N Ramachander Rao | తెలంగాణ‌లోనూ యూనిఫాం సివిల్ కోడ్ : ఎన్ రామ‌చంద‌ర్ రావు

N Ramachander Rao | త్రినేత్ర‌.న్యూస్ : దేశంలోని పౌరులంద‌రికీ ఒకే చ‌ట్టం వ‌ర్తింప‌జేయాల‌న్న ల‌క్ష్యంతో తీసుకువ‌స్తున్న యూనిఫాం సివిల్ కోడ్‌(యూసీసీ)ను తెలంగాణ‌లోనూ తీసుకురావాల‌ని బీజేపీ రాష్ట్ర అధ్య‌క్షుడు ఎన్ రామ‌చంద‌ర్ రావు పేర్కొన్నారు. రంగారెడ్డి జిల్లా మొయినాబాద్‌లో నిర్వ‌హించిన పండిట్ దీన్ ద‌యాళ్ ప్ర‌శిక్ష‌ణ్ మ‌హాభియాన్ కార్య‌క్ర‌మంలో రామ‌చంద‌ర్ రావు పాల్గొని ప్ర‌సంగించారు.

దేశంలో యూనిఫాం సివిల్ కోడ్ అమ‌లు చేస్తున్నారు. ఇప్ప‌టికే ఉత్త‌రాఖండ్, గుజ‌రాత్ ఈ చ‌ట్టాన్ని అమ‌లు చేస్తుండ‌గా, నిన్న అసోం అసెంబ్లీ కూడా ఆమోదం తెలిపింది. యూనిఫాం సివిల్ కోడ్ అనేది మ‌న సిద్ధాంతం, మ‌న మేనిఫెస్టోలో భాగంగా ఉంది. అదే విధంగా ఆర్టిక‌ల్ 370 ర‌ద్దు చేయాల‌ని కూడా మ‌న సిద్ధాంతంలో ఉండే.. ర‌ద్దు చేసినం. ఈ ఆర్టిక‌ల్ వ‌ల్ల నష్టం ఏంటో కూడా మ‌నం గ‌తంలో చెప్పినం. ఇప్పుడు యూనిఫాం సివిల్ కోడ్ కూడా ఎందుకు రావాలో ప్ర‌జ‌ల‌కు చెప్పాలి. తెలంగాణ‌లో కూడా యూనిఫాం సివిల్ కోడ్ రావాలి. ఇది దేశానికి అవ‌స‌రం. యూసీసీ అన‌గానే చాలా మంది ఒక మ‌తానికో, ఒక వ‌ర్గానికో వ్య‌తిరేకం అనుకుంటారు. అసోం తీసుకున్న నిర్ణ‌యం ప్ర‌శంస‌నీయం.. దాన్ని స్వాగ‌తించాలి. ఈ కోడ్ వ‌ల్ల ఈ దేశంలో ఉన్న మ‌హిళ‌ల‌కు, చిన్నారుల‌కు ల‌భించే హ‌క్కుల‌కు న్యాయం జ‌రుగుతుంది అని ఆయ‌న తెలిపారు.

కొన్ని మ‌తాల్లో మ‌హిళ‌ల‌కు హ‌క్కుల్లేవు. ఈ కోడ్ దేశ వ్యాప్తంగా అమ‌ల్లోకి వ‌స్తే మ‌హిళ‌ల‌కు హ‌క్కులు వ‌స్తాయి. పిల్ల‌ల‌కు ఒకే చ‌ట్టం రాబోతుంది. ఈ కోడ్ వ‌ల్ల రాబోయే రోజుల్లో అన్ని మ‌తాల‌కు, కులాల‌కు, వ‌ర్గాల‌కు మేలు జ‌రుగుతుంది.. షెడ్యూల్ తెగ‌ల‌కు త‌ప్ప‌. దేశంలోని ముస్లిం మ‌హిళ‌లు కూడా ఈ కోడ్‌ను స్వాగ‌తించారు అని రామ‌చంద‌ర్ రావు గుర్తు చేశారు.