High Court issues Notices | ఎమ్మెల్సీలు తాతా మధు, నవీన్‌రెడ్డికి హైకోర్టు నోటీసులు

High Court issues Notices | త్రినేత్ర‌.న్యూస్‌: అసెంబ్లీ స్పీకర్ గ‌డ్డం ప్ర‌సాద్‌కుమార్‌ను దూషించిన కేసులో కీల‌క ప‌రిణామం చోటుచేసుకుంది. ఎమ్మెల్సీలు తాతా మధు (Tata Madhu), నవీన్‌రెడ్డి (Naveen Reddy) కి తెలంగాణ హైకోర్టు సోమ‌వారం నోటీసులు జారీ చేసింది. వారిని అరెస్టు చేయొద్దని గతంలో నాంపల్లి కోర్టు ఇచ్చిన తీర్పును సవాల్‌ చేస్తూ పోలీసులు హైకోర్టును ఆశ్రయించగా ఈమేర‌కు నోటీసులిచ్చింది.

నాంప‌ల్లి కోర్టు రిమాండ్‌కు సైతం నిరాక‌రించ‌డంతో పోలీసులు హైకోర్టులో పిటిషన్ దాఖ‌లు చేశారు. నాంపల్లి కోర్టు ఇచ్చిన ఉత్తర్వులను కొట్టివేయాలని కోరారు. దీనిపై జరిగిన విచారణలో పబ్లిక్ ప్రాసిక్యూటర్ నాగేశ్వర రావు (PP Nageshwar Rao) తన వాదనలను బలంగా వినిపించారు. ఎమ్మెల్సీలు తాతా మధు, నవీన్ రెడ్డిలు స్పీకర్‌ను అసభ్య పదజాలంతో దూషించారని, రాజ్యాంగబద్ధ పదవిలో ఉన్న వ్యక్తి ప‌ట్ల అమ‌ర్యాద‌గా ప్ర‌వ‌ర్తించార‌ని కోర్టుకు తెలిపారు. విధుల్లో ఉన్న పోలీసు అధికారులపైనా వీరు దాడి చేశారని కోర్టు దృష్టికి తీసుకొచ్చారు.

ఇరు పక్షాల వాద‌న‌లు విన్న హైకోర్టు ధర్మాసనం ఈ కేసుకు సంబంధించి ఎమ్మెల్సీలు తాతా మధు, నవీన్ రెడ్డిలు కౌంటర్ దాఖలు చేయాలని సూచించింది. తదుపరి విచారణను ఎల్లుండికి వాయిదా వేసింది.