Devireddy Sudheer Reddy | నల్లాల్లో నీళ్లు బంద్.. 2.35 లక్షల ట్యాంకర్లే సర్కార్ ఘనతా?

• కాళేశ్వరం, సుంకిశాలపై రేవంత్ సర్కార్‌ను కడిగిపారేసిన ఎమ్మెల్యే సుధీర్ రెడ్డి

Devireddy Sudheer Reddy | త్రినేత్ర న్యూస్ : రాష్ట్ర రాజధాని హైదరాబాద్‌లో కాంగ్రెస్ ప్రభుత్వం కృత్రిమ కరువు సృష్టించి ప్రజలను తీవ్ర ఇబ్బందులకు గురిచేస్తోందని బీఆర్‌ఎస్ ఎల్బీనగర్ ఎమ్మెల్యే దేవిరెడ్డి సుధీర్ రెడ్డి తీవ్రస్థాయిలో ధ్వజమెత్తారు. తెలంగాణ భవన్‌లో ఏర్పాటు చేసిన మీడియా సమావేశంలో ఆయన మాట్లాడుతూ.. నగరంలో తాగునీటి సరఫరా వ్యవస్థ పూర్తిగా కుప్పకూలిందని, ప్రజలకు నల్లాల ద్వారా నీరు అందించలేక ప్రైవేట్ ట్యాంకర్లపై నెట్టేస్తున్నారని ఘాటుగా విమర్శించారు.

ట్యాంకర్లు పెరిగితే ఘనత కాదు.. అదొక వైఫల్యం

గత సంవత్సరం నవంబర్ నాటికి నగరంలో 80,000 వాటర్ ట్యాంకర్లు అవసరం పడగా, ఈ ఏడాది అదే సమయానికి ఆ సంఖ్య ఏకంగా 2,35,000 ట్యాంకర్లకు చేరిందని సుధీర్ రెడ్డి గణాంకాలతో సహా బయటపెట్టారు. "ప్రజలకు పైపులైన్ల ద్వారా సరిపడా నీళ్లివ్వలేనప్పుడు మాత్రమే ట్యాంకర్లు వాడతారు. లక్షలాది ట్యాంకర్లు తిప్పామని జలమండలి అధికారులు గొప్పగా ప్రచారం చేసుకోవడం సిగ్గుచేటు. ఇది ప్రభుత్వ పరిపాలనా వైఫల్యాన్ని స్వయంగా ఒప్పుకోవడమే" అని ఆయన నిలదీశారు.

రాజకీయ కక్షతోనే ప్రాజెక్టులు బంద్

బ్యారేజీలతో సంబంధం లేకుండా ఏపీలో పట్టిసీమ, పురుషోత్తపట్నం.. ఇక్కడ సీతారామ, దేవాదుల పంపులు నడుస్తున్న విషయాన్ని గుర్తుచేసిన సుధీర్ రెడ్డి.. మేడిగడ్డ వద్ద కూడా పంపుల ద్వారా నీటిని ఎత్తిపోసే అవకాశం ఉన్నా ప్రభుత్వం కావాలనే పక్కనపెట్టిందని ఆరోపించారు. కేసీఆర్‌పై ఉన్న ఈర్ష్య, ద్వేషంతోనే కాళేశ్వరం పంపులు ఆన్ చేయకుండా రాష్ట్రాన్ని ఎండబెడుతున్నారని మండిపడ్డారు. ఇప్పుడు మంత్రులే వెనక్కి తగ్గి ప్రాజెక్టు రిపేర్లకు సిద్ధమవుతున్నారని, ప్రభుత్వం తీసుకున్న తప్పుడు నిర్ణయాలు ప్రజల ముందు బట్టబయలయ్యాయని పేర్కొన్నారు.

ముంచుకొస్తున్న తాగునీటి ముప్పు: డెడ్ స్టోరేజ్ చేరితే పరిస్థితేంటి?

రాబోయే వేసవిలో నగరానికి తాగునీటి ఎద్దడి మరింత తీవ్రమయ్యే ప్రమాదం ఉందని ఆయన ఆందోళన వ్యక్తం చేశారు. కృష్ణా నదిలో 300 టీఎంసీల పూర్తి సామర్థ్యానికి గాను ప్రస్తుతం కేవలం 180 టీఎంసీల మేరకే లభ్యత ఉందని, ఇందులో 112 టీఎంసీలు డెడ్ స్టోరేజ్ అని స్పష్టం చేశారు. నీటిమట్టం ఒక్కసారి డెడ్ స్టోరేజ్ స్థాయికి పడిపోతే పంపులు నడవక హైదరాబాద్‌కు నీటి సరఫరా పూర్తిగా నిలిచిపోయే ప్రమాదం ఉందని హెచ్చరించారు.

సుంకిశాల నిర్లక్ష్యంపై నిలదీత

నగర తాగునీటి అవసరాల కోసం గత బీఆర్‌ఎస్ ప్రభుత్వం రూ.2,200 కోట్లతో పటిష్టంగా నిర్మించిన సుంకిశాల ప్రాజెక్టు వద్ద గత ఆగస్టులో రిటైనింగ్ వాల్ కూలిపోతే.. ఇప్పటివరకు మరమ్మతులు చేయించకపోవడం ప్రభుత్వ ఉద్దేశపూర్వక కుట్ర అని సుధీర్ రెడ్డి ఆరోపించారు. ఆ నెపాన్ని కూడా కేసీఆర్‌పై నెట్టి రాజకీయ లబ్ధి పొందాలనే దురుద్దేశంతోనే ప్రాజెక్టులను గాలికొదిలేసి ప్రజల గొంతులు ఎండబెడుతున్నారని, ప్రజలు ఈ దుర్మార్గాన్ని గమనిస్తున్నారని ఆయన హెచ్చరించారు.

కాంగ్రెస్ తెచ్చిన కరువుతో హైదరాబాద్ ప్రజలు అష్టకష్టాలు పడుతుండ్రు.

గతేడాది అక్టోబర్‌లో 80,000 ట్యాంకర్లు వాడితే, ఈ ఏడాది అక్టోబర్‌ నాటికి ఆ సంఖ్య ఏకంగా 2.35 లక్షలకు చేరింది.

ప్రజలకు నీళ్లివ్వలేక 2 లక్షల ట్యాంకర్లు సరఫరా చేశామని సిగ్గులేకుండా గొప్పలు చెప్పుకుంటూ కాంగ్రెస్ తన వైఫల్యాన్ని తానే ఒప్పుకుంది.

కేసీఆర్ గారిని బద్నాం చేయాలనే ఈర్ష్య, ద్వేషం, కుట్రతో కాళేశ్వరం పంపులు ఆన్ చేయకుండా.. రేవంత్ రాష్ట్రాన్ని ఎండబెట్టిండు.

- ఎమ్మెల్యే @D_SudheerReddy

— BRS Party (@BRSparty) November 6, 2026