జన్వాడలో లీజు.. ఎర్రవెల్లిలో భూములు.. కేసీఆర్‌–కేటీఆర్‌ నుంచి ప్రజలకు కావాల్సిన 10 జవాబులు!

              వ్యక్తిగత ఆస్తుల ప్రశ్న కాదు.. ప్రజా జవాబుదారీతనం: జన్వాడ నుంచి ఎర్రవెల్లి వరకు 10 సందేహాలు

 

జన్వాడలో కేటీఆర్‌తో ముడిపడిన ఆస్తి.. ఎర్రవెల్లిలో కేసీఆర్‌ వ్యవసాయ క్షేత్రం చుట్టూ భూములు.. తెలంగాణ రాజకీయాల్లో ఇప్పుడు ఈ రెండింటిపైనా వివాదం నడుస్తోంది. జన్వాడ ఆస్తి తనది కాదని, మిత్రుడి నుంచి లీజుకు తీసుకున్నానని కేటీఆర్‌ గతంలో చెప్పారు. ఎర్రవెల్లిలో కేసీఆర్‌ కుటుంబ భూములపై ముఖ్యమంత్రి రేవంత్‌రెడ్డి శాసనసభలో తీవ్ర ఆరోపణలు చేయగా, ప్రభుత్వం రికార్డుల పరిశీలన, సర్వే చేపట్టింది.

రెండూ ఒకే వివాదాలు కావు. ఆరోపణ వచ్చినంత మాత్రాన కేటీఆర్‌ లేదా కేసీఆర్‌ తప్పు చేసినట్లు కాదు. వాటిని ఆధారాలతో నిరూపించాల్సిన బాధ్యత ప్రభుత్వానిదే. అదే సమయంలో ప్రజాక్షేత్రంలో ఉన్న నేతలపై నిబంధనల ఉల్లంఘనకు సంబంధించిన ఆరోపణలు వచ్చినప్పుడు ప్రజలకు వాస్తవాలు చెప్పాల్సిన అవసరమూ ఉంటుంది. జన్వాడపై కేటీఆర్‌ కొన్ని అంశాలకు స్పందించినా పూర్తి వివరాలపై సందేహాలు ఇంకా అలాగే మిగిలాయి. ఎర్రవెల్లిపై కేసీఆర్‌ వైపు నుంచి సమగ్ర వివరణ రావాల్సి ఉంది. అప్పటి వరకు ప్రజల్లో ఈ ఆరోపణల పట్ల అనుమానాలు మిగిలే ఉంటాయి.

వ్యక్తిగతం కాదు.. ప్రజా జవాబుదారీతనం

కేసీఆర్‌, కేటీఆర్‌లకు ఎంత వ్యక్తిగత ఆస్తి ఉండాలన్నది ఇక్కడ ప్రశ్న కాదు. చట్టబద్ధంగా సంపాదించిన ఆస్తి ఎవరికైనా వ్యక్తిగతమే. కానీ ఆస్తులు, వినియోగిస్తున్న నిర్మాణాల విషయంలో ప్రభుత్వ భూమి, నాలా ఆక్రమణ, నిర్మాణ అనుమతులు, భూ పరిమితి నిబంధనల ఉల్లంఘన వంటి ఆరోపణలు ప్రజాక్షేత్రంలోకి వచ్చినప్పుడు విషయం అక్కడితో వ్యక్తిగతంగా మిగలదు.

ప్రభుత్వం ఆరోపిస్తే ఆధారాలు చూపాలి. అవి తప్పని భావిస్తే సంబంధిత నేతల వైపు నుంచి వాస్తవాలు, పత్రాలు బయటకు రావాలి. సీఎంగా ఉన్నా.. మాజీ సీఎంగా ఉన్నా.. మంత్రిగా ఉన్నా.. ప్రతిపక్ష నేతగా ఉన్నా.. నాయకుడు ఎంత పెద్దవాడైనా ప్రజా జవాబుదారీతనానికి అతీతుడు కాదు. ఆ కోణంలోనే జన్వాడ నుంచి ఎర్రవెల్లి వరకు ప్రధానంగా పది అంశాల్లో స్పష్టత అవసరం.

1. ‘నాది కాదు.. లీజు’ అన్నారు.. పూర్తి లెక్కేది?

జన్వాడ ఆస్తి తనది కాదని, మిత్రుడి నుంచి లీజుకు తీసుకున్నానని కేటీఆర్‌ చెప్పారు. యాజమాన్యంపై తన వాదనను వెల్లడించారు. అయితే లీజు ఎప్పటి నుంచి? రాతపూర్వక ఒప్పందం ఉందా? ఎంతకాలానికి చేసుకున్నారు? ప్రస్తుతం కొనసాగుతోందా? లీజు పత్రం, కాలపరిమితి, ప్రస్తుత స్థితి బయటకు వస్తే ‘నాది కాదు.. లీజు’ అన్న వివరణకు పూర్తి స్పష్టత వస్తుంది. ఇప్పుడు ప్రజలకు తెలియాల్సింది అదే.

2. పురపాలక మంత్రిగా ఉన్నారు.. అనుమతుల పరిస్థితి ఏమిటి?

కేటీఆర్‌ గత ప్రభుత్వంలో పురపాలక శాఖ మంత్రిగా బాధ్యతలు నిర్వహించారు. ఆయన వినియోగించినట్లు చెబుతున్న నిర్మాణానికి అవసరమైన అనుమతులు ఉన్నాయా? ఆస్తిని లీజుకు తీసుకునే ముందు దాని చట్టపరమైన స్థితిని పరిశీలించారా? అప్పట్లో తనకు చూపించిన అనుమతి పత్రాలేమిటి? యజమాని మరొకరు కావచ్చు. నిర్మాణ బాధ్యత ఆయనదే కావచ్చు. కానీ సంబంధిత శాఖను నిర్వహించిన నేత వినియోగించిన ఆస్తి కావడంతో, అప్పటి అనుమతులేమిటో కేటీఆర్‌ వైపు నుంచి తేల్చిచెప్పడం ఈ వివాదంలో అవసరమైన స్పష్టత.

3. నాలా వివాదం.. రికార్డులు ఏం చెబుతున్నాయి?

జన్వాడలో బుల్కాపూర్‌ నాలా వివాదం కొత్తది కాదు. గతంలో అధికారుల పరిశీలనలు జరిగాయి. తాజాగా కాంగ్రెస్‌ నేతలు కూడా ఆక్రమణ ఆరోపణలు చేశారు. అయితే ఆరోపణ చేసినంత మాత్రాన ఆక్రమణ నిర్ధారణ కాదు. నిర్మాణం నాలా లేదా దాని పరిరక్షణ ప్రాంతంలో ఉందా? అధికారిక సర్వే మ్యాప్‌లు ఏం చెబుతున్నాయి? ఇక్కడ రాజకీయ వాదనలకంటే రికార్డులే కీలకం. ప్రభుత్వం తన ఆధారాలు చూపాలి. వాటికి భిన్నమైన పత్రాలు కేటీఆర్‌ వద్ద ఉంటే ప్రజల ముందుకు రావాలి. అప్పుడే నాలా వివాదంలో నిజానిజాలపై స్పష్టత వస్తుంది.

4. జీవో 111.. నిర్మాణం జరిగినప్పటి నిబంధనల సంగతేంటి?

జీవో 111ను తర్వాత బీఆర్‌ఎస్‌ ప్రభుత్వం రద్దు చేసింది. కానీ సంబంధిత నిర్మాణం జరిగిన సమయంలో అమల్లో ఉన్న నిబంధనలే ఇక్కడ ముఖ్యం. ఆ సమయంలో ఆ ప్రాంతం ఏ జోన్‌లో ఉంది? నిర్మాణ పరిమితులేమిటి? అవసరమైన అనుమతులు ఉన్నాయా? ఇప్పుడు జీవో 111 ఉందా లేదా అన్నది అసలు ప్రశ్న కాదు. నిర్మాణం జరిగినప్పుడు చట్టపరమైన స్థితి ఏమిటన్నదే కీలకం. ఆస్తిని లీజుకు తీసుకున్న సమయంలో తనకు తెలిసిన వివరాలను కేటీఆర్‌ వెల్లడిస్తే ఈ ప్రశ్నకు సమాధానం దొరుకుతుంది.

5. వివాదం తర్వాత కూడా లీజు కొనసాగిందా?

జన్వాడ వ్యవహారం ఏళ్లుగా బహిరంగ చర్చలో ఉంది. కేటీఆర్‌ కూడా గతంలో దీనిపై స్పందించారు. మరి వివాదం బయటకొచ్చిన తర్వాత లీజు కొనసాగిందా? ఆ ప్రాంగణాన్ని వినియోగించారా? లీజు ముగిసిపోయి ఉంటే ఎప్పుడు? ప్రస్తుతం ఆ ఆస్తితో సంబంధం ఉందా? ఇది యాజమాన్యంపై కొత్త ఆరోపణ కాదు. కేటీఆర్‌ స్వయంగా చెప్పిన లీజు సంబంధం ప్రస్తుతం ఏ స్థితిలో ఉందన్న అంశం. ఆ వివరాలు బయటకు వస్తే ఈ సందేహానికి అక్కడితో తెరపడుతుంది.

ఇక ఎర్రవెల్లి.. కేసీఆర్‌ నుంచి రావాల్సిన స్పష్టత

ముఖ్యమంత్రి రేవంత్‌రెడ్డి శాసనసభలో ఎర్రవెల్లి వ్యవసాయ క్షేత్రం చుట్టూ దాదాపు 700 ఎకరాలపై ఆరోపణలు చేశారు. అందులో ప్రభుత్వ భూమి ఉందని పేర్కొంటూ పరిశీలనకు ఆదేశించారు. ఇవి ప్రభుత్వ ఆరోపణలే తప్ప తుది నిర్ధారణలు కావు. అయితే వివాదం ఇంతదూరం వచ్చినప్పుడు కేసీఆర్‌ కుటుంబ భూముల వాస్తవ వివరాలు ప్రజలకు తెలియాల్సిన అవసరం ఉంది.

6. కేసీఆర్‌ కుటుంబానికి వాస్తవంగా ఎంత భూమి ఉంది?

700 ఎకరాల ప్రస్తావన ముఖ్యమంత్రి చేసిన ఆరోపణలో వచ్చిన సంఖ్య. అది నిజమా కాదా అన్నది రికార్డులు, ప్రభుత్వ పరిశీలనలో తేలాలి. అయితే ఎర్రవెల్లి, పరిసర ప్రాంతాల్లో కేసీఆర్‌, ఆయన కుటుంబ సభ్యులకు వాస్తవంగా ఎంత భూమి ఉంది? ఏయే సర్వే నంబర్లలో ఉంది? ప్రభుత్వం చెబుతున్న సంఖ్యకు ఎదురుగా కుటుంబానికి నిజంగా ఎంత భూమి ఉందన్న లెక్క ప్రజల ముందుకు వస్తేనే రెండు వాదనల మధ్య తేడా స్పష్టమవుతుంది. మాజీ ముఖ్యమంత్రి, ప్రస్తుత ప్రధాన ప్రతిపక్ష నేతగా కేసీఆర్‌ వైపు నుంచి ఆ వివరాలు రావడం ప్రజా జవాబుదారీతనంలో భాగమే.

7. ఆ భూములు ఎప్పుడు.. ఎలా వచ్చాయి?

రెవెన్యూ మంత్రి పొంగులేటి శ్రీనివాస్‌రెడ్డి మాజీ సీఎం కేసీఆర్ కు సంబంధించిన గత ఎన్నికల అఫిడవిట్లు, ప్రస్తుత భూములపై ప్రశ్నలు లేవనెత్తారు. అది మంత్రి చేస్తున్న ఆరోపణ మాత్రమే. అయితే భూములు ఎప్పుడు కొనుగోలు చేశారు? ఎవరి నుంచి వచ్చాయి? ఏ సర్వే నంబర్‌లో ఎంత ఉంది? రిజిస్ట్రేషన్‌, బదలాయింపు వివరాలేమిటి?

ఆరోపణ రాజకీయమని చెప్పడం ఒక సమాధానం. కానీ కొనుగోలు, రిజిస్ట్రేషన్‌ రికార్డులు బయటకు వస్తే అదే మరింత బలమైన సమాధానం అవుతుంది. భూముల యాజమాన్య చరిత్రపై కేసీఆర్‌ వైపు నుంచి వివరాలు వస్తే ఈ వివాదంలో మరో కీలక సందేహం తొలగుతుంది.

8. 700 ఎకరాల ప్రస్తావనలో కుటుంబానికి సంబంధమెంత?

ప్రభుత్వం ప్రస్తావిస్తున్న మొత్తం విస్తీర్ణంలో కేసీఆర్‌ కుటుంబానికి చట్టబద్ధంగా చెందిన భూమి ఎంత? మిగిలిన భూమితో సంబంధం ఏమిటి? వ్యవసాయ క్షేత్రం చుట్టూ ఉన్న భూములను కూడా కలిపి మొత్తం విస్తీర్ణాన్ని ప్రభుత్వం ప్రస్తావిస్తోందా? వ్యవసాయ క్షేత్రం చుట్టూ భూమి ఉండటం ఒకటి; ఆ భూమంతా కుటుంబానికి చెందడం మరోటి. ఈ రెండింటి మధ్య తేడాను కేసీఆర్‌ కుటుంబ భూముల అసలు లెక్క, ప్రభుత్వం వద్ద ఉన్న సర్వే నంబర్లే తేల్చాలి. అయితే తమ వద్ద ఉన్న పత్రాలతో ప్రజలకు కేసీఆర్ వివరణ ఇవ్వడం ప్రజాస్వామ్యంలో భాగమే. ప్రజా నాయకుల భాద్యతే.

9. భూ పరిమితి చట్టం ప్రకారం లెక్కేమిటి?

వ్యవసాయ భూముల పరిమితి కేవలం మొత్తం ఎకరాలతో తేలదు. భూమి రకం, కుటుంబ యూనిట్‌, వర్గీకరణను బట్టి లెక్క మారుతుంది. అందువల్ల కేసీఆర్‌ కుటుంబానికి ఏ రకం వ్యవసాయ భూమి ఎంత ఉంది? చట్టం ప్రకారం వర్తించే పరిమితి ఎంత? ప్రస్తుతం ఉన్న భూములు ఆ పరిమితిలోనే ఉన్నాయా? ఇక్కడ రాజకీయ వ్యాఖ్యలకంటే చట్టంలోని లెక్కే ముఖ్యం. ప్రభుత్వం ఉల్లంఘన అంటుంటే తన లెక్క చూపాలి. అది తప్పయితే కేసీఆర్‌ వైపు నుంచి సరైన లెక్క రావాలి. ప్రజలకు కావాల్సింది ఈ రెండు వాదనల్లో రికార్డులు ఏం చెబుతున్నాయన్న స్పష్టత.

10. న్యాయ విచారణకు సిద్ధమైతే.. వివరాలూ బయటకు రావాలి కదా?

కేసీఆర్‌, రేవంత్‌రెడ్డి కుటుంబాల ఆస్తులపై హైకోర్టు లేదా సుప్రీంకోర్టు సిట్టింగ్‌ జడ్జితో విచారణ జరిపించాలని కేటీఆర్‌ డిమాండ్‌ చేశారు. తప్పు తేలితే చట్టపరమైన పరిణామాలను ఎదుర్కొనేందుకు సిద్ధమని ప్రకటించారు.
న్యాయ విచారణ కోరడం బీఆర్‌ఎస్‌ వైఖరిని చెబుతుంది. కానీ విచారణ జరిగే వరకు ప్రజలకు ప్రాథమిక వివరాలు తెలియాల్సిన అవసరం లేదని దాని అర్థం కాదు. కేసీఆర్‌ కుటుంబానికి ఎంత భూమి ఉంది? ఎక్కడుంది? ఎలా వచ్చింది? అన్న వివరాలు పత్రాలతో బయటకు వస్తే బీఆర్‌ఎస్‌ వాదనకూ మరింత స్పష్టత వస్తుంది.

చివరకు.. ప్రజలకు కావాల్సింది జవాబే!

ఈ పది అంశాల్లో వివరణ రాకపోవడం వల్ల ప్రభుత్వ ఆరోపణలు నిజమైపోవు. ప్రభుత్వం ఆరోపించినంత మాత్రాన కేసీఆర్‌, కేటీఆర్‌ దోషులూ కారు. కానీ ప్రజాక్షేత్రంలోకి వచ్చిన ప్రశ్నలకు సమాధానాలు లేకపోతే సందేహాలు మాత్రం అలాగే మిగిలిపోతాయి. అందుకే ప్రమాణం రెండు వైపులకూ ఒకటే. ప్రభుత్వం ఆరోపిస్తే ఆధారాలు చూపాలి. బీఆర్‌ఎస్‌ అవి తప్పని చెబితే ఆ పార్టీ అధ్యక్షులు కేసీఆర్, వర్కింగ్ ప్రసిడెంట్ కేటీఆర్ తమ వద్ద ఉన్న పత్రాలతో వాస్తవాలు ప్రజల ముందుంచాలి. జన్వాడలో లీజు నుంచి అనుమతుల వరకు కేటీఆర్‌ వైపు నుంచి పూర్తి వివరాలు రావాలి. ఎర్రవెల్లిలో కుటుంబ భూముల అసలు లెక్కపై కేసీఆర్‌ వైపు నుంచి స్పష్టత రావాలి.

ఇది వ్యక్తిగత ఆస్తులపై తీర్పు కాదు. ప్రజాజీవితంలో ఉన్న నాయకులపై నిబంధనల ఉల్లంఘన ఆరోపణలు వచ్చినప్పుడు ప్రజలకు వాస్తవాలు తెలుసుకునే హక్కుకు సంబంధించిన విషయం. అధికారం మారవచ్చు.. కుర్చీ మారవచ్చు.. కానీ నాయకుడు ఎంత పెద్దవాడైనా ప్రజలకు జవాబు చెప్పాల్సిన బాధ్యత మాత్రం మారదు