WhatsApp | ఐఫోన్ యూజర్లకు వాట్సాప్ గుడ్‌న్యూస్.. ఐక్లౌడ్‌కు ప్రత్యామ్నాయంగా కొత్త బ్యాకప్ ఫీచర్..

WhatsApp | ఐఫోన్ వినియోగదారుల కోసం వాట్సాప్ కొత్త క్లౌడ్ బ్యాకప్ ఫీచర్‌పై పనిచేస్తున్నట్లు సమాచారం. ఈ కొత్త వ్యవస్థ ద్వారా చాట్ బ్యాకప్‌లను యాపిల్ ఐక్లౌడ్‌లో కాకుండా, నేరుగా వాట్సాప్ సొంత సర్వర్లలో నిల్వ చేసుకునే అవకాశం లభించనుంది. ముఖ్యంగా ఈ బ్యాకప్‌లు డిఫాల్ట్‌గా ఎండ్-టు-ఎండ్ ఎన్‌క్రిప్షన్‌తో భద్రంగా ఉండేలా రూపొందిస్తున్నట్లు తెలుస్తోంది. ప్రస్తుతం ఈ ఫీచర్ అభివృద్ధి దశలో ఉండగా, ఇంకా బీటా టెస్టర్లకు అందుబాటులోకి రాలేదు. ఇదే తరహా బ్యాకప్ సేవను ఆండ్రాయిడ్ వినియోగదారుల కోసం కూడా వాట్సాప్ అభివృద్ధి చేస్తున్నట్లు గతంలో వార్తలు వచ్చాయి. డబ్ల్యూఏబీటాఇన్‌ఫో వెల్లడించిన వివరాల ప్రకారం ఈ ఫీచర్ ను వాట్సాప్ బీటా ఫర్ ఐఓఎస్ వెర్షన్ 26.28.10.16లో గుర్తించారు. భవిష్యత్తులో ఐఫోన్ యూజర్లు చాట్ బ్యాకప్ సెట్టింగ్స్‌లో ఐక్లౌడ్ లేదా వాట్సాప్ క్లౌడ్ బ్యాకప్ సేవల్లో ఏదైనా ఒకదాన్ని ఎంపిక చేసుకునే అవకాశం ఉంటుందని తెలుస్తోంది. డిఫాల్ట్‌గా ఐక్లౌడ్ బ్యాకప్ కొనసాగుతుండగా, అవసరమైతే వాట్సాప్ క్లౌడ్ సేవకు మారి, తర్వాత మళ్లీ ఐక్లౌడ్‌కు తిరిగి మారే అవకాశం కూడా ఉండనుంది.

ఉచితంగా 2జీబీ క్లౌడ్ స్టోరేజ్‌..

వాట్సాప్ తన సొంత క్లౌడ్ బ్యాకప్ సేవలో ప్రతి వినియోగదారికి 2 జీబీ ఉచిత స్టోరేజ్ ఇవ్వనున్నట్లు సమాచారం. దీంతో ఐక్లౌడ్‌లో లభించే పరిమిత స్టోరేజ్‌ను ఫొటోలు, ఫైళ్లు, డివైస్ బ్యాకప్‌లు వంటి ఇతర అవసరాల కోసం వినియోగించుకునే అవకాశం ఉంటుంది. ప్రస్తుతం యాపిల్ ప్రతి ఐక్లౌడ్ ఖాతాకు 5 జీబీ ఉచిత స్టోరేజ్ అందిస్తోంది. అయితే అదే స్టోరేజ్‌ను ఫొటోలు, ఫైళ్లు, డివైస్ బ్యాకప్‌లు, యాప్ డేటా అన్నింటికీ పంచుకోవాల్సి ఉంటుంది. పెద్ద పరిమాణంలో ఉన్న వాట్సాప్ చాట్ బ్యాకప్‌లు ఈ స్టోరేజ్‌ను వేగంగా నింపేస్తాయి. దీంతో వినియోగదారులు పాత డేటాను తొలగించాల్సి రావడం లేదా అదనపు స్టోరేజ్ కోసం చెల్లింపు ప్లాన్ తీసుకోవాల్సిన పరిస్థితి ఏర్పడుతోంది. కొత్త బ్యాకప్ సేవలో నిల్వ చేసే ప్రతి చాట్ బ్యాకప్ డిఫాల్ట్‌గా ఎండ్-టు-ఎండ్ ఎన్‌క్రిప్షన్‌తో సుర‌క్షితంగా ఉంటుంద‌ని నివేదిక పేర్కొంది. ప్రస్తుతం ఐక్లౌడ్‌లో ఎన్‌క్రిప్టెడ్ వాట్సాప్ బ్యాకప్‌లను వినియోగదారులు ప్రత్యేకంగా ఆన్ చేయాల్సి ఉంటుంది. కొత్త వ్యవస్థలో డివైస్ పాస్‌వర్డ్ మేనేజర్‌లో సేవ్ చేసిన పాస్‌కీలను ఉపయోగించాలని వాట్సాప్ సూచించే అవకాశం ఉంటుంది.

అధిక స్టోరేజ్ అవ‌స‌రం అయితే చెల్లింపు ప్లాన్లు..

అలాగే పాస్‌వర్డ్ లేదా 64 అంకెల ఎన్‌క్రిప్షన్ కీతో కూడా బ్యాకప్‌ను భద్రపరచుకునే అవకాశం ఉంటుంది. ఈ ఎన్‌క్రిప్టెడ్ బ్యాకప్‌ను ఖాతా యజమాని మాత్రమే యాక్సెస్ చేయగలుగుతారు. వాట్సాప్ లేదా దాని మాతృసంస్థ మెటా కూడా ఈ డేటాను డీక్రిప్ట్ చేయలేవని సమాచారం. ఆండ్రాయిడ్ వినియోగదారుల కోసం కూడా గూగుల్ డ్రైవ్‌కు ప్రత్యామ్నాయంగా ఇదే తరహా ఫస్ట్-పార్టీ బ్యాకప్ సేవను వాట్సాప్ అభివృద్ధి చేస్తున్నట్లు తెలుస్తోంది. అక్కడ కూడా 2 జీబీ ఉచిత స్టోరేజ్‌తోపాటు తప్పనిసరి ఎండ్-టు-ఎండ్ ఎన్‌క్రిప్షన్‌ను అందించే అవకాశం ఉంది. అదనపు స్టోరేజ్ అవసరమయ్యే వినియోగదారుల కోసం చెల్లింపు ప్లాన్‌లను కూడా వాట్సాప్ పరిశీలిస్తున్నట్లు సమాచారం. నెలకు సుమారు 0.99 డాలర్లు (దాదాపు రూ.95) ధరతో 50 జీబీ ప్లాన్, అలాగే 1 టెరాబైట్ స్టోరేజ్ ప్లాన్‌ను పరీక్షిస్తున్నట్లు నివేదిక తెలిపింది. అయితే స్టోరేజ్ పరిమితులు, ధరలు ఇంకా అభివృద్ధి దశలో ఉన్నందున, అధికారిక విడుదల సమయానికి మారే అవకాశం ఉంది.