Bandi Bhagirath Bail | పోక్సో కేసు.. బండి భ‌గీర‌థ్‌కు బెయిల్

Bandi Bhagirath Bail | త్రినేత్ర‌.న్యూస్‌: పోక్సో కేసులో బండి భగీరథ్‌కు తాత్కాలికంగా బెయిల్‌ మంజూరైంది. రెండు వారాలకుపైగా రిమాండ్‌లో ఉన్న భగీరథ్‌కు మేడ్చల్ మల్కాజ్‌గిరి కోర్టు బెయ‌ల్‌కు అనుమ‌తిచ్చింది. అయితే బెయిల్‌కు సంబంధించిన షరతులను తప్పనిసరిగా పాటించాలని కోర్టు స్పష్టం చేసింది. పేట్‌ బషీరాబాద్‌ పోలీసులు గ‌త‌ మే 16న అరెస్ట్‌ చేసి రిమాండ్‌కు తరలించిన విషయం తెలిసిందే. దాదాపు నెలరోజుల పాటు చర్లపల్లి జైల్లో ఉన్న భగీరథ్ శ‌నివారం మధ్యాహ్నం విడుదలయ్యారు. ఇంజినీరింగ్ ఫైన‌ల్ ప‌రీక్ష‌ల నేప‌థ్యంలో ఈనెల 28 వరకు బెయిల్‌ మంజూరు చేస్తున్నట్టు న్యాయమూర్తి ఉత్తర్వుల్లో పేర్కొన్నారు.

ఇటీవ‌ల‌ మైనర్‌పై లైంగిక వేధింపులకు పాల్పడ్డారన్న ఆరోపణలతో బాధిత బాలిక తల్లి ఇచ్చిన ఫిర్యాదు మేరకు బండి భగీరథ్‌పై కేసు నమోదైంది. పోలీసులు POCSO చట్టంలోని పలు సెక్షన్ల కింద కేసు నమోదు చేసి నిందితుడిగా ఉన్న భగీరథ్‌ను కోర్టులో హాజరుపరిచారు. దీంతో న్యాయస్థానం రిమాండ్ విధించింది. ఈ క్ర‌మంలో భగీరథ్ తరఫు న్యాయవాదులు మల్కాజ్‌గిరి కోర్టులో బెయిల్ పిటిషన్ దాఖలు చేశారు. దీనిపై శనివారం కోర్టులో ఇరుపక్షాల వాదనలను విన్న కోర్టు.. ష‌ర‌తుల‌తో కూడిన బెయిల్‌ను మంజూరు చేస్తూ తీర్పునిచ్చింది. దీంతో భగీరథ్ జైలు నుంచి విడుదలయ్యారు.