YouTube | యూట్యూబ్‌లో భారీ అప్‌డేట్‌.. ఇక తొలి ఫ్రేమ్ నుంచే వ్యూస్ లెక్కింపు..

YouTube | యూట్యూబ్ తన ప్లాట్‌ఫామ్‌లో పబ్లిక్ వ్యూస్‌ను లెక్కించే విధానంలో కీలక మార్పును ప్రకటించింది. ఇకపై వీడియో ప్లే అవ్వడం ప్రారంభమైన వెంటనే, అంటే మొదటి ఫ్రేమ్ నుంచే ఒక వ్యూగా లెక్కించనుంది. ఈ కొత్త ప్రమాణం ప్రపంచవ్యాప్తంగా అన్ని రకాల యూట్యూబ్ వీడియోలకు వర్తించనుంది. ఇప్పటివరకు యూట్యూబ్ వివిధ వీడియో ఫార్మాట్లకు వేర్వేరు వ్యూ కౌంటింగ్ విధానాలను ఉపయోగించింది. గతేడాది షార్ట్స్‌కు సంబంధించి యూట్యూబ్ తన వ్యూ లెక్కింపు విధానాన్ని మార్చింది. ఇప్పుడు అదే ప్రమాణాన్ని ఇతర వీడియో ఫార్మాట్లకు కూడా వర్తింపజేస్తోంది.

పాత మెట్రిక్ ప‌రిస్థితేంటి..

వివిధ వ్యూ మెట్రిక్స్‌ మధ్య ఉన్న గందరగోళాన్ని తొలగించడంతోపాటు, తమ కంటెంట్‌కు లభిస్తున్న మొత్తం ఎక్స్‌పోజర్‌ను మెరుగ్గా అర్థం చేసుకోవాలని క్రియేటర్లు కోరుతున్నారని యూట్యూబ్ తెలిపింది. కొత్త విధానం అమల్లోకి వచ్చిన తర్వాత క్రియేటర్లు తమ మొత్తం పబ్లిక్ వ్యూ కౌంట్ మరింత వేగంగా పెరుగుతున్నట్లు చూడొచ్చని పేర్కొంది. యూట్యూబ్ తన పాత వ్యూ మెట్రిక్‌ను ఎంగేజ్డ్ వ్యూస్ పేరుతో కొనసాగించనుంది. యూట్యూబ్ అనలిటిక్స్‌లోని అడ్వాన్స్‌డ్ మోడ్‌లో ఈ మెట్రిక్ అందుబాటులో ఉంటుంది. దీని ద్వారా తమ వీడియోను ప్రారంభించిన తర్వాత ఎంతమంది ప్రేక్షకులు దాన్ని కొనసాగించి చూశారో క్రియేటర్లు తెలుసుకోవచ్చు.

కొత్త మెట్రిక్ ఎలా ప‌నిచేస్తుంది..

కొత్త పబ్లిక్ వ్యూ మెట్రిక్‌లో వీడియో ప్లే అవ్వడం ప్రారంభమైన వెంటనే, మొదటి ఫ్రేమ్ నుంచే వ్యూ లెక్కింపు మొద‌ల‌వుతుంది. ఇక అసలు వ్యూ మెట్రిక్ ఎంగేజ్డ్ వ్యూస్ పేరుతో యూట్యూబ్ అనలిటిక్స్‌లోని అడ్వాన్స్‌డ్ మోడ్‌లో అందుబాటులో ఉంటుంది. ఈ వ్యూ కౌంటింగ్ మార్పు వల్ల క్రియేటర్ల ఆదాయంపై లేదా యూట్యూబ్ పార్టనర్ ప్రోగ్రామ్‌కు అర్హత సాధించే విధానంపై ఎలాంటి ప్రభావం ఉండదని యూట్యూబ్ స్పష్టం చేసింది. క్రియేటర్ల ఆదాయం ఇకపై కూడా ఎంగేజ్డ్ షార్ట్స్ వ్యూస్, ఎంగేజ్డ్ వాచ్ అవర్స్ ఆధారంగానే కొనసాగుతుంది. ఈ రెండు మెట్రిక్స్ కూడా యూట్యూబ్ అనలిటిక్స్‌లోని అడ్వాన్స్‌డ్ మోడ్‌లో అందుబాటులో ఉంటాయి. అలాగే యూట్యూబ్ పార్టనర్ ప్రోగ్రామ్ అర్హత నిబంధనల్లో కూడా ఎలాంటి మార్పు ఉండదు. అయితే వైపీపీ ప్రవేశ అర్హతలకు సంబంధించిన పదజాలాన్ని యూట్యూబ్ మార్చుతోంది. ఇప్పటివరకు వాలిడ్ పబ్లిక్ షార్ట్స్ వ్యూస్ గా పిలిచిన మెట్రిక్‌ను ఇకపై క్వాలిఫైడ్ షార్ట్స్ వ్యూస్ గా పిలుస్తారు. అలాగే వాలిడ్ పబ్లిక్ వాచ్ అవర్స్ ను ఇకపై క్వాలిఫైడ్ వాచ్ అవర్స్ గా పేర్కొంటారు.

కొత్త పబ్లిక్ వ్యూ మెట్రిక్ ఆగస్టు 24 నుంచి ప్రపంచవ్యాప్తంగా అన్ని యూట్యూబ్ వీడియో ఫార్మాట్లకు అమల్లోకి రానుంది. ఆ తేదీ నుంచి యూట్యూబ్‌లో ఎక్కడ వ్యూస్ ప్రదర్శించినా కొత్త లెక్కింపు విధానమే వర్తించనుంది.