Gas e-KYC | ముంచుకొస్తున్న గ‌డువు.. గ్యాస్ ఈ-కేవైసీ పూర్తిచేశారా?.. లేదంటే స‌బ్సిడీ క‌ట్‌

Gas e-KYC | త్రినేత్ర‌.న్యూస్‌: మీరు వంట‌ గ్యాస్ క‌నెక్ష‌న్‌ ఈ-కేవైసీ (Gas e-KYC) పూర్తిచేశారా?, ఇంకా చేయ‌క‌పోతే త్వ‌ర‌ప‌డండి. గ‌డువు ముంచుకొస్తున్న‌ది. మ‌రో 12 రోజులే ఇంకా స‌మ‌యం ఉంది. జూన్ 30తో గ‌డువు ముగియనుంది. ఈ-కేవైసీ పూర్తి చేయ‌నివారికి జూలై 1వ తేదీ నుంచి గ్యాస్ స‌బ్సిడీని (Gas Subsidy) కేంద్రం నిలిపివేయ‌నుంది. స‌బ్సిడీకే కాదు, గ్యాస్ బుక్ చేయాల‌న్నా ఈ-కేవైసీ త‌ప్ప‌నిస‌రి అని ప్ర‌భుత్వం ప్ర‌క‌టించింది. అందుకే మ‌రింత ఆల‌స్యం చేయ‌కుండా కేవైసీ పూర్తిచేయండి. గ్యాస్ ఏజెన్సీ కార్యాల‌యంలోనే కాదు.. ద‌గ్గ‌ర్లోని మీ సేవా కేంద్రం, ఇంట్లోనే ఆన్ ద్వారా కూడా ఈ-కేవైసీ పూర్తి చేయ‌వ‌చ్చు.

ఏడాదిగా సాగుతున్న ఈ ప్ర‌క్రియ ఈ నెలాఖ‌రుతో ముగిసిపోనుంది. అక్రమ గ్యాస్‌ కనెక్షన్లను అడ్డుకట్ట వేయడంతో పాటు రాయితీ దుర్వినియోగం కాకుండా చేసేందుకు ప్రభుత్వం ఈ ప్రక్రియను చేప‌ట్టింది. గ్యాస్‌ కనెక్షన్లను ఆధార్‌తో అనుసంధానం చేయడంతో పాటు ముఖ గుర్తింపు, వేలిముద్రలు లేదా ఐరిస్‌ మూడు విధానాలతో ఎల్‌పీజీ వినియోగదారుల ఈ-కేవైసీని పూర్తి చేయనున్నారు.

మ‌రోవైపు ఈ-కేవైసీ పూర్తి చేయని వినియోగదారులు గ్యాస్‌ సిలిండర్‌ బుకింగ్‌లను నిలిపివేయ‌కూడ‌ద‌ని పౌరసరఫరాలశాఖ స్పష్టం చేసింది. కొన్ని ఏజెన్సీలు ఈ-కేవైసీ పూర్తికాలేదని సిలిండర్లను బుక్‌ చేయడానికి అనుమతించడం లేదని, ఇది సరికాదని వెల్ల‌డించింది.

కేవైసీ ఇలా..

• ముందుగా గూగుల్​లో www.mylpg.in అని టైప్ చేయాలి. అనంత‌రం ఎల్‌పీజీ గ్యాస్ అధికారిక వెబ్‌సైట్ క్లిక్ చేయాలి. ఆ తర్వాత ఐడీ అడుగుతుంది. కుడివైపు పైన భారత్ గ్యాస్, హెచ్‌పీ గ్యాస్, ఇండేన్ కంపెనీలకు సంబంధించిన సిలిండర్ చిత్రాలు కనిపిస్తాయి. అందులో మీరు ఏ కంపెనీ గ్యాస్ వాడుతున్నారో ఆ సిలిండర్​పైన క్లిక్ చేయాలి.
• అనంత‌రం కొత్త పేజ్ ఓపెన్ అవుతుంది. కుడివైపు పైన Sign In, New User ఆప్షన్స్ ఉంటాయి.
  ఒకవేళ మీరు ఇప్పటికే రిజిస్టర్ చేసుకుంటే ఫోన్ నంబర్‌తో సైన్ ఇన్ చేసుకోవచ్చు. లేదా New User అనే ఆప్షన్ క్లిక్ చేయాలి.
• న్యూ యూజ‌ర్ పేజ్‌లోకి వెళ్లిన తర్వాత గ్యాస్ కన్య్జూమర్ నంబర్ సహా పూర్తి వివరాలు నమోదుచేయాలి.
  గ్యాస్ కనెక్షన్ ఐడీ నంబర్​తో లాగిన్ అయిన త‌ర్వాత.. స్క్రీన్​పై మీ గ్యాస్ కనెక్షన్‌కు సంబంధించిన వివరాలు క‌నిపిస్తాయి.
• అనంత‌రం ఎడమ వైపు కనిపించే 'ఆధార్ అథెంటికేషన్' ఆప్షన్ ఎంచుకుని గ్యాస్ కనెక్షన్ ఎవరి పేరుతో ఉందో వారి ఆధార్ నంబర్ నమోదు చేసి గెట్ ఓటీపీపై క్లిక్ చేయాలి. ఆధార్​తో లింక్ చేసిన రిజిస్టర్డ్ మొబైల్ నంబర్‌కు ఓటీపీ వస్తుంది. ఈ ఓటీపీని అక్కడ నమోదు చేసి అథెంటికేషన్ ఆప్షన్ పై క్లిక్ చేయాలి.
• ఆ తర్వాత మీకు అథెంటికేషన్ పూర్తయినట్లు సక్సెస్​ఫుల్ అనే మెసేజ్ వస్తుంది.