Municipal Elections | బుద్ధి ఉందా..! పొట్లంలో కోడి మాంసంపై ఓట‌రు ఆగ్ర‌హం..!!

Municipal Elections | త్రినేత్ర‌.న్యూస్ : రాష్ట్రంలో నిన్న‌టి వ‌ర‌కు మున్సిపాలిటీల ఎన్నికల ప్ర‌చారం జోరుగా కొన‌సాగింది. గెలుపే ల‌క్ష్యంగా ఆయా పార్టీల అభ్య‌ర్థులు ప్ర‌చారం నిర్వ‌హించారు. ప్ర‌చారంతో పాటు తాయిలాలు కూడా అందించారు. న‌గదు పంపిణీతో పాటు మద్యం, కోడి, మేక మాంసంతో ఓటర్లకు ఎర వేశారు. కులాల వారిగా, కాల‌నీల వారిగా మద్యం, మాంసంతో ఓట‌ర్ల‌కు విందులు ఏర్పాటు చేసి ఆక‌ర్షించే ప్ర‌య‌త్నం చేశారు.

అయితే వ‌న‌ప‌ర్తి జిల్లాలోని కొత్త‌కోట మున్సిపాలిటీ ప‌రిధిలో ఓ ఆస‌క్తిక‌ర‌మైన సంఘ‌ట‌న చోటు చేసుకుంది. సోమ‌వారం ఎన్నిక‌ల ప్ర‌చారానికి చివ‌రి రోజు కావ‌డంతో.. ఓ పార్టీ అభ్య‌ర్థి ఓట‌ర్ల‌ను ప్ర‌స‌న్నం చేసుకునేందుకు స‌రికొత్త పంథాను ఎంచుకున్నాడు. పొద్దున్నే ప్ర‌తి ఇల్లు తిరుగుతూ.. ఓట‌ర్ల‌ నివాసాల్లో ఓ పొట్లంతో పాటు త‌న గుర్తును పెట్టి వెళ్లిపోతున్నాడు.

ఇక ఓ ఇంటి ముందు మ‌హిళ క‌ల్లాపి చ‌ల్లి ఇంట్లోకి వెళ్తున్న క్ర‌మంలో స‌ద‌రు అభ్య‌ర్థి వ‌డివ‌డిగా ఆమెతో ఇంట్లోకి వెళ్లాడు. అక్క‌డున్న కుర్చీపై ఓ పొట్లంతో పాటు త‌న గుర్తును పెట్టి బ‌య‌ట‌కు వ‌చ్చేశాడు. అత‌ను వెళ్లాక పొట్లంలో ఏం ఉందో చూసిన యజమాని అవాక్కయ్యాడు. వెంటనే బయట మురుగు కాల్వలోకి పొట్లం విసిరేసి బుద్ధి ఉందా అని అరిచారు. ఇంతకీ ఆ పొట్లంలో ఏం ఉందంటే కోడి మాంసం ఉందట. ఇంటి యజమాని శాకాహారి కావడంతో ఆగ్రహం వ్యక్తం చేశారు. ఓట్ల కోసం ఇలాంటి నీచ‌మైన ప‌నులు చేయొద్ద‌ని, ఎదుటి వారి వ్య‌క్తిత్వాన్ని దెబ్బ‌తీసే విధంగా ప్ర‌వ‌ర్తించొద్ద‌ని దుమ్మెత్తిపోశారు. ఈ సంఘ‌ట‌న కొత్త‌కోట‌లో చ‌ర్చ‌నీయాంశంగా మారింది.