Ranveer Singh | సినిమా షూటింగ్ కోసం క్రికెట్ మ్యాచ్‌లు వాయిదా – వివాదంలో ర‌ణ‌వీర్‌సింగ్ “ప్ర‌ళ‌య్‌”

Ranveer Singh |ధురంధ‌ర్‌, ధురంధ‌ర్ 2 బ్లాక్‌బ‌స్ట‌ర్స్ త‌ర్వాత ర‌ణ‌వీర్‌సింగ్ హీరోగా న‌టిస్తోన్న ప్ర‌ళ‌య్ మూవీ వివాదంలో చిక్కుకుంది. ఈ సినిమాపై ముంబై క్రికెట్ అసోషియేష‌న్ ఆగ్ర‌హం వ్య‌క్తం చేస్తోంది. ప్ర‌స్తుతం ప్ర‌ళ‌య్ షూటింగ్ ముంబైలో జ‌రుగుతోంది. ఆజాద్ స్టేడియంలో ర‌ణ‌వీర్‌సింగ్‌తో పాటు ప్ర‌ధాన తారాగ‌ణంపై కీల‌క స‌న్నివేశాల‌ను చిత్రీక‌రిస్తున్నారు.

తొలి సినిమా...

ఆజాద్ స్టేడియంలో షూటింగ్‌ను జ‌రుపుకుంటున్న తొలి సినిమా ప్ర‌ళ‌య్ కావ‌డం గ‌మ‌నార్హం. ఈ మైదానంలో బాలీవుడ్ మూవీ చిత్రీక‌ర‌ణను జ‌రుపుకునేందుకు మ‌హారాష్ట్ర స్పోర్ట్స్ డిపార్ట్‌మెంట్ అధికారులు అనుమ‌తులు ఇచ్చారు.

మ్యాచ్‌లు ర‌ద్దు...

అయితే ప్ర‌ళ‌య్ షూటింగ్ కార‌ణంగా ఈ స్టేడియంలో జ‌ర‌గాల్సిన అండ‌ర్ 14, అండ‌ర్ 16 మ్యాచ్‌లు ర‌ద్ద‌య్యాయి. క్రికెట్ మ్యాచ్‌ల‌ను వాయిదావేసి స్టేడియాన్ని ప్ర‌ళ‌య్ షూటింగ్ కోసం అద్దెకు ఇవ్వ‌డంపై ముంబై క్రికెట్ అసోసియేష‌న్ ఆగ్ర‌హం వ్య‌క్తం చేస్తోంది. ఎప్పుడో షెడ్యూల్ ఫిక్స‌యిన మ్యాచ్‌ల‌ను కాద‌ని, షూటింగ్‌ల‌కు స్టేడియాన్ని ఎలా ఇస్తారంటూ విమ‌ర్శ‌లు గుప్పిస్తున్నారు.

అధికారుల ఫిర్యాదు...

సెట్లు వేయ‌డం, క‌మ‌ర్షియ‌ల్ అవ‌స‌రాల‌కు వాడ‌టం వ‌ల్ల స్టేడియం క్రికెట్‌కు ప‌నికిరాకుండా పోతుంద‌ని ముంబై క్రికెట్ అసోసియేష‌న్ స‌భ్యులు పేర్కొన్నారు. క్రీడాకారుల‌ను ప్రోత్స‌హించేందుకు స్టేడియాలు ఉన్నాయ‌ని, సినిమాల కోసం కాదంటూ విమ‌ర్శ‌లు గుప్పించారు. ప్ర‌ళ‌య్ టీమ్‌తో పాటు స్టేడియం అధికారుల‌పై డిప్యూటీ స్పోర్ట్స్ డైరెక్ట‌ర్‌కు ఎమ్‌సీఏ అధికారులు ఫిర్యాదు చేశారు. మ‌రోవైపు ఈ వివాదంపై ప్ర‌ళ‌య్ టీమ్ స్పందించింది. అన్ని అనుమ‌తులు తీసుకొనే తాము షూటింగ్ చేస్తోన్న‌ట్లు చెప్పారు.

జాంబీ థ్రిల్ల‌ర్‌...

జాంబీ థ్రిల్ల‌ర్‌గా తెర‌కెక్కుతోన్న ప్ర‌ళ‌య్ మూవీకి జై మెహ‌తా ద‌ర్శ‌క‌త్వం వ‌హించారు. ఈ సినిమాతో మ‌ల‌యాళ బ్యూటీ క‌ళ్యాణి ప్రియ‌ద‌ర్శ‌న్ హిందీ ఇండ‌స్ట్రీలోకి తొలి అడుగు వేయ‌బోతుంది. హ‌న్స‌ల్ మెహ‌తా, అన‌న్య బిర్లాతో క‌లిసి ర‌ణ‌వీర్‌సింగ్ ఈ సినిమాను నిర్మిస్తున్నారు.