Mettu Sai Kumar | మ‌న్నె క్రిశాంక్‌పై క‌ఠిన చ‌ర్య‌లు తీసుకోండి

హైద‌రాబాద్ క్రైమ్ డీసీపీకి మెట్టు సాయికుమార్ ఫిర్యాదు

Mettu Sai Kumar | త్రినేత్ర న్యూస్ : రాష్ట్ర ముఖ్య‌మంత్రి రేవంత్ రెడ్డి కుమార్తె నైమిషా రెడ్డిపై త‌ప్పుడు ఆరోప‌ణ‌లు చేసిన బీఆర్ఎస్ నేత మ‌న్నె క్రిశాంక్‌పై క‌ఠిన చ‌ర్య‌లు తీసుకోవాలి అని హైద‌రాబాద్ క్రైమ్ డీసీపీ చైత‌న్య కుమార్‌కు ఫిష‌రీష్ చైర్మ‌న్ మెట్టు సాయికుమార్ ఫిర్యాదు చేశారు.

సీఎం రేవంత్ రెడ్డి కుమార్తె నైమిషా రెడ్డిపై ఆస్తులు, ఫార్మా కంపెనీలకు సంబంధించి ఆరోపణలు చేస్తున్న వారిని విచారించి చర్యలు తీసుకోవాలని డిమాండ్ చేశారు. నైమిషా రెడ్డికి చెందినవిగా పేర్కొంటూ కొన్ని ఆస్తులు, ఫార్మా కంపెనీలపై ఆరోపణలు ప్రచారంలోకి వచ్చాయని ఫిర్యాదులో పేర్కొన్నారు. సీఎం కూతురిపై చేస్తున్న ఆ ఆరోపణలకు సరైన ఆధారాలు చూపించాలి. తప్పుడు, కల్పిత, తప్పుదారి పట్టించే లేదా ఆధారాలు లేనివిగా తేలితే, వాటికి బాధ్యులైన వ్యక్తులపై చట్టప్రకారం చర్యలు తీసుకోవాలని విజ్ఞప్తి చేశారు.

అందుబాటులో ఉన్న రికార్డులను పరిశీలించి వాస్తవాలను నిర్ధారించాలని, తప్పుడు సమాచారాన్ని సృష్టించిన లేదా ప్రచారం చేసిన వ్యక్తులను గుర్తించాలని కోరారు. నేరం రుజువైతే సంబంధిత వ్యక్తులపై అవసరమైన చట్టపరమైన చర్యలు తీసుకోవాలని డీసీపీని కోరారు. ఈ అంశంపై నిష్పక్షపాతంగా, సమగ్రంగా విచారణ జరిపి చట్ట ప్రకారం తక్షణ చర్యలు తీసుకోవాలని ఫిర్యాదులో మెట్టు సాయి విజ్ఞప్తి చేశారు.