Chintala Ramachandra Reddy | “ఉపఎన్నిక కోసం కొట్లాడింది మేము.. గెలిచేదీ మేమే”: విజయా రెడ్డి పిటిషన్‌లో ఇంప్లీడ్ అవుతాం

Chintala Ramachandra Reddy | త్రినేత్ర న్యూస్ : "ఖైరతాబాద్ ఉపఎన్నిక రావడానికి కోర్టుల్లో కొట్లాడింది మేము.. రేపు ఎన్నికల్లో గెలిచేది కూడా మేమే" అని బీజేపీ సీనియర్ నేత, మాజీ ఎమ్మెల్యే చింతల రామచంద్రారెడ్డి తేల్చిచెప్పారు. ఉపఎన్నిక నోటిఫికేషన్ నిలిపివేయాలంటూ కాంగ్రెస్ నాయకురాలు పి. విజయా రెడ్డి హైకోర్టులో దాఖలు చేసిన పిటిషన్‌లో తాము కూడా ఇంప్లీడ్ (పక్షంగా లేదా ప్రతివాదిగా చేరడం) అవుతామని ఆయన సంచలన ప్రకటన చేశారు. ఖైరతాబాద్ ఉపఎన్నిక చుట్టూ తిరుగుతున్న తాజా న్యాయ, రాజకీయ పరిణామాలపై ఆయన తాజాగా మరోసారి స్పందించారు.

న్యాయపోరాటంతోనే ఉపఎన్నిక అనివార్యం

బీఆర్ఎస్ టికెట్‌‌పై గెలిచి కాంగ్రెస్ కండువా కప్పుకున్న దానం నాగేందర్‌పై అనర్హత వేటు పడటంతోనే ఖైరతాబాద్ అసెంబ్లీ స్థానం ఖాళీ అయిందని చింతల గుర్తుచేశారు. పార్టీ ఫిరాయింపులకు పాల్పడిన నేతలకు వ్యతిరేకంగా తాము చట్టపరంగా సాగించిన పోరాటం వల్లే నేడు ఉపఎన్నిక వచ్చిందన్నారు. కాంగ్రెస్, బీఆర్ఎస్ పార్టీలు నిస్సిగ్గుగా పార్టీ ఫిరాయింపులను ప్రోత్సహిస్తున్నాయని, రాబోయే ఎన్నికల్లో ప్రజలు ఆ రెండు పార్టీలకు తగిన గుణపాఠం చెప్పడం ఖాయమని మండిపడ్డారు.

విజయా రెడ్డి పిటిషన్‌పై చింతల స్పందన

దానం నాగేందర్ 2023 ఎన్నికల అఫిడవిట్‌లో ఆస్తుల వివరాలను తొక్కిపెట్టారంటూ విజయా రెడ్డి గతంలోనే కోర్టును ఆశ్రయించారు. దీనిపై తుది తీర్పు వచ్చేదాకా ఉపఎన్నిక నోటిఫికేషన్ విడుదల చేయవద్దంటూ ఆమె ఇటీవల లంచ్ మోషన్ పిటిషన్ దాఖలు చేశారు. ఒకవేళ దానం ఎన్నిక చెల్లదని తేలితే, రెండో స్థానంలో నిలిచిన తనను ఎమ్మెల్యేగా ప్రకటించాలని కోరారు. దీనిపై కేంద్ర ఎన్నికల సంఘం (ఈసీఐ) కూడా స్పందిస్తూ.. కోర్టు తీర్పు వెలువడే వరకు ఎలాంటి ఎన్నికల నోటిఫికేషన్ ఇవ్వబోమని మౌఖిక హామీ ఇచ్చింది.

ఈ వ్యవహారంపై స్పందించిన చింతల రామచంద్రారెడ్డి, ఈ పిటిషన్‌లో బీజేపీ తరఫున తాము కూడా ఇంప్లీడ్ అయ్యి తమ వాదనలను కోర్టు ముందు ఉంచుతామని స్పష్టం చేశారు.

బీజేపీ టికెట్ నా హక్కు.. నిర్ణయం అధిష్ఠానానిదే

ఖైరతాబాద్ ఉపఎన్నిక బరిలో నిలవడానికి తాను పూర్తిగా సిద్ధంగా ఉన్నట్లు చింతల రామచంద్రారెడ్డి స్పష్టం చేశారు. "నియోజకవర్గంలో మొదటినుంచీ పార్టీ కోసం పనిచేస్తున్న సీనియర్ నేతగా, కార్యకర్తగా ఇక్కడి బీజేపీ టికెట్ అడిగే పూర్తి హక్కు నాకుంది. అయితే పార్టీ అధిష్ఠానం ఏ నిర్ణయం తీసుకున్నా దానికి కట్టుబడి ఉంటాను" అని వివరించారు. ఖైరతాబాద్‌లో కాషాయ జెండా ఎగరడం ఖాయమని ఆయన ధీమా వ్యక్తం చేశారు.