట్రంలో కాంగ్రెస్ అధికారంలో ఉన్నప్పుడే చివరగా రూ.11 రేటు నిర్ణయించారని, ఆ తర్వాత తెలంగాణలో పదేళ్లపాటు అధికారంలో ఉన్న గత పాలకులు ఆటో కార్మికుల సమస్యలను పూర్తిగా గాలికొదిలేశారని విమర్శించారు. ఎన్ని ధర్నాలు, ఆందోళనలు చేసినా నాడు పట్టించుకున్న నాథుడే లేడన్నారు.

ఇదీ చదవండి : Chintala Ramachandra Reddy | “ఉపఎన్నిక కోసం కొట్లాడింది మేము.. గెలిచేదీ మేమే”: విజయా రెడ్డి పిటిషన్‌లో ఇంప్లీడ్ అవుతాం

20 లక్షల కుటుంబాలకు సంక్షేమ రక్ష

రాష్ట్రవ్యాప్తంగా రవాణా రంగంపై ఆధారపడి దాదాపు 20 లక్షల కార్మిక కుటుంబాలు జీవిస్తున్నాయని భట్టి విక్రమార్క గుర్తుచేశారు. "వారి సంక్షేమం కోసం కేబినెట్‌లో ఇప్పటికే లోతుగా చర్చించాం. రాబోయే అసెంబ్లీ సమావేశాల్లో చట్టబద్ధమైన ప్రక్రియ పూర్తి చేసి, తగిన బడ్జెట్ కేటాయింపులతో అతి త్వరలోనే సంక్షేమ బోర్డును అందుబాటులోకి తెస్తాం" అని ఆయన హామీ ఇచ్చారు. ప్రస్తుతం పెంచిన రూ.14 ఛార్జీ సరిపోతుందా లేదా అనే అంశంపైనా న్యాయమైన నిర్ణయం తీసుకుంటామన్నారు.

బ్యాటరీ ఆటోలకు భారీగా రూ.1.5 లక్షల సబ్సిడీ

హైదరాబాద్ నగరాన్ని ఢిల్లీ తరహా కాలుష్య కోరల్లోకి వెళ్లకుండా కాపాడుకోవాల్సిన బాధ్యత అందరిపై ఉందని డిప్యూటీ సీఎం పేర్కొన్నారు. ఇందులో భాగంగా నగరంలో డీజిల్ బస్సుల స్థానంలో ఈ-బస్సులను తీసుకువస్తున్నామని, అలాగే డీజిల్ ఆటోలను బ్యాటరీ (ఎలక్ట్రిక్) ఆటోలుగా మార్చుకునేలా భారీ ప్రోత్సాహకాలు అందిస్తున్నామని వివరించారు.

ఇదీ చదవండి : TG Weather | తెలంగాణ‌కు ఐఎండీ తీపి క‌బురు.. మ‌ళ్లీ జోరందుకోనున్న వాన‌లు..!

'రాజీవ్ యువ వికాసం' కార్యక్రమం కింద ఎలక్ట్రిక్ ఆటోల కోసం రూ.200 కోట్లు కేటాయించారు.

డీజిల్ నుంచి ఈ-ఆటోగా మార్చుకునే డ్రైవర్లకు ఒక్కో ఆటోపై ప్రభుత్వం రూ.1.50 లక్షల ప్రత్యక్ష సబ్సిడీని అందించనుంది.

భవిష్యత్తులో సీఎన్‌జీ, సోలార్, ఈవీ రవాణాకు పూర్తి ప్రాధాన్యం ఇస్తామని ప్రభుత్వం వెల్లడించింది.

కేవలం ఉత్తర్వులకే పరిమితం కాకుండా కార్మికులతో నేరుగా ప్రజాభవన్‌లో కూర్చొని సమస్యలు పరిష్కరించేందుకే ఈ సమావేశం నిర్వహించామని, ప్రభుత్వంపై ఆటో డ్రైవర్లు పూర్తి విశ్వాసంతో ఉండాలని మంత్రులు పిలుపునిచ్చారు.