Tula Uma fires on Kalvakuntla Kavitha | “అధికార దాహం కోసం కన్నతండ్రిని బలిపెడతారా?”: కవిత తీరుపై తుల ఉమ తీవ్ర ఆగ్రహం

Tula Uma fires on Kalvakuntla Kavitha | త్రినేత్ర.న్యూస్ : కల్వకుంట్ల కవిత కొత్త రాజకీయ పార్టీ (TRS) ప్రకటన చేస్తూ, తన తండ్రి, బీఆర్ఎస్ (BRS) పార్టీ అధినేత కేసీఆర్ (KCR) పై చేసిన వ్యాఖ్యలు తెలంగాణ రాజకీయాల్లో దుమారం రేపుతున్నాయి. కవిత వ్యాఖ్యలను ఖండిస్తూ మాజీ జడ్పీ చైర్‌పర్సన్ తుల ఉమ, రాష్ట్ర మహిళా నాయకురాళ్లు డా. హరి రమాదేవి, అడ్వకేట్ ఉబ్బపల్లి నిరోష ఒక ప్రెస్ నోట్ విడుదల చేశారు. కవిత వ్యవహార శైలిపై, ఆమె మాటల వెనుక ఉన్న ఉద్దేశాలపై వారు తీవ్ర స్థాయిలో విరుచుకుపడ్డారు.

కేసీఆర్ బిడ్డవు కాకపోతే నువ్వెవరు?

"రాజకీయాల్లో విభేదాలు సహజమే. కానీ, వ్యక్తిగత స్వార్థం కోసం తనను రాజకీయాల్లోకి తెచ్చి నడిపించిన నాయకుడిని, కన్నతండ్రిని తక్కువ చేసి మాట్లాడే స్థాయికి దిగజారడం అత్యంత దురదృష్టకరం. అసలు కేసీఆర్ బిడ్డవు కాకపోతే నువ్వు ఎవరు? నిన్ను ఎవరికి తెలుసు? ఈ గుర్తింపు ఎక్కడిది? నిన్న కూడా 'కేసీఆర్ బిడ్డ పార్టీ పెట్టింది' అని ప్రజలు అంటున్నారు తప్ప, కవిత పార్టీ పెట్టిందని ఎవరూ అనడం లేదు."

సమాజానికి ఏం సందేశం ఇస్తున్నారు?

"పదవుల కోసం, రాజకీయ స్వార్థం కోసం కన్నతండ్రినే కాదనుకుని ఆయనపై విమర్శలకు దిగడం ద్వారా సమాజానికి మీరిచ్చే సందేశం ఏమిటి? 'తెలంగాణ ఆడబిడ్డ తన తండ్రిని ఎదిరించాలి, నిందలు వేయాలి' అనే విష సంస్కృతిని మీరు ప్రోత్సహిస్తున్నారా? భారతీయ కుటుంబ వ్యవస్థలో తండ్రీకూతుళ్ల అనుబంధం ఎంతో గొప్పది. కానీ, మీ రాజకీయ చదరంగంలో ఆ పవిత్రమైన బంధాన్ని పావుగా వాడుకోవడం సిగ్గుచేటు."

TRS అంటే 'తెలంగాణ రేవంత్ సేన'నా?

"గతంలో టీఆర్ఎస్ పేరుతో ఉద్యమం సాగింది. దానికి జీవం పోసి తెలంగాణ రాష్ట్రాన్ని తెచ్చింది కేసీఆర్. నీళ్లు, నిధులు, నియామకాల కోసం జరిగిన సుదీర్ఘ పోరాటం నుంచి పుట్టిన పార్టీ అది. కానీ, ఇప్పుడు మీరు అదే పేరును పోలిన 'TRS' పెట్టుకుని ప్రజలను మభ్యపెట్టాలని చూస్తున్నారు. ప్రజలు మాత్రం ఈ టీఆర్ఎస్ అంటే 'తెలంగాణ రేవంత్ సేన' అని అర్థం చేసుకుంటున్నారు. పార్టీ పేరు మార్చినంత మాత్రాన మీపై ఉన్న అవినీతి మరకలు, వెన్నుపోటు ఆరోపణలు చెరిగిపోవు. మీ మాటల వెనుక ముఖ్యమంత్రి రేవంత్ రెడ్డి భాష స్పష్టంగా కనిపిస్తోంది."

కష్టకాలంలో కన్నతండ్రికి వెన్నుపోటు!

"పదేళ్ల పాటు కేసీఆర్ ద్వారా అధికారాన్ని, పదవులను అనుభవించారు. అప్పుడు మీకు ఈ తప్పులేమీ కనిపించలేదా? ఇప్పుడు పార్టీ కష్టాల్లో ఉంటే తండ్రికి అండగా నిలబడాల్సింది పోయి, కొత్త కుంపటి పెట్టడం ముమ్మాటికీ వెన్నుపోటు చర్యే. ఎవరి కోసమో లేని నిందలు మోపుతున్నారు. నిన్నటి మీ ప్రసంగంలో ఎక్కడా ప్రజా హితం కనిపించలేదు, కేవలం మీ రాజకీయ మనుగడ కోసం పడుతున్న ఆరాటం మాత్రమే కనిపించింది."

కేటీఆర్, హరీష్ రావులపై నిందలా?

"కేటీఆర్ (KTR) కి ఏమీ తెలియదని మీరు అంటున్నారు. ఏమీ తెలియని వ్యక్తే 4 సార్లు ఎమ్మెల్యే అయ్యాడా? రెండుసార్లు మంత్రి అయ్యాడా? తెలంగాణ ఐటీ రంగాన్ని ప్రపంచ స్థాయికి తీసుకెళ్లిన కేటీఆర్ కి ప్రపంచంలోని ఉత్తమ యూనివర్సిటీల నుండి ఆహ్వానాలు అందుతున్నాయి. ఇక నిత్య శ్రామికుడైన హరీష్ రావు (Harish Rao) ని కూడా మీరు దుర్భాషలాడటం శోచనీయం."

ప్రజలే బుద్ధి చెబుతారు!

"బీఆర్ఎస్ పార్టీ ఒక సముద్రం లాంటిది. అటువంటి పార్టీ నుంచి మీరు విడిపోవడం వల్ల నష్టం మీకు మాత్రమే తప్ప పార్టీకి కాదు. తండ్రిని గౌరవించలేని వారు, జన్మనిచ్చిన పార్టీని ప్రేమించలేని వారు రేపు ప్రజలకు ఏం మేలు చేస్తారో అందరికీ తెలుసు. మీ అబద్ధపు ప్రచారాలను, కుట్రలను బీఆర్ఎస్ శ్రేణులు ఐక్యంగా తిప్పికొడతారు. రాబోయే రోజుల్లో ప్రజలే మీకు తగిన గుణపాఠం చెబుతారు" అని తుల ఉమ, ఇతర నాయకురాళ్లు హెచ్చరించారు.