Commercial Gas Cylinder | రూ.4000.. క‌మ‌ర్షియ‌ల్ గ్యాస్ సిలిండ‌ర్ల ధ‌ర‌కు రెక్క‌లు..

Commercial Gas Cylinder | త్రినేత్ర‌.న్యూస్‌: ఇరాన్‌, ఇజ్రాయెల్ యుద్ధంతో ప‌శ్చిమాసియాలో తీవ్ర ఉద్రిక్త ప‌రిస్థితులు నెల‌కొన్నాయి. హ‌ర్మూజ్ కాలువ‌ను ఇరాన్ మూసివేయ‌డంతో ప్ర‌పంచ వ్యాప్తంగా చ‌మురు ర‌వాణా నిలిచిపోయింది. దీంతో దేశంలో గ్యాస్ కొర‌త ఏర్ప‌డింది. ఈ నేప‌థ్యంలో క‌మ‌ర్షియ‌ల్ సిలిండర్ల‌పై (Commercial Gas Cylinder) కేంద్ర ప్ర‌భుత్వం ఆంక్ష‌లు విధించింది. హాస్పిట‌ళ్లు, గృహావ‌స‌రాల‌కు ప్రాధాన్య‌మివ్వాల‌ని చ‌మురు కంపెనీల‌కు స్ప‌ష్టం చేసింది. దీంతో దేశ‌వ్యాప్తంగా హోట‌ల్ రంగంపై తీవ్ర ప్ర‌భావం చూపిస్తున్న‌ది. హైద‌రాబాద్‌లోనూ కమర్షియల్‌ గ్యాస్‌ సిలిండర్ల సరఫరా నిలిచిపోయింది. ఒకవేళ దొరికినా రెంట్టింపు ధ‌ర‌ల‌కు విక్ర‌యిస్తున్నారు.

ప్ర‌స్తుతం 19 కిలోల వాణిజ్య సిలిండ‌ర్ ధ‌ర రూ.2105గా ఉన్న‌ది. అయితే కొర‌తను అద‌నుగా తీసుకున్న ప‌లువురు రూ. 4 వేలు, రూ.3,500కు అమ్మి సొమ్ముచేసుకుంటున్నారు. ఇక క‌మ‌ర్షియ‌ల్ గ్యాస్ సిలిండ‌ర్ల స‌ర‌ఫ‌రా నిలిచిపోవ‌డంతో పెద్ద సంఖ్య‌లో హోట‌ళ్లు మూత‌ప‌డుతున్నాయి. ఆర్టీసీ క్రాస్‌ రోడ్డులోని బావర్చి హోటల్‌ను బుధవారం మూసేశారు. గ్యాస్‌ సిలిండర్ల కొరత కారణంగానే మూసేసిన్నట్లుగా తెలిసింది.

అదేవిధంగా ప్రముఖ ప్యారడైజ్‌ హోటల్స్‌ అన్ని బ్రాంచీలలో చాయ్‌ అమ్మకాలను నిలిపివేశారు. ఐటీసీ సంస్థ కూడా వివిధ ప్రాంతాల్లో గల సంస్థ హోటల్స్‌లో గ్యాస్‌ కొరత కారణంగా లంచ్‌, డిన్నర్‌ ఉండదని ప్రకటించింది. ఐటీ కారిడార్‌లో ఇప్ప‌టికే చాయ్‌, కాఫీల‌ను బ్యాన్ చేశారు. గ్యాస్‌ను ఎక్కువ‌గా తీసుకునే వ‌డ‌, దోశ‌, పూరీలపై కూడా నిషేధం విధించారు. ప‌లు హాస్ట‌ళ్ల‌లో అన్నం, ప‌ప్పు, ర‌సం మాత్ర‌మే వ‌డ్డిస్తున్నారు. ఇక న‌గ‌రంలో చాలా చిన్న‌చిన్న హోట‌ళ్లు మూత‌ప‌డుతున్నాయి. దీంతో ఫుడ్ డెలివ‌రీలు చేసుకునే గిగ్‌వ‌ర్క‌ర్లు రోడ్డున ప‌డుతున్నారు.