Harish Rao vs Beerla Ilaiah | సర్పంచ్ కాకముందు నువ్వు ఏం చేసేవాడివో గుర్తుందా? బీర్ల ఐలయ్యకు వార్నింగ్

• హరీష్ రావును విమర్శిస్తే ఆలేరులో తిరగనివ్వం
• నీ భూకబ్జాల గుట్టు విప్పుతాం
• ఎమ్మెల్యే బీర్ల ఐలయ్యకు బీఆర్ఎస్ మాస్ వార్నింగ్

Harish Rao vs Beerla Ilaiah | త్రినేత్ర.న్యూస్ : మాజీ మంత్రి తన్నీరు హరీష్ రావుపై విమర్శలు చేసిన ఆలేరు ఎమ్మెల్యే బీర్ల ఐలయ్యపై బీఆర్ఎస్ (BRS) శ్రేణులు తీవ్ర స్థాయిలో మండిపడ్డారు. యాదగిరిగుట్టలో బీఆర్ఎస్ పార్టీ మండల అధ్యక్షుడు కర్రె వెంకటయ్య ఆధ్వర్యంలో జరిగిన ప్రెస్ మీట్‌లో ఎమ్మెల్యే తీరును తీవ్రంగా ఎండగట్టారు. ఆయన చేసిన భూకబ్జాలు, అవినీతి బాగోతాలను త్వరలోనే బయటపెడతామని సంచలన ఆరోపణలు చేశారు.

స్థాయి మరిచి విమర్శలా?

కన్నెపల్లి మోటార్లను (Kannepalli motors) ఆన్ చేయాలని ప్రభుత్వాన్ని ప్రశ్నించిన పాపానికి హరీష్ రావును విమర్శిస్తారా అని కర్రె వెంకటయ్య ఆగ్రహం వ్యక్తం చేశారు. "హరీష్ రావును విమర్శించే స్థాయి నీది కాదు బీర్ల ఐలయ్య.. సర్పంచ్ కాకముందు నీ స్థాయి ఏంటో, నువ్వు ఎక్కడి నుంచి వచ్చావో ఒక్కసారి గుర్తుతెచ్చుకో" అని తీవ్ర స్థాయిలో విరుచుకుపడ్డారు. మంత్రి పదవి వస్తుందన్న ఆశతోనే పెద్ద నాయకులను ఇష్టమొచ్చినట్లు విమర్శిస్తున్నారని.. ఇలాంటివి ఇకపై సహించేది లేదని హెచ్చరించారు.

అవినీతి బాగోతం.. కబ్జాల గుట్టు

అధికారం ఉందని విర్రవీగుతున్న ఎమ్మెల్యే అవినీతి చరిత్ర ప్రజలందరికీ తెలుసని బీఆర్ఎస్ నేతలు ఆరోపించారు. 'స్పెక్ట్రా కంపెనీ' (Spectra company) ద్వారా వేల కోట్ల రూపాయలు సంపాదించారని ఆరోపించారు. "నీ భూకబ్జా గుట్టు విప్పుతాం. ఆలేరు నియోజకవర్గంలో గుట్టలు, చెరువుల్లో మట్టిని తోడుకుంటూ కోట్లకు పడగెత్తుతున్నావు. చల్లూరు గుట్టలను ధ్వంసం చేసి రియల్ ఎస్టేట్ (Real Estate) వ్యాపారంతో కోట్లాది రూపాయలు దండుకుంటున్నావు. అభివృద్ధిని గాలికి వదిలేసి కేవలం ధనార్జనే ధ్యేయంగా నీ పాలన సాగుతోంది" అని దుయ్యబట్టారు.

యాదగిరిగుట్ట సాక్షిగా ప్రమాణం చేయాలి

కోకాపేటలోని దొడ్డి కొమురయ్య కురుమ సంఘం భవనాన్ని ఆంధ్ర వ్యాపారులకు కట్టబెట్టింది వాస్తవం కాదా? అని బీఆర్ఎస్ నేతలు ప్రశ్నించారు. ఇది అబద్ధమైతే యాదగిరిగుట్ట పాదాల వద్ద ప్రమాణం చేయాలని సవాల్ విసిరారు. అలాగే, చంద్రబాబుకు చెందిన హెరిటేజ్ పాలు తెలంగాణలో ఏరులై పారుతున్నా ఎందుకు మాట్లాడటం లేదని ఎమ్మెల్యేను నిలదీశారు.

హరీష్ రావుకు ఎమ్మెల్యే బీర్ల ఐలయ్య తక్షణమే క్షమాపణ చెప్పాలని, లేదంటే ఆలేరులో ఆయనను తిరగనివ్వబోమని వార్నింగ్ ఇచ్చారు. రాబోయేది మళ్లీ బీఆర్ఎస్ ప్రభుత్వమేనని.. అక్రమాలకు పాల్పడిన ఎమ్మెల్యేను జైలుకు పంపించడం ఖాయమని స్పష్టం చేశారు.

ఈ ప్రెస్ మీట్‌లో పీఏసీఎస్ మాజీ చైర్మన్ ఇమ్మడి రాంరెడ్డి, బాహుపేట సర్పంచ్ కావిడి మహేందర్, పట్టణ సెక్రటరీ జనరల్ పాపట్ల నరహరి, పట్టణ యువజన విభాగం అధ్యక్షుడు ముక్యర్ల సతీష్, సారాశి రాజేష్ యాదవ్ తదితరులు పాల్గొన్నారు.