Jagadeesh Reddy | డిమాండ్ బుక్‌, అవుట్ క‌మ్ బ‌డ్జెట్ బుక్‌పై ఇంత నిర్ల‌క్ష్య‌మా?: మాజీ మంత్రి జగ‌దీశ్‌రెడ్డి

త్రినేత్ర‌.న్యూస్‌: రాష్ట్రంలో కాంగ్రెస్‌ ప్ర‌భుత్వం న‌డుస్తుందో స‌ర్క‌స్ న‌డుస్తుందో తెలియ‌డం లేద‌ని మాజీ మంత్రి, ఎమ్మెల్యే జ‌గ‌దీశ్‌రెడ్డి (MLA Jagadeesh Reddy) ఎద్దేవా చేశారు. డిమాండ్ బుక్ (Demand book), అవుట్ కమ్ బడ్జెట్ బుక్ కాపీ పేస్ట్ (Copy, paste) చేశారని, ఇది ఆర్థిక మంత్రి అవ‌గాహనా రాహిత్యానికి నిదర్శ‌న‌మ‌న్నారు. డిమాండ్ బుక్స్‌లో అవుట్ కమ్ బడ్జెట్ ముద్రించ‌డం ఏంట‌ని ప్ర‌శ్నించారు. శ‌నివారం ఆయన మీడియాతో మాట్లాడారు.

అసెంబ్లీలో ప్ర‌వేశ‌పెట్టే బిల్లుపై నిర్ల‌క్ష్య‌మా?

డిమాండ్ బుక్‌లో అవుట్ క‌మ్ బ‌డ్జెట్ ముద్రించ‌డం చూస్తుంటే ఆర్థిక మంత్రి సొంత ఆర్థిక కార‌ణాల‌పై బిజీగా ఉన్న‌ట్లు అనిపిస్తుంద‌ని అన్నారు. ఇంత నిర్లక్ష్యంగా ఉంటే ఎలా అని ప్ర‌శ్నించారు. ఈ విష‌యంలో అధికారులు సైతం బాధ్యతా రహితంగా వ్యవహరించార‌ని మండిప‌డ్డారు. గతంలో సాధించిన ఫ‌లితాలు, ఈ ఏడాది గ్రాంట్స్ పై ప్రభుత్వానికి స్పష్టత లేదని అర్థ‌మ‌వుతుంద‌న్నారు. పవిత్రమైన అసెంబ్లీలో ప్రవేశ పెట్టే బిల్లులపై ఇంత నిర్లక్ష్యంగా ఉంటే ఎలా? అని ఫైర‌య్యారు.

పొర‌పాటు కాదు.. నేరం

ఇదే విష‌యంపై స‌భ‌లో మాట్లాడ‌తాన‌ని వెల్ల‌డించారు. ఇది పొర‌పాటు కాద‌ని.. క‌చ్చితంగా నేర‌మే అవుతుంద‌ని పేర్కొన్నారు. అవుట్ కమ్ బడ్జెట్, ఈ ఏడాది గ్రాంట్స్ బుక్ ఒకేలా ఉండడం ఆశ్చ‌ర్యం క‌లిగిస్తుంద‌ని చెప్పారు. అస‌లు కాంగ్రెస్ నాయ‌కులు ప్ర‌భుత్వం న‌డుపుతున్నారో, స‌ర్క‌స్ న‌డుపుతున్నారో తెలియ‌డం లేద‌న్నారు. తప్పును సరిదిద్దుకోని అధికారులపై చర్యలు తీసుకోవాలని జ‌గ‌దీశ్ రెడ్డి డిమాండ్ చేశారు.