Vemulawada Graveyard Shelter | కొడుకు వైద్యం కోసం రూ.10 లక్షల అప్పు.. చివరికి బతకడానికి శ్మశానమే దిక్కు

Vemulawada Graveyard Shelter | త్రినేత్ర న్యూస్ : అనారోగ్యం ఆ కుటుంబాన్ని ఆర్థికంగా కోలుకోలేని దెబ్బ తీసింది. ప్రాణంగా చూసుకునే కొడుకును బతికించుకునేందుకు ఆ తల్లి చేయని ప్రయత్నం లేదు.. చేయని అప్పు లేదు. కానీ చివరికి మిగిలిన అప్పుల భారం వారి నెత్తిన పిడుగులా పడింది. చివరికి తలదాచుకునేందుకు గూడు కూడా లేక, శ్మశానవాటికనే తమ ఇల్లుగా మార్చుకుని జీవనం సాగిస్తున్న హృదయ విదారక ఘటన రాజన్న సిరిసిల్ల జిల్లాలో వెలుగుచూసింది.

వైద్యం కోసం రూ.10 లక్షల అప్పు

రాజన్న సిరిసిల్ల జిల్లా చందుర్తి మండలం కిష్టంపేటకు చెందిన అమృత అనే మహిళ తన కుమారుడు రాకేష్‌తో కలిసి గత ఐదేళ్లుగా వేములవాడలో నివాసం ఉంటున్నారు. అయితే కుమారుడు తీవ్ర అనారోగ్యానికి గురికావడంతో అతడికి నయం చేసేందుకు ఆమె శాయశక్తులా ప్రయత్నించారు. ఆస్పత్రుల చుట్టూ తిరుగుతూ వైద్య ఖర్చుల కోసమే దాదాపు రూ.10 లక్షల వరకు అప్పులు చేయాల్సి వచ్చింది.

శ్మశానమే ఆవాసమైన వేళ

ఒకవైపు కొడుకు అనారోగ్యం, మరోవైపు పెరిగిపోయిన వడ్డీల భారం ఆమెను ఉక్కిరిబిక్కిరి చేశాయి. చివరకు ఉన్న ఊరిలో అద్దె ఇల్లు తీసుకుని కిరాయి కట్టే పరిస్థితి కూడా లేకుండా పోయింది. చేతిలో చిల్లిగవ్వ లేక, నిలువ నీడ దొరక్క బతుకుదెరువు కోసం దిక్కుతోచని స్థితిలో పడిపోయారు. వేరే దారి లేక, కన్న కొడుకుతో కలిసి స్థానిక శ్మశానవాటికలోనే ఆశ్రయం పొందాల్సిన దుస్థితి ఏర్పడింది.

కలచివేస్తున్న దీనగాథ

మనిషి చనిపోయాక చేరే శ్మశానాన్ని.. బతికుండగానే ఆవాసంగా మార్చుకుని ఆ తల్లి కొడుకులు వెళ్లదీస్తున్న బతుకు చిత్రం చూసిన ప్రతి ఒక్కరి కంటతడి పెట్టిస్తోంది. అప్పుల ఊబిలో కూరుకుపోయి, బతుకు భారమై శ్మశానంలో తలదాచుకుంటున్న ఈ అభాగ్యులను ప్రభుత్వం, దాతలు మానవతా దృక్పథంతో ఆదుకోవాలని స్థానికులు కోరుతున్నారు.