HCU | హెచ్‌సీయూలోని సీఆర్ రావు ఇన్‌స్టిట్యూట్‌లో భారీ చోరీ.. రూ.25 ల‌క్ష‌ల విలువైన ల్యాప్‌టాప్‌లు మాయం

HCU | గచ్చిబౌలి (Gachibowli)లోని హైదరాబాద్ సెంట్రల్ యూనివర్సిటీ (Hyderabad Central University) ప‌రిధిలోని ప్రతిష్టాత్మక సీఆర్ రావు అడ్వాన్స్‌డ్ ఇన్‌స్టిట్యూట్‌ (C.R.Rao Advanced Institute)లో భారీ చోరీ జరిగింది. సోమ‌వారం అర్ధ‌రాత్రి దాటిన త‌ర్వాత ఇన్‌స్టిట్యూట్‌లోకి ప్ర‌వేశించిన ఆగంత‌కులు చోరీకి పాల్ప‌డ్డారు.

ఇన్‌స్టిట్యూట్‌లోని ఓ క్లాస్‌రూమ్ కిటికీ గ్రిల్స్‌ను తొల‌గించి లోప‌లికి ప్ర‌వేశించిన ఆగంత‌కులు.. సుమారు 50 ల్యాప్‌టాప్‌ల‌ను (Laptops) ఎత్తుకెళ్లిపోయారు. వాటి విలువ దాదాపు రూ.25 ల‌క్ష‌లకుపైనే ఉంటుంద‌ని స‌మాచారం. ఇవాళ ఉద‌యం చోరీ వ్య‌వ‌హారాన్ని గుర్తించిన వ‌ర్సిటీ సెక్యూరిటీ సిబ్బంది వెంట‌నే గ‌చ్చిబౌలి పోలీసుల‌కు ఫిర్యాదు చేశారు. ఘ‌ట‌నాస్థ‌లికి చేరుకున్న పోలీసులు సీసీటీవీ ఫుటేజ్‌ల‌ను ప‌రిశీలించ‌గా.. ల్యాప్‌టాప్‌ల‌ను కారులో త‌ర‌లించిన‌ట్లు గుర్తించారు. ఈ మేర‌కు ఘ‌ట‌న‌పై కేసు న‌మోదు చేసిన పోలీసులు ద‌ర్యాప్తు చేప‌ట్టారు. సీసీటీవీ ఫుటేజ్ ఆధారంగా నిందితుల కోసం గాలింపు చేప‌డుతున్నారు.