Auto Driver | ఆటో డ్రైవ‌ర్ మ‌ర్యాద బాబు ఆత్మ‌హ‌త్య‌..

Auto Driver | త్రినేత్ర‌.న్యూస్ : ఆర్థిక ఇబ్బందులు తాళ‌లేక ఆత్మ‌హ‌త్యాయ‌త్నం చేసిన‌ ఓ ఆటో డ్రైవ‌ర్ చికిత్స పొందుతూ ప్రాణాలు కోల్పోయాడు. ఈ విషాద ఘ‌ట‌న మంచిర్యాల జిల్లాలోని గ‌రిమిళ్లలో ఆదివారం చోటు చేసుకుంది. స‌మాచారం అందుకున్న పోలీసులు ఆస్ప‌త్రికి చేరుకుని మృత‌దేహాన్ని స్వాధీనం చేసుకున్నారు. అనంత‌రం పోస్టుమార్టంకు త‌ర‌లించారు.

గ‌రిమిళ్ల‌కు చెందిన మ‌ర్యాద బాబు(40) వృత్తి రీత్యా ఆటో డ్రైవ‌ర్. గ‌త కొంత‌కాలం నుంచి ఆయ‌న‌కు ఉపాధి క‌రువైంది. దీంతో అప్పుల బాధ‌తో తీవ్ర ఆందోళ‌న‌కు గుర‌య్యేవాడు. ఆర్థిక ఇబ్బందులు తాళ‌లేక మార్చి 1వ తేదీన క్రిమిసంహార‌క మందు తాగి ఆత్మ‌హ‌త్యాయ‌త్నం చేశాడు. గ‌మ‌నించిన కుటుంబ స‌భ్యులు అత‌న్ని చికిత్స నిమిత్తం ఆస్ప‌త్రికి త‌ర‌లించారు. ఏడు రోజుల పాటు మృత్యువుతో పోరాడుతూ ఆదివారం క‌న్నుమూశారు. మృతుడికి ఇద్ద‌రు భార్య‌లు, ముగ్గురు కుమార్తెలు ఉన్నారు.

మ‌ర్యాద బాబు మృతి సంద‌ర్భంగా ఆటో రిక్షా యూనియ‌న్ల జేఏసీ ప్రెసిడెంట్ మంద ర‌వికుమార్ కాంగ్రెస్ స‌ర్కార్‌పై తీవ్ర ఆగ్ర‌హం వ్య‌క్తం చేశారు. మ‌హిళ‌ల‌కు ఉచిత బ‌స్సు ప్ర‌యాణం క‌ల్పించిన త‌ర్వాత ఆటో డ్రైవ‌ర్లు పూర్తిగా ఉపాధి కొల్పోయార‌ని తెలిపారు. త‌మ‌కిచ్చిన హామీల‌ను అమ‌లు చేయాల‌ని డిమాండ్ చేశారు. మ‌ర్యాద బాబు ఆత్మ‌హ‌త్య‌కు ప్ర‌భుత్వ‌మే బాధ్య‌త వ‌హించాల‌ని డిమాండ్ చేస్తూ రేవంత్ రెడ్డికి వ్య‌తిరేకంగా నినాదాలు చేశారు.