Prof Nageshwar | అరెస్టుల‌కు భ‌య‌ప‌డే ప్ర‌స‌క్తే లేదు : మాజీ ఎమ్మెల్సీ నాగేశ్వ‌ర్

Prof Nageshwar | త్రినేత్ర‌.న్యూస్ : తాను ఎక్క‌డా కూడా కులం ప్ర‌స్తావ‌న తేలేద‌ని, అరెస్టుల‌కు భ‌య‌ప‌డే ప్ర‌స‌క్తే లేదు అని మాజీ ఎమ్మెల్సీ ప్రొఫెస‌ర్ నాగేశ్వ‌ర్ తేల్చిచెప్పారు. సోమాజిగూడ ప్రెస్‌క్ల‌బ్‌లో ఏర్పాటు చేసిన స‌మావేశంలో ప్రొఫెస‌ర్ నాగేశ్వ‌ర్ మాట్లాడారు.

30 ఏళ్ల వయస్సులోనే భయపడలేదు.. 62 ఏళ్ల వయస్సులో అరెస్ట్‌లకు భయపడుతానా? భ‌య‌ప‌డే ప్ర‌స‌క్తే లేదు. మీకు నిజాలు కూడా చెప్పాలి. కొంత‌మంది మీడియా వ్య‌క్తులు మిస్ లీడ్ చేసిన‌ట్టు ఉన్నారు. న‌న్ను అరెస్టు చేసేందుకు ఇప్ప‌టి వ‌ర‌కు ఎవ‌రూ రాలేదు. రార‌ని నేను చెప్ప‌ను.. కానీ ఇప్ప‌టి వ‌ర‌కు రాలేదు. హైద‌రాబాద్‌కు వ‌చ్చారేమో కానీ మా ఇంటికి రాలేదు. ప్రొటెక్ష‌న్ కోసం తెలంగాణ పోలీసులు వ‌స్తే.. ఆంధ్రా పోలీసుల‌ని చెప్పి మీడియాలో రాశారు. ఆ వీడియోలో ఉన్న వ్య‌క్తి టోలీచౌకీ సీఐ అని నాగేశ్వ‌ర్ తెలిపారు.

ప్ర‌భుత్వ‌మే నేరుగా కేసులు పెట్టింది. కులం, ప్రాంతాల మధ్య చిచ్చు, గొడవలు రేపుతున్నానని నా మీద కేసులు పెట్టారు. కానీ నా మాటల్లో ఎక్క‌డా కూడా కులం ప్రస్తావ‌న లేదు. వాళ్లే కులం, ప్రాంతం గురించి మాట్లాడారు తప్ప.. నా నుంచి ఆ మాటలే రాలేదు. తెలంగాణ వాడివి.. ఏపీ రాజ‌కీయాల గురించి ఎట్ల మాట్లాడుతావు అని ఆ రెండు పార్టీలే అన్నాయి. ఇరాన్‌పై మాట్లాడుతున్నాను.. ఇరాన్ ఓట‌రునా నేను. ఇదెక్క‌డి సిద్ధాంతం. మీర‌యితే ఇక్క‌డ ఇండ్లు, ఆస్తులు క‌లిగి ఉంటారు. తెలంగాణ‌లో పుట్టాను క‌నుక‌.. తెలంగాణ గురించి మాట్లాడొద్దు అంటే ఎట్ల‌..? కులం, ప్రాంతం తీసింది మీరు. మ‌ళ్లీ మ‌మ్మ‌ల్ని కులం ప్రాంతం తీశార‌ని అంటున్నారు. ఎంత ఆశ్చ‌ర్య‌మో చూడండి. కులం చిచ్చు పెట్టాడ‌ని కేసు పెట్టారు. నేను కులం ప్ర‌స్తావ‌నే తీయ‌లేదు. అల్లర్లు రేపుతున్నానని కేసు పెట్టారు.. నా వల్ల రెండు ఈగలు కూడా గొడవపడలేదు అని ప్రొఫెసర్ నాగేశ్వర్ పేర్కొన్నారు.