Balmoor Venkat | పోలీసు నియామకాల్లో లాంగ్ జంప్ 4 మీటర్ల నుంచి 3.8 మీటర్లకు తగ్గించాలి

• పోలీసు అభ్యర్థులకు ఊరట
• లాంగ్ జంప్‌పై మండలిలో బల్మూర్ వెంకట్ కీలక విజ్ఞప్తి

Balmoor Venkat | త్రినేత్ర.న్యూస్ : తెలంగాణలో పోలీసు ఉద్యోగాల కోసం (Police jobs) అహర్నిశలు శ్రమిస్తున్న నిరుద్యోగ యువతకు ఊరటనిచ్చే అంశం శాసనమండలి వేదికగా చర్చకు వచ్చింది. పోలీసు ఫిజికల్ ఈవెంట్స్‌లో (Physical Events) కీలకంగా ఉండే 'లాంగ్ జంప్' క్వాలిఫైయింగ్ మార్కును తగ్గించాలని ప్రభుత్వ విప్, ఎమ్మెల్సీ డాక్టర్ బల్మూర్ వెంకట్ (Dr Balmoor Venkat) ప్రభుత్వాన్ని కోరారు.

4 మీటర్ల నిబంధనతో నష్టపోతున్న అభ్యర్థులు

రాష్ట్రంలో ఇటీవల 7,437 పోలీసు పోస్టుల భర్తీకి ప్రభుత్వం నోటిఫికేషన్ (Notification) జారీ చేసిన విషయం తెలిసిందే. అయితే, ఈ రిక్రూట్‌మెంట్‌లో లాంగ్ జంప్ క్వాలిఫై అవ్వాలంటే అభ్యర్థులు కనీసం 4 మీటర్లు దూకాల్సి ఉంటుంది. ఈ నిబంధన కారణంగా చాలా మంది అభ్యర్థులు ఫిజికల్ ఈవెంట్స్‌లో క్వాలిఫై (Qualify) కాలేకపోతున్నారని, తృటిలో అవకాశాలు కోల్పోయి తీవ్రంగా నష్టపోతున్నారని బల్మూర్ వెంకట్ సభ దృష్టికి తీసుకొచ్చారు.

పొరుగు రాష్ట్రాల్లో 3.8 మీటర్లే..

పొరుగు రాష్ట్రాలైన ఆంధ్రప్రదేశ్, తమిళనాడు, కేరళ, కర్ణాటక రాష్ట్రాల్లోని పోలీసు రిక్రూట్‌మెంట్ నిబంధనలను ఈ సందర్భంగా ఆయన ఉదాహరణగా చూపారు. ఆయా రాష్ట్రాల్లో లాంగ్ జంప్ (Long Jump) క్వాలిఫైయింగ్ దూరాన్ని 3.8 మీటర్లుగానే పరిగణిస్తున్నారని గుర్తుచేశారు.

ఆ రాష్ట్రాల తరహాలోనే తెలంగాణలోనూ పోలీసు నియామకాల ఈవెంట్స్‌లో లాంగ్ జంప్ నిబంధనను 4 మీటర్ల నుంచి 3.8 మీటర్లకు సడలించాలని బల్మూర్ వెంకట్ ప్రభుత్వాన్ని అభ్యర్థించారు. ప్రభుత్వం ఈ ప్రతిపాదనను సానుకూలంగా పరిశీలిస్తే వేలాది మంది నిరుద్యోగ అభ్యర్థులకు న్యాయం జరుగుతుందని ఆయన ఆకాంక్షించారు. పోలీసు ఉద్యోగాల కోసం సన్నద్ధమవుతున్న అభ్యర్థులు సైతం ప్రభుత్వ నిర్ణయం కోసం ఆసక్తిగా ఎదురుచూస్తున్నారు.