Komatireddy Venkatreddy | వచ్చే ఎన్నికల్లో గెలిపిస్తానంటేనే పోటీ చేస్తా : మంత్రి కోమ‌టిరెడ్డి

Komatireddy Venkatreddy | త్రినేత్ర‌.న్యూస్ : రాష్ట్ర రోడ్లు, భ‌వ‌నాల శాఖ మంత్రి కోమ‌టిరెడ్డి వెంక‌ట్ రెడ్డి త‌న రాజ‌కీయ భ‌విష్య‌త్‌పై కీల‌క ప్ర‌కట‌న చేశారు. వచ్చే అసెంబ్లీ ఎన్నికల్లో అత్యధిక మెజార్టీతో గెలిపిస్తామని ప్రజలు మాట ఇస్తేనే పోటీ చేస్తాన‌ని ఆయ‌న ప్ర‌క‌టించారు. హామీ లేకుంటే ఎన్నికల నుంచి తప్పుకుంటాన‌ని తేల్చిచెప్పారు. తాను ఎన్నికల ప్రచారానికి రాకపోయినా చేసిన అభివృద్ధి చూసి ఓట్లు వేయాలని ప్రజలకు పిలుపునిచ్చారు.

ఎమ్మెల్యేగా, మంత్రిగా పనిచేసినా నాకు సొంత ఇల్లు, ఆస్తులు లేవు. అద్దె ఇంట్లో ఉంటున్నా.. వారసత్వంగా వచ్చిన భూమి మాత్రమే ఉంది అని కోమ‌టిరెడ్డి వెంక‌ట్ రెడ్డి తెలిపారు. తన రాజకీయ నిబద్ధతను,ఆస్తుల వివరాలను ప్రస్తావించిన ఆయ‌న‌ స్వార్థం కోసం కాకుండా, కేవలం ప్రజల సేవ కోసమే రాజకీయాలు చేస్తున్నానని పేర్కొన్నారు.

నల్లగొండ పట్టణాభివృద్ధిపై తనకున్న లక్ష్యాన్ని చాటిచెప్పిన ఆయన, నల్లగొండను సాధారణ పట్టణంలా కాకుండా ఒక అత్యాధునిక నగరంగా, రాష్ట్రంలోనే ఒక రోల్ మోడల్‌గా తీర్చిదిద్దుతున్నట్లు పేర్కొన్నారు. ఇందుకోసం ఇప్పటికే నల్లగొండను కార్పొరేషన్‌గా మార్చామని, రహదారులు, మౌలిక వసతుల కల్పనకు భారీగా నిధులు కేటాయించి అభివృద్ధి పనులను వేగవంతం చేస్తున్నామని మంత్రి వివరించారు.