Ramadan Wishes | ఈద్ ఉల్ ఫిత‌ర్.. ముస్లిం సోద‌రుల‌కు గ‌వ‌ర్న‌ర్‌, సీఎం, కేసీఆర్ శుభాకాంక్ష‌లు

Ramadan Wishes | త్రినేత్ర‌.న్యూస్‌: ప‌విత్ర రంజాన్ మాసం ఆఖ‌రి ప‌ర్వ‌దినమైన ఈద్‌ ఉల్‌ ఫితర్ (Eid-ul-Fitr) సంద‌ర్భంగా రాష్ట్ర గ‌వ‌ర్న‌ర్ శివ‌ప్ర‌తాప్ శుక్లా, సీఎం రేవంత్ రెడ్డి, ప్ర‌ధాన ప్ర‌తిప‌క్ష నేత, బీఆర్‌ఎస్‌ అధినేత కేసీఆర్‌ ముస్లిం సోదరులకు శుభాకాంక్షలు (Ramadan Wishes) తెలియజేశారు. పవిత్ర ఖురాన్‌ బోధనల పట్ల తనకు ఎంతో గౌరవం ఉంద‌ని గవర్నర్ శివ‌ప్ర‌తాప్ శుక్లా అన్నారు. ఖురాన్‌ సన్మార్గంలో నడిపిస్తూ మానవత్వం, కరుణకు మార్గదర్శకంగా నిలిచింద‌ని చెప్పారు.

ముస్లింలకు సీఎం రేవంత్ రెడ్డి రంజాన్ శుభాకాంక్షలు తెలిపారు. రంజాన్ పండుగ లౌకికవాదానికి, మతసామరస్యానికి ప్రతీకగా నిలుస్తుంద‌న్నారు. క్రమశిక్షణతో చేసే ప్రార్థనలు, దాన ధర్మాలు మానవాళికి ఆదర్శంగా నిలుస్తాయ‌ని చెప్పారు.

ప్రతిరోజూ ప్రత్యేక దైవ ప్రార్థనలు, ఉపవాస దీక్షలు, భక్తి శ్రద్ధలతో ముస్లింలు పవిత్ర రంజాన్‌ మాసాన్ని ఆచరిస్తారని, ఈ సందర్భంగా పరస్పర శాంతి, సహనం, సౌభ్రాతృత్వం, ప్రేమాభిమానాలు పరిమళిస్తాయని కేసీఆర్ పేర్కొన్నారు. లౌకికవాద విలువలకు ప్రాధాన్యమిస్తూ, విభిన్న మతాల సంస్కృతీ సంప్రదాయాలు, ఆచారాలను గౌరవిస్తూ, గంగా జమునా తహజీబ్‌కు ప్రతీకగా బీఆర్‌ఎస్‌ పాలన కొనసాగిందని తెలిపారు. రాష్ట్రంలో ముస్లిం మైనారిటీల సంక్షేమం, ప్రగతి కోసం విద్య తదితర రంగాల్లో అమలు చేసిన అభివృద్ధి కార్యక్రమాలు వారి జీవన విధానంలో గుణాత్మక మార్పునకు దోహదం చేశాయన్నారు. ప్రగతి తిరిగి పుంజుకుని, రాష్ట్ర ప్రజలందరూ సుఖసంతోషాలు, ఆయురారోగ్యాలతో జీవించాలని ఆకాంక్షించారు.