Karimnagar Robbery | క‌రీంన‌గ‌ర్‌ భారీ దోపిడీ కేసులో ట్విస్ట్‌

Karimnagar Robbery | త్రినేత్ర‌.న్యూస్‌: క‌రీంన‌గ‌ర్‌లోని భగత్ నగర్‌కు చెందిన అజ్మత్ అలీ అనే వృద్ధుడి ఇంట్లో భారీ చోరీ (Karimnagar Robbery) జ‌రిగింది. అర్ధ‌రాత్రి ఇంట్లోకి చొర‌బ‌డిన దుండ‌గులు ఆయుధాలతో బెదిరించి ఇంట్లో ఉన్న 66 తులాల బంగారం, రూ.21 లక్షల నగదు, 10 తులాల వెండి ఎత్తుకెళ్లారు. వెళ్తూవెళ్తూ రెండు మోటారు సైకిళ్ల‌ను కూడా తీసుకెళ్లారు. ఇది తెలిసిన‌వాళ్లు చేసిన ప‌నేన‌ని, త‌మ పెద్ద అల్లుడిపైనే త‌మ‌కు అనుమానం ఉంద‌ని ఇంటి య‌జ‌మాని పోలీసుల‌కు తెలిపారు.

అజ్మత్ అలీ (Azmath Ali) కుటుంబం భగత్ సింగ్ చౌరస్తాలోని ఓ ఇంట్లో మొదటి అంతస్తులో నివాసం ఉంటోంది. నిద్రకు ఉపక్రమించే ముందు.. రోజూలాగే కింది ఫ్లోర్‌లో ఉన్న లైట్ బంద్ చేసేందుకు వృద్ధుడు కిందకు వెళ్తుండ‌గా.. అప్ప‌టికే అక్క‌డ మాటువేసి దుండగులు అత‌డిని బంధించారు. అర‌వ‌కుండా నోటిని మూసివేసి తల, ముఖంపై గట్టిగా కొట్టారు. అనంత‌రం అత‌ని భార్య, ఇద్దరు కుమార్తెల పైకూడా దాడిచేశారు. అరిస్తే చంపేస్తామని తుపాకులు, కత్తులతో బెదిరించారు.

అంద‌రినీ కట్టేసి ఇంట్లో ఉన్న 66 తులాల బంగారం, రూ.21లక్షల నగదు, 10 తులాల వెండి ఎత్తుకు వెళ్లారు. మొబైల్ ఫోన్లు, పార్క్ చేసి ఉన్న రెండు బైకులను కూడా తీసుకెళ్లారు. కాగా, పెద్ద అల్లుడిపైనే (Son-in-law) అజ్మత్‌ అలీ అనుమానం వ్యక్తం చేశారు. వచ్చిన వ్యక్తులు ఉత్తరాది హింది భాష మాట్లాడారని, తన అల్లుడు సైతం ఉత్తర‌ప్రదేశ్‌కు చెందిన వాడని వెల్ల‌డించారు. నిందుతులు వేములవాడ బైపాస్ మీదుగా వెళ్లిన‌ట్లు అనుమానిస్తున్నారు. సీసీటీవీ ఫుటేజ్ దృశ్యాలను ప‌రిశీలిస్తున్నారు. కేసు న‌మోదుచేసి ద‌ర్యాప్తు చేస్తున్నారు.