KTR Felicitates Journalist | జాతీయ స్థాయిలో మెరిసిన తెలంగాణ ఫొటో జర్నలిస్ట్.. అభినందించిన కేటీఆర్

KTR Felicitates Journalist | త్రినేత్ర.న్యూస్ : తెలంగాణ (Telangana) జర్నలిజం మరోసారి జాతీయ స్థాయిలో తన సత్తా చాటింది. ప్రతిష్టాత్మక 'కర్ణాటక మీడియా అకాడమీ' (Karnataka Media Academy) నిర్వహించిన జాతీయస్థాయి ఫొటో జర్నలిస్టుల (Photojournalists) పోటీల్లో తెలంగాణకు చెందిన 'నమస్తే తెలంగాణ' దినపత్రిక ఫొటోగ్రాఫర్ వీరగోని రజినీకాంత్ గౌడ్ మూడో బహుమతి (Third Prize) సాధించారు. ఈ అరుదైన ఘనత సాధించిన రజినీకాంత్‌ను బీఆర్ఎస్ (BRS) వర్కింగ్ ప్రెసిడెంట్ కేటీఆర్ (KTR) ప్రత్యేకంగా అభినందించారు.

బంజారాహిల్స్ నివాసంలో ఘన సత్కారం

జాతీయ అవార్డు (National Award) దక్కించుకుని రాష్ట్రానికి గర్వకారణంగా నిలిచిన రజినీకాంత్ గౌడ్‌ను కేటీఆర్ బంజారాహిల్స్‌లోని తన నివాసానికి గురువారం సాదరంగా ఆహ్వానించారు. అక్కడ ఆయనను శాలువాతో ఘనంగా సత్కరించారు. జాతీయ స్థాయి పోటీల్లో అద్భుతమైన ప్రతిభ కనబరిచి.. తెలంగాణ రాష్ట్రానికి గొప్ప గుర్తింపు తీసుకురావడం ఎంతో అభినందనీయమని ఈ సందర్భంగా కేటీఆర్ కొనియాడారు.

మరిన్ని ఇంటర్నేషనల్ అవార్డ్స్ రావాలి

ఒక మంచి ఫొటో వేలాది పదాలతో సమానమని, సమాజంలోని వాస్తవాలను, భావోద్వేగాలను కెమెరా కన్నుతో బంధించి ప్రజల ముందుకు తీసుకురావడంలో ఫొటో జర్నలిస్టులది కీలక పాత్ర అని కేటీఆర్ గుర్తుచేశారు. రజినీకాంత్ గౌడ్ తన వృత్తిలో మరింత నైపుణ్యంతో రాణించాలని, భవిష్యత్తులో జాతీయ, అంతర్జాతీయ స్థాయిలో ఇంకెన్నో ఉన్నత పురస్కారాలు సాధించి రాష్ట్రానికి పేరు ప్రఖ్యాతలు తీసుకురావాలని కేటీఆర్ మనస్ఫూర్తిగా ఆకాంక్షించారు.