Ponguleti Srinivasa Reddy | 22ఏ భూములపై కీలక ఆదేశాలు.. అర్హులకు బిగ్ రిలీఫ్ ఇచ్చిన మంత్రి పొంగులేటి

Ponguleti Srinivasa Reddy | త్రినేత్ర.న్యూస్ : రాష్ట్రంలో నిషేధిత భూముల (22A) జాబితా కారణంగా ఏ ఒక్క నిజమైన భూహక్కుదారుడికి లేదా పేదవాడికి అన్యాయం జరగకూడదన్నదే తెలంగాణ ప్రభుత్వ ముఖ్య ఉద్దేశమని రాష్ట్ర రెవెన్యూ, హౌసింగ్ శాఖ మంత్రి పొంగులేటి శ్రీనివాసరెడ్డి స్పష్టం చేశారు. అర్హులైన ప్రజల హక్కులను కాపాడటంతో పాటు ప్రభుత్వ భూములను ఆక్రమణల నుండి రక్షించడమే లక్ష్యంగా ప్రభుత్వం ముందుకు సాగుతోందని వెల్లడించారు. బుధవారం డాక్టర్ బి.ఆర్.అంబేద్కర్ సచివాలయంలో 22ఏ నిషేధిత భూముల అంశంపై కలెక్టర్లు, ఉన్నతాధికారులతో మంత్రి పొంగులేటి ఉన్నతస్థాయి సమీక్షా సమావేశం నిర్వహించారు.

'ఒక్క సెంటు భూమిని కూడా కొత్తగా చేర్చలేదు'

ముఖ్యమంత్రి రేవంత్ రెడ్డి నాయకత్వంలో కాంగ్రెస్ ప్రభుత్వం అధికారంలోకి వచ్చిన తర్వాత ఉద్దేశపూర్వకంగా ఒక్క సెంటు భూమిని కూడా 22ఏ నిషేధిత జాబితాలో చేర్చలేదని మంత్రి స్పష్టం చేశారు. ప్రైవేట్ భూములను ప్రభుత్వం కావాలని నిషేధిత జాబితాలో చేర్చిందంటూ జరుగుతున్న ప్రచారంలో ఎలాంటి నిజం లేదని తేల్చిచెప్పారు.

అధికారులకు స్పష్టమైన మార్గదర్శకాలు

"22ఏ దరఖాస్తు ఏ స్థాయిలో వచ్చినా పెండింగ్‌లో పెట్టొద్దు. తహసీల్దార్ నుంచి జిల్లా కలెక్టర్ వరకు ప్రతి అధికారీ రికార్డులను సమగ్రంగా పరిశీలించి చట్టబద్ధమైన నిర్ణయం తీసుకోవాలి. ప్రజావాణిలో వచ్చిన ఫిర్యాదులపై ప్రత్యేక దృష్టి సారించాలి." అని పొంగులేటి స్పష్టం చేశారు.

 

45 రోజుల్లో పరిష్కారం.. హైకోర్టు ఉత్తర్వులు అమలయ్యేలా

22ఏ భూముల వివాదాల పరిష్కారానికి సంబంధించి హైకోర్టు నిర్దేశించిన 45 రోజుల గడువు లోపే అన్ని విచారణలు పూర్తి చేసి తుది నిర్ణయం తీసుకోవాలని అధికారులను మంత్రి ఆదేశించారు. కోర్టు ఆదేశాలను పరిగణనలోకి తీసుకుంటూ, బాధితులకు త్వరితగతిన న్యాయం జరిగేలా చర్యలు తీసుకోవాలని సూచించారు.

కలెక్టర్లకు పూర్తి అధికారాలు

ప్రభుత్వ భూములపై ఎలాంటి అక్రమ రిజిస్ట్రేషన్లు, ఆక్రమణలు జరగకుండా రెవెన్యూ, రిజిస్ట్రేషన్ శాఖల అధికారులు నిరంతరం అప్రమత్తంగా ఉండాలని హెచ్చరించారు. 22ఏ జాబితాపై క్షేత్రస్థాయిలో సమగ్ర పరిశీలన జరిపి తుది నిర్ణయం తీసుకునే అధికారం జిల్లా కలెక్టర్లకే ఉందని గుర్తుచేశారు. ప్రజల ప్రయోజనాలు, ప్రభుత్వ భూముల పరిరక్షణ రెండింటినీ సమతుల్యం చేస్తూ పారదర్శకంగా వ్యవహరించాలని స్పష్టం చేశారు.

ఈ సమీక్షా సమావేశంలో ముఖ్యమంత్రి ప్రత్యేక కార్యదర్శి శేషాద్రి, రెవెన్యూ శాఖ ముఖ్య కార్యదర్శి డి.ఎస్. లోకేష్ కుమార్, స్టాంప్స్ అండ్ రిజిస్ట్రేషన్ ఐజీ రాజీవ్ గాంధీ హనుమంతుతో పాటు హైదరాబాద్, రంగారెడ్డి, సంగారెడ్డి జిల్లాల కలెక్టర్లు పాల్గొన్నారు.