WhatsApp | వాట్సాప్‌లో వ‌స్తున్న కొత్త ఫీచ‌ర్‌.. కాంటాక్ట్‌ల బ‌ర్త్ డేల‌ను ముందే చెబుతుంది..

WhatsApp | వాట్సాప్ తన యూజ‌ర్ల కోసం మరో కొత్త ఫీచర్‌ను అందుబాటులోకి తీసుకురానుంది. యాప్‌లోనే కాంటాక్ట్‌ల పుట్టినరోజులను గుర్తు చేసే ప్రత్యేక సౌకర్యాన్ని అందించ‌నుంది. ప్రస్తుతం ఆండ్రాయిడ్ బీటా వెర్షన్‌లో ఈ ఫీచర్ అభివృద్ధి దశలో ఉంది. ఈ అప్‌డేట్ అందుబాటులోకి వచ్చిన తర్వాత, వినియోగదారుల కాంటాక్ట్‌లలో ఎవరికైనా పుట్టినరోజు ఉంటే వాట్సాప్ యాప్‌లోనే నోటిఫికేషన్ పంపి గుర్తు చేస్తుంది. ఈ కొత్త ఫీచర్‌ను మొదటగా గుర్తించిన డబ్ల్యూఏబీటాఇన్ఫో నివేదిక ప్రకారం, ఆండ్రాయిడ్ కోసం విడుదలైన తాజా వాట్సాప్ బీటా 2.26.27.3 వెర్షన్‌లో ఈ ఫీచర్‌కు సంబంధించిన వివరాలు కనిపించాయి. అయితే ఇది ఇంకా అభివృద్ధి దశలోనే ఉండటంతో ప్రస్తుతం బీటా టెస్టర్లకు కూడా అందుబాటులో లేదు.

ప్ర‌త్యేకంగా బ‌ర్త్ డేస్ సెక్ష‌న్‌..

ఈ ఫీచర్‌లో భాగంగా వాట్సాప్ ఒక ప్రత్యేక బర్త్‌డేస్ సెక్షన్ ను కూడా ప్రవేశపెట్టే అవకాశం ఉంది. ఇందులో వినియోగదారుల కాంటాక్ట్‌లలో రాబోయే పుట్టినరోజుల జాబితా కనిపిస్తుంది. దీంతో ముందుగానే ఎవరి పుట్టినరోజు ఎప్పుడు ఉందో తెలుసుకునే అవకాశం లభిస్తుంది. అలాగే కాంటాక్ట్‌లోని వ్యక్తి పుట్టినరోజు రోజున వాట్సాప్ యాప్‌లో ప్రత్యేక నోటిఫికేషన్ పంపిస్తుంది. ఆ నోటిఫికేషన్‌పై ట్యాప్ చేసి నేరుగా ఆ వ్యక్తి చాట్ విండోలోకి వెళ్లి వెంటనే శుభాకాంక్షలు పంపించవచ్చు. అయితే ఈ రిమైండర్లు పనిచేయాలంటే సంబంధిత కాంటాక్ట్ తమ పుట్టిన తేదీని వాట్సాప్‌కు అందించి ఉండాలి. ప్రస్తుతం వాట్సాప్ ఈ ఫీచర్ కోసం ఇప్పటికే సేకరించిన పుట్టిన తేదీ వివరాలను ఉపయోగించే అవకాశం ఉంది. అమెరికాలోని కొన్ని రాష్ట్రాల్లో చట్టపరమైన నిబంధనల ప్రకారం వయస్సు ధ్రువీకరణ కోసం వినియోగదారులు తమ పుట్టిన తేదీని ఇవ్వాల్సి ఉంటుంది. ఆ వివరాలనే ఈ ఫీచర్‌లో వినియోగించనున్నట్లు తెలుస్తోంది.

స్వ‌చ్ఛందంగా చెబితేనే..

అయితే ఈ నిబంధన అన్ని దేశాల్లో లేదా అమెరికాలోని అన్ని రాష్ట్రాల్లో అమల్లో లేదు. అందువల్ల చాలా ప్రాంతాల్లో వాట్సాప్ వినియోగదారులను పుట్టిన తేదీ అడగదు. దీంతో వినియోగదారులు స్వచ్ఛందంగా తమ పుట్టిన తేదీని అందించినప్పుడే ఈ బర్త్‌డే రిమైండర్ ఫీచర్ పూర్తి స్థాయిలో పనిచేసే అవకాశం ఉంటుంది. ప్రస్తుతం ఈ ఫీచర్‌లో గోప్యతకు సంబంధించిన నియంత్రణలు అందుబాటులో లేవు. అంటే వినియోగదారులు తమ పుట్టిన తేదీని ఎవరితో పంచుకోవాలి, ఎవరికి కనిపించకుండా దాచాలి అనే ఎంపికలను ఇప్పటివరకు వాట్సాప్ చేర్చలేదు. ఈ ప్రైవసీ ఫీచర్లను కూడా భవిష్యత్ అప్‌డేట్‌లలో చేర్చే అవకాశం ఉందని తెలుస్తోంది. ప్రస్తుతం ఈ బర్త్‌డే నోటిఫికేషన్ ఫీచర్ అభివృద్ధి దశలో ఉంది. భవిష్యత్ ఆండ్రాయిడ్ అప్‌డేట్‌లో ఇది వినియోగదారులకు అందుబాటులోకి రానుంది.