Heavy Rain | రెయిన్ అలర్ట్.. మ‌ధ్యాహ్నం త‌ర్వాత‌ ఈ జిల్లాల్లో భారీ వ‌ర్షం

Heavy Rain | త్రినేత్ర‌.న్యూస్‌: హైద‌రాబాద్‌లో మంగ‌ళ‌వారం భారీ వ‌ర్షం (Heavy Rain) బీభ‌త్సం సృష్టించిన విష‌యం తెలిసింది. ఉరుములు, మెరుపులు, ఈదురుగాలుల‌తో వ‌ర‌ణుడు విరుచుకుప‌డ్డాడు. కుండ‌పోత‌గా కురిసిన వాన‌తో న‌గ‌రంలోని ప‌లు ప్రాంతాల్లో రోడ్లు నీట‌మునిగాయి. దీంతో వాహ‌న‌దారులు న‌ర‌కం అనుభ‌వించారు. న‌గ‌రంతోపాటు న‌ల్ల‌గొండ‌, సూర్యాపేట‌, నిర్మ‌ల్ త‌దిత‌ర జిల్లాల్లో అక్క‌డ‌క్క‌డ వ‌ర్షాలు కురిశాయి.

బుధ‌వారం కూడా రాష్ట్రంలోని పలు జిల్లాలో భారీ వర్షాలు కురిసే అవకాశం ఉందని వాతావరణ శాఖ (IMD) వెల్ల‌డించింది. వికారాబాద్‌, మ‌హ‌బూబ్‌న‌గ‌ర్‌, నారాయ‌ణ‌పేట‌, జోగులాంబ జిల్లాల్లో భారీ వ‌ర్షాలు కురుస్తాయ‌ని తెలిపింది. అదేవిధంగా న‌ల్ల‌గండ‌, రంగారెడ్డి, నాగ‌ర్‌క‌ర్నూల్‌, యాదాద్రి, జ‌న‌గామ‌, ఖ‌మ్మం, మ‌హ‌బూబాబాద్‌, కొత్త‌గూడెం, హ‌నుమ‌కొండ‌, సిద్దిపేట‌, మెదక్, కామారెడ్డి జిల్లాల్లోనూ మ‌ధ్యాహ్నం నుంచి రాత్రి వ‌రకు భారీ వర్షాలు కురుస్తాయ‌ని వెల్ల‌డించింది. అదేసమయంలో సుమారు 40 నుంచి 50 కిలో మీటర్ల వేగంతో ఈదురుగాలులు కూడా వీచే అవకాశం ఉందని తెలిపింది.

ఇక మ‌ధ్యాహ్నం వ‌ర‌కు రాష్ట్ర‌వ్యాప్తంగా 41 నుంచి 43 డిగ్రీలు, హైద‌రాబాద్‌లో 37 నుంచి 40 డిగ్రీల ఉష్ణోగ్ర‌త‌లు న‌మోద‌య్యే అవ‌కాశం ఉంద‌ని వెల్ల‌డించింది. మ‌ధ్యాహ్నం త‌ర్వాత ఈదురుగాలుల‌తో కూడిన‌ వ‌ర్షం కురుస్తుంద‌ని పేర్కొంది.