Goru Chikkudu | 12 అడుగుల ఎత్తులో గోరు చిక్కుడు.. ఆశ్చ‌ర్యంగా తిల‌కిస్తున్న స్థానికులు

Goru Chikkudu | త్రినేత్ర‌.న్యూస్ : సాధార‌ణంగా కూర‌గాయ‌ల మొక్క‌లు రెండు నుంచి మూడు అడుగుల వ‌ర‌కు పెరుగుతాయి. కొన్ని మొక్క‌లైతే నాలుగు నుంచి ఐదు అడుగుల వ‌ర‌కు కూడా పెరుగుతాయి. అలాంటి వాటిలో గోరు చిక్కుడు మొక్క ఒక‌టి. కానీ ఈ గోరు చిక్కుడు మొక్క మాత్రం ఎవ‌రూ ఊహించ‌ని విధంగా ఏకంగా 12 అడుగుల ఎత్తుకు పెరిగి అంద‌ర్నీ ఆశ్చ‌ర్యప‌రిచింది. మ‌రి ఈ మొక్క ఎక్క‌డ పెరిగిందంటే..?

ఖ‌మ్మం జిల్లా ముదిగొండ మండ‌లం వెంక‌టాపురానికి చెందిన రైతు రాయ‌ల వెంక‌టేశ్వ‌ర్లు.. త‌న ఇంటి ఆవ‌ర‌ణ‌లో కూర‌గాయ‌ల మొక్క‌లు పెంచుకుంటున్నాడు. ఈ క్ర‌మంలోనే మూడు నెల‌ల క్రితం గోరు చిక్కుడు విత్త‌నాలు నాట‌గా అవి మొల‌కెత్తాయి. మొత్తం 15 మొక్క‌లు మొల‌కెత్త‌గా.. ఇందులో ఒక మొక్క మాత్రం 12 అడుగుల ఎత్తు వ‌ర‌కు పెరిగింది. ఈ మొక్క నుంచి ఇప్ప‌టికీ మూడు సార్లు గోరు చిక్కుడు కాయ‌లు కోశాడు రైతు. ఈ మొక్క‌ను స్థానికులు ఆశ్చ‌ర్యంగా తిల‌కిస్తున్నారు.

ఈ గోరు చిక్కుడు మొక్క భారీ పెరుగుద‌ల‌పై మ‌ధిర వ్య‌వ‌సాయ ప‌రిశోధ‌న కేంద్రం సైంటిస్ట్ డాక్ట‌ర్ రుక్మిణీదేవిని రైతు సంప్ర‌దించ‌గా.. మొక్క పెరుగుద‌ల‌కు సార‌వంత‌మైన నేల‌నే కార‌ణ‌మ‌ని తెలిపారు. ఎరువులు కూడా స‌కాలంలో వేయ‌డంతో మొక్క‌లు ఇలా ఎత్తు పెరుగుతాయ‌ని పేర్కొన్నారు.