Medaram Jatara | మేడారం హుండీ ఆదాయం రూ.13.25 కోట్లు.. గ‌త జాత‌ర‌తో స‌మానం!

Medaram Jatara | త్రినేత్ర‌.న్యూస్‌: రెండేండ్ల‌కోసారి నిర్వ‌హించే అతిపెద్ద ఆదివాసీ సాంస్కృతిక సంబురం మేడారం మ‌హాజాత‌ర (Medaram Jatara) గ‌త నెల 28 నుంచి 31 వ‌ర‌కు నాలుగు రోజుల‌పాటు వైభ‌వంగా జ‌రిగిన విష‌యం తెలిందే. కోటిన్న‌ర‌కు పైగా భ‌క్తులు వ‌న‌దేవ‌త‌ల‌ను ద‌ర్శించుకుని త‌మ మొక్కులు తీర్చుకున్నారు. జాత‌ర సంద‌ర్భంగా భ‌క్తులు సమ‌ర్పించుకున్న కానుక‌లు, హుండీ ఆదాయాన్ని ఫిబ్ర‌వ‌రి 5 నుంచి హ‌నుమ‌కొండ‌లోని టీటీడీ క‌ల్యాణ మండ‌పంలో లెక్కిస్తున్నారు. బుధ‌వారంతో లెక్కింపు పూర్త‌యింది.

వారం రోజుల‌పాటు మొత్తం 828 హుండీలను లెక్కించగా రూ.13,25,83,269 ఆదాయం లభించింది. విదేశీ కరెన్సీ, రద్దు చేసిన నోట్లు, వెండి బంగారు ఆభరణాలు కూడా హుండీల్లో లభించాయని అధికారులు తెలిపారు. మొత్తం 400 మంది సిబ్బంది దేవాదాయ శాఖ అధికారుల పర్యావేక్షణలో లెక్కించార‌ని వెల్ల‌డించారు. కాగా, రెండేండ్ల క్రితం నిర్వ‌హించిన జాత‌ర‌లో కూడా రూ.13.25 కోట్ల ఆదాయ‌మే రావ‌డం విశేషం. 2024 జాత‌ర‌లో 13,25,22,511 ఆదాయం వ‌చ్చింది. ఈ సారి రూ.60 వేల అద‌నంగా వ‌చ్చాయి.

అయితే గత జాతరలో 540 హుండీలను ఏర్పాటు చేయ‌గా, ఈసారి 828 హుండీలను ఏర్పాటు చేశారు. దాదాపు 288 హుండీలను అదనంగా ఉన్న‌ప్ప‌టికీ గత జాతరతో సమానంగా ఆదాయం వ‌చ్చింది. దీంతో ఈసారి ఆదాయం తగ్గిందని అధికారులు చెబుతున్నారు. కాగా, గ‌త జాత‌ర‌లో 779 గ్రాముల 800 మిల్లీగ్రాముల బంగారం, 55 కిలోల 150 గ్రాముల వెండి వస్తువులు కూడా వచ్చాయి.

రోజువారీగా వచ్చిన ఆదాయం వివరాలు..

• ఫిబ్రవరి 5: రూ. 2,49,65,000 (125 హూండీలు)
• ఫిబ్రవరి 6: రూ. 3,54,25,200 (160 హూండీలు)
• ఫిబ్రవరి 7: రూ. 2,01,21,440 (140 హూండీలు)
• ఫిబ్రవరి 8: రూ. 2,64,75,757 (200 హూండీలు)
• ఫిబ్రవరి 9: రూ. 1,12,63,000 (163 హూండీలు)
• ఫిబ్రవరి 10: రూ. 80,81,935 (40 హూండీలు)