Medaram Jatara 2026 | మేడారం జాతర : తెగిన 14 లక్షల మేకల తలలు.. రూ.1,000 కోట్ల బిజినెస్.. ఆశ్చర్యపరుస్తున్న జాతర లెక్కలు

Medaram Jatara 2026 | ఆసియాలోనే అతిపెద్ద గిరిజన వేడుక, తెలంగాణ కుంభమేళాగా ప్రసిద్ధి చెందిన మేడారం సమ్మక్క-సారలమ్మ జాతర ముగిసింది. నాలుగు రోజుల పాటు అంగరంగ వైభవంగా జరిగిన ఈ జాతరలో భక్తులు తల్లీబిడ్డలను దర్శించుకుని పునీతులయ్యారు. అయితే ఈసారి జాతరలో భక్తుల రద్దీతో పాటు, జరిగిన ఆర్థిక లావాదేవీలు (Business Turnover) కూడా రికార్డు సృష్టించాయి.

రూ.1,000 కోట్ల జాతర

జాతర జరిగిన నాలుగు రోజుల్లో సుమారు రూ.1,000 కోట్లకు పైగా భక్తులు ఖర్చు చేసినట్లు అనధికారిక అంచనాలు చెబుతున్నాయి. రవాణా, వసతి, ఆహారం, మొక్కులు, ఇతర కొనుగోళ్లు కలుపుకొని గ్రామీణ ఆర్థిక వ్యవస్థకు ఈ జాతర భారీ ఊతమిచ్చింది. ఈ మహా జాతరకు సుమారు కోటిన్నర మంది భక్తులు హాజరైనట్లు సమాచారం.

14 లక్షల జీవాల బలి - ఘుమఘుమలాడిన వన భోజనాలు

మేడారం జాతర అంటేనే మొక్కులు, వనభోజనాలు. సమ్మక్క సారలమ్మలకు ప్రీతికరమైన నైవేద్యం సమర్పించేందుకు భక్తులు పోటీపడ్డారు. ఈ ఒక్క జాతరలోనే సుమారు 14 లక్షల మేకలు, గొర్రెలను భక్తులు బలి ఇచ్చినట్లు తెలుస్తోంది. కేవలం మాంసం, మద్యం (Meat and Liquor) కోసమే భక్తులు సుమారు రూ.400 కోట్లు వెచ్చించడం విశేషం. మద్యం కంటే మాంసం కోసమే భక్తులు ఎక్కువగా ఖర్చు చేసినట్లు తెలుస్తోంది. జాతర పరిసరాల్లో విందులు, వినోదాలతో సందడి నెలకొంది.

బంగారం, కొబ్బరికాయల మోత

అమ్మవార్లకు అత్యంత ఇష్టమైనది బంగారం (బెల్లం). భక్తులు తమ బరువుకు సరిపడా బంగారాన్ని తులాభారం వేసి అమ్మవార్లకు సమర్పించుకున్నారు. జాతరలో దాదాపు 500 టన్నుల బెల్లం (Jaggery) విక్రయాలు జరిగాయి. మొక్కుల్లో భాగంగా కోటికి పైగా కొబ్బరికాయలను భక్తులు సమర్పించారు.

మొత్తానికి మేడారం జాతర భక్తిభావంతో పాటు, తెలంగాణ గ్రామీణ ఆర్థిక రంగానికి భారీ దన్నుగా నిలిచిందని ఈ గణాంకాలు స్పష్టం చేస్తున్నాయి.