Model Schools | మోడ‌ల్ స్కూల్స్‌లో ప్ర‌వేశాలు.. 28 నుంచి ద‌ర‌ఖాస్తులు

త్రినేత్ర‌.న్యూస్‌: వచ్చే విద్యా సంవత్సరానికిగాను రాష్ట్రవ్యాప్తంగా ఉన్న 194 మోడల్​ స్కూళ్లలో (Model Schools) ప్ర‌వేశాల‌కు షెడ్యూల్ విడుద‌లైంది. జ‌న‌వ‌రి 28 నుంచి ఫిబ్ర‌వ‌రి 28 వ‌ర‌కు ద‌రాఖ‌స్తు చేసుకోవ‌చ్చు. దీనిద్వారా ఆరో తరగతి సీట్లతో పాటు 7 నుంచి 10 తరగతుల్లో ఖాళీగా సీట్లను భర్తీ చేయ‌నున్నారు. కాగా, ప్రతి ఏడాది డిసెంబరులోనే నోటిఫికేషన్​ వచ్చేది. కానీ ఈ సారి కొంత ఆల‌స్య‌మైంది. గురుకులాల తరహాలోనే మోడల్​ స్కూళ్లలో కూడా ఐదో తరగతిని ప్రవేశపెట్టాలనే ప్రతిపాదన సర్కార్​ వద్ద పెండింగ్​లో ఉండటమే దీనికి కార‌ణం.

ప్రతి మోడల్​ స్కూల్​లో ఆరో తరగతి రెండు సెక్షన్లు ఉంటాయి. ఒక్కో సెక్షన్​లో 50 చొప్పున 100 సీట్లు అందుబాటులో ఉంటాయి. అంటే రాష్ట్రంలోని 194 పాఠశాలల్లో 19,400 సీట్లు ఉన్నాయ‌న్న‌మాట‌. ప్రవేశ పరీక్ష ద్వారా ఈ సీట్ల‌ను భర్తీ చేస్తారు. విద్యార్థులు www.tgms.telangana.gov.in వెబ్​సైట్​ ద్వారా దరఖాస్తు చేసుకోవచ్చు. ఓసీ విద్యార్థులు రూ.200, మిగిలిన వారు రూ.125 దరఖాస్తు ఫీజు చెల్లించాల్సి ఉంటుంది.

పరీక్ష ప‌రీక్ష‌ను ఏప్రిల్ 19న నిర్వ‌హిస్తారు. దీనికి సంబంధించిన‌ హాల్‌టికెట్ల‌ను ఏప్రిల్ 9 నుంచి డౌన్‌లోడ్ చేసుకోవ‌చ్చు. ఉద‌యం 10 నుంచి మధ్యాహ్నం 12 గంటల వరకు ఆరో తరగతి ప‌రీక్ష‌, మధ్యాహ్నం 2 నుంచి 4 గంటల వరకు 7- 10 తరగతులకు ఎగ్జామ్ నిర్వ‌హిస్తారు. అన్ని మోడ‌ల్ స్కూళ్ల‌లో ప‌రీక్షా కేంద్రాల‌ను ఏర్పాటు చేస్తారు.