Chirumarthi Lingaiah | సాగర్ ఎక్కడ.. కుప్పం ఎక్కడ? 72 టీఎంసీల నీళ్లు పోతుంటే ఏం చేస్తున్నారు?

• రేవంత్ సర్కార్‌పై చిరుమర్తి లింగయ్య నిప్పులు

Chirumarthi Lingaiah | త్రినేత్ర న్యూస్ : రాష్ట్ర ప్రయోజనాలను గాలికొదిలేసి కాంగ్రెస్ ప్రభుత్వం కేవలం రాజకీయ కక్షసాధింపులకే పరిమితమైందని బీఆర్‌ఎస్ సీనియర్ నేత, మాజీ ఎమ్మెల్యే చిరుమర్తి లింగయ్య తీవ్రస్థాయిలో మండిపడ్డారు. తెలంగాణ భవన్‌లో ఏర్పాటు చేసిన మీడియా సమావేశంలో ఆయన మాట్లాడుతూ.. తెలంగాణ నీటి వాటాను కాపాడటంలో మంత్రులు ఘోరంగా విఫలమయ్యారని, రాష్ట్రంలో రైతులు పంటలు ఎండిపోయి అల్లాడుతుంటే ప్రభుత్వం ఢిల్లీకి మూటలు మోయడంలో బిజీగా ఉందని ధ్వజమెత్తారు.

సాగర్ నీళ్లు ఏపీ పరం.. తెలంగాణ రైతులపై పిడుగు

"నాగార్జున సాగర్ ఎక్కడుంది.. చిత్తూరు జిల్లా కుప్పం ఎక్కడుంది? ఏకంగా 72 టీఎంసీల కృష్ణా జలాలను చంద్రబాబు తరలించుకుపోతుంటే మన మంత్రులు ఏం చేస్తున్నారు?" అని లింగయ్య నిలదీశారు. నీటి వినియోగం, పంపిణీపై పర్యవేక్షణ లేకపోవడం వల్లే నీటిపారుదల శాఖ మంత్రులైన ఉత్తమ్ కుమార్ రెడ్డి, తుమ్మల నాగేశ్వరరావు, పొంగులేటి శ్రీనివాస్ రెడ్డి వైఫల్యాలు బయటపడుతున్నాయన్నారు. ఈ నిర్లక్ష్యం కారణంగా ఒక్క నల్గొండ జిల్లాలోనే 20 వేల ఎకరాల్లో పంటలు ఎండిపోయి తీవ్ర నష్టం వాటిల్లిందని, పంటలు దక్కక రైతులు ఆత్మహత్యలకు పాల్పడే దుస్థితి దాపురించిందని ఆవేదన వ్యక్తం చేశారు.

‘రేవంత్ రెడ్డి బుక్’ రాజకీయం

పాలనపై దృష్టి పెట్టాల్సిన సీఎం రేవంత్ రెడ్డి.. నిత్యం కేసీఆర్, కేటీఆర్, హరీశ్ రావులను తిట్టడమే ఏకైక అజెండాగా పెట్టుకున్నారని విమర్శించారు. "ఆంధ్రప్రదేశ్‌లో రెడ్ బుక్ రాజకీయం నడుస్తుంటే, తెలంగాణలో ‘రేవంత్ రెడ్డి బుక్’ పేరుతో బెదిరింపులకు పాల్పడుతున్నారు. సిరిసిల్ల, సిద్దిపేటలను టార్గెట్ చేసి వేధించినా బీఆర్‌ఎస్‌ను ఎవరూ ఏమీ చేయలేరు. సొంత నియోజకవర్గం కొడంగల్‌లోనే ప్రజలకు మంచినీళ్లు ఇవ్వలేని ముఖ్యమంత్రి.. రాష్ట్రమంతా కత్తెర జేబులో పెట్టుకుని పాత ప్రాజెక్టులకు రిబ్బన్లు కట్ చేయడం అలవాటుగా మార్చుకున్నారు" అని ఎద్దేవా చేశారు.

ఇందిరమ్మ ఇళ్ల బిల్లులు ఏవి?

ప్రజల దృష్టిని మళ్లించేందుకు ప్రభుత్వం డ్రామాలు ఆడుతోందని లింగయ్య ఆరోపించారు. రాష్ట్రవ్యాప్తంగా ఇందిరమ్మ ఇళ్లకు సరైన బిల్లులు రాక పేదలు అప్పులపాలవుతుంటే.. దీపావళికి ఇందిరమ్మ ఇళ్ల సంబరాలు ఎందుకు చేసుకుంటున్నారని నిలదీశారు. కాంగ్రెస్ ఎన్ని కుతంత్రాలు చేసినా ప్రజలు వాస్తవాలను గమనిస్తున్నారని, రాష్ట్రంలో ఎప్పుడు ఏ ఎన్నికలు జరిగినా బీఆర్‌ఎస్ ఘనవిజయం సాధించడం ఖాయమని ఆయన స్పష్టం చేశారు.