Gas Cylinder | ఉన్న‌ది 60 సిలిండ‌ర్లు.. వ‌చ్చిందేమో 200 మంది.. చివ‌రికి పోలీసుల జోక్యంతో..

Gas Cylinder | త్రినేత్ర‌.న్యూస్‌: ఇరాన్‌, అమెరికా యుద్ధంతో దేశంలో గ్యాస్ కొర‌త (Gas) నెల‌కొన్న‌ది. డిమాండ్‌కు స‌రిప‌డిన‌ట్లుగా పంపిణీ సంస్థ‌లు గ్యాస్ సిలిండ‌ర్ల‌ను (Gas Cylinder) స‌ర‌ఫ‌రా చేయ‌లేక‌పోతున్నాయి. దీంతో వాణిజ్య సిలిండ‌ర్ల‌పై ఆంక్ష‌లు విధించిన కేంద్ర ప్ర‌భుత్వం, గృహావ‌స‌రాల‌కు వినియోగించే సిలిండ‌ర్ల బుకింగ్‌, పంపిణీ గ‌డువును పెంచింది. దీంతో సిలిండ‌ర్ బుకింగ్‌, డెలివ‌రీకి మ‌ధ్య 45 రోజుల‌కుపైగా స‌మ‌యం ప‌డుతున్న‌ది. సింగిల్ సిలిండ‌ర్ ఉన్న వినియోగ‌దారులు తీవ్ర అవ‌స్థ‌లు ప‌డుతున్నారు. ఈ క్ర‌మంలో ప‌లుచోట్ల పోలీసుల ప‌హారాలో గ్యాస్ సిలిండ‌ర్ల‌ను పంపిణీ చేస్తున్నారు.

ఖమ్మం జిల్లా నేలకొండపల్లిలోని గ్యాస్ ఏజెన్సీకి మంగళవారం 60 సిలిండర్లు వచ్చాయి. బుకింగ్‌ చేసుకున్న వారికి ఈ విష‌యం తెలియ‌డంతో ఏజెన్సీకి దాదాపు 200 మంది వ‌చ్చారు. అవి అందరికీ అందే పరిస్థితి లేకపోవ‌డంతోపాటు, ఎండ గంట‌ల త‌ర‌బ‌డి వేచిఉండ‌టంతో స‌హ‌నం కోల్పోయిన‌ వినియోగ‌దారులు కార్యాలయంలోకి చొరబడ్డారు. దీంతో అక్క‌డ‌ గందరగోళం ఏర్ప‌డింది. ప‌రిస్థితి చేయిదాటిపోతుండ‌టంతో పోలీసులు అక్క‌డి చేరుకున్నారు.

రోజుల తరబడి సిలిండర్ల కోసం చూస్తున్నామ‌ని, ఇంకెన్ని రోజులు ఏజెన్సీ చుట్టు తిరగాలని పోలీసులతో వాగ్వాదానికి దిగారు. దీంతో వ‌చ్చిన వారంద‌రి వ‌ద్ద గ్యాస్ పుస్తకాలు తీసుకున్న పోలీసులు బుకింగ్‌ ఆధారంగా 60మందికి సిలిండర్లు సరఫరా చేయించారు. దీంతో మిగిలిన‌వారు నిరాశ‌గా వెనుతిరిగారు.