Bathukamma Dubai | దుబాయిలోనూ అంగరంగ వైభవంగా బతుకమ్మ వేడుకలు.. ప్రభుత్వానికి ఎన్నారై కమిటీ విజ్ఞప్తి

Bathukamma Dubai | త్రినేత్ర న్యూస్ : తెలంగాణ సాంస్కృతిక వైభవానికి ప్రతీక అయిన బతుకమ్మ వేడుకలను దుబాయిలో అధికారికంగా నిర్వహించాలని ఎన్నారై అడ్వయిజరీ కమిటీ ఛైర్మన్, అంబాసిడర్ డాక్టర్ బిఎం వినోద్ కుమార్ రాష్ట్ర ప్రభుత్వాన్ని కోరారు. విదేశాల్లో నివసించే తెలంగాణ ప్రజల కోసం ప్రభుత్వ సాంస్కృతిక శాఖ ఆధ్వర్యంలో ఈ వేడుకలు నిర్వహించాలని ఆయన విజ్ఞప్తి చేస్తూ సంబంధిత మంత్రులు, అధికారులకు లేఖలు సమర్పించారు.

మంత్రులకు లేఖలు

ఈ మేరకు రాష్ట్ర పర్యాటక, సాంస్కృతిక శాఖ మంత్రి జూపల్లి కృష్ణారావుతో పాటు, తెలంగాణ సాంస్కృతిక సారథి చైర్‌పర్సన్ జి.వి. వెన్నెల గద్దర్‌కు డా. బిఎం వినోద్ కుమార్ ప్రత్యేకంగా లేఖలు రాశారు. ప్రవాస భారతీయుల సంస్కృతిని, సంప్రదాయాలను కాపాడేలా దుబాయిలో బతుకమ్మ వేడుకలు నిర్వహించడం ఎంతో ప్రాముఖ్యత సంతరించుకుంటుందని ఆయన పేర్కొన్నారు.

సమన్వయకర్తల నియామకం

వచ్చే అక్టోబర్ 17వ తేదీన దుబాయిలో జరగనున్న ప్రవాసీ బతుకమ్మ ఉత్సవాల నిర్వహణకు గాను తెలంగాణ ప్రభుత్వ ఎన్నారై అడ్వయిజరీ కమిటీ సభ్యులు నంగి దేవేందర్ రెడ్డి, కొట్టాల సత్యం నారాగౌడ్ అలాగే దుబాయికి చెందిన ప్రముఖ సామాజిక సేవకులు సుతారి సత్యనారాయణ సమన్వయకర్తలుగా వ్యవహరించనున్నట్లు వినోద్ కుమార్ వెల్లడించారు. మరి ప్రభుత్వం ఈ విజ్ఞప్తిపై ఎలా స్పందిస్తుందో వేచి చూడాలి.