WhatsApp | స్కామర్లకు ఇక చెక్.. వాట్సాప్‌లో ఏఐతో కొత్త సెక్యూరిటీ ఫీచర్..

WhatsApp | రోజురోజుకూ స్కామర్లు మరిన్ని కొత్త పద్ధతులను అవలంబిస్తున్నారు. వ్యక్తిగత సమాచారాన్ని, ముఖ్యంగా బ్యాంకింగ్ వివరాలను, డబ్బును కాజేయడానికి ఏ చిన్న అవకాశాన్నీ వదులుకోవడం లేదు. వాట్సాప్ కూడా ఇలాంటి మోసగాళ్లకు కొత్తేమీ కాదు. అయితే ఇప్పటివరకు స్కామర్‌ను ఎదుర్కోకుండా అదృష్టవంతులుగా ఉన్నవారికి కూడా ఇకపై రక్షణ కల్పించేలా వాట్సాప్ కొత్త ఫీచర్‌ను తీసుకొస్తోంది. మెటా తాజాగా స్కామ్ అలర్ట్ అనే కొత్త గుర్తింపు విధానాన్ని ప్రారంభించింది. కృత్రిమ మేధస్సు ఆధారంగా పనిచేసే ఈ వ్యవస్థ వాట్సాప్‌లో వచ్చే మోసపూరిత సందేశాలను ముందుగానే గుర్తించి వినియోగదారులను అప్రమత్తం చేస్తుంది.

ఆన్ డివైస్ మెషిన్ లెర్నింగ్ మోడ‌ల్‌తో..

అయితే యూజ‌ర్ల‌కు స్కామ్‌ను గుర్తించే సామర్థ్యం ఉంటే స్కామ్ అలర్ట్‌ను ఆఫ్‌లోనే ఉంచుకోవచ్చు. కానీ వృద్ధులు, సులభంగా మోసపోయే అవకాశం ఉన్నవారు ఈ ఫీచర్‌ను ఉపయోగించుకోవడం ద్వారా ప్రయోజనం పొందవచ్చు. వాట్సాప్ తెలిపిన ప్రకారం.. ఈ ఫీచర్‌లో ఉపయోగించే ఆన్-డివైస్ మెషిన్ లెర్నింగ్ మోడల్ యాప్‌లో వచ్చే స్కామ్ సందేశాలను గుర్తిస్తుంది. ఈ ఫీచర్‌ను అందరు వాట్సాప్ వినియోగదారులకు అందుబాటులోకి తీసుకురావడానికి ముందు పరిమిత స్థాయిలో బీటా వెర్షన్‌లో అందుబాటులోకి తెచ్చినట్లు కంపెనీ తెలిపింది. ఈ వ్యవస్థను మరింత కఠినంగా పరీక్షించేందుకు బగ్ బౌంటీ కమ్యూనిటీతో కలిసి పనిచేస్తామని వెల్లడించింది. స్కామ్ అలర్ట్‌లోని మెషిన్ లెర్నింగ్ మోడల్ పూర్తిగా వినియోగదారుడి పరికరంపైనే పనిచేస్తుంది. మెటా సర్వర్లపై ఈ మోడల్ పనిచేయదని వాట్సాప్ స్పష్టం చేసింది. ఫీచర్‌ను ఆన్ చేసిన తర్వాత అవసరమైన ఏఐ మోడల్ ఆటోమేటిక్‌గా డౌన్‌లోడ్ అవుతుంది.

అనుమానాస్ప‌ద సందేశాల‌ను గుర్తిస్తుంది..

వినియోగదారు కాంటాక్ట్స్‌లో సేవ్ చేయని వ్యక్తుల నుంచి వచ్చే సందేశాలను ఈ మోడల్ పరిశీలిస్తుంది. సందేశంలోని సంభాషణ నిర్మాణం, భాషా సంకేతాలు వంటి అంశాలను విశ్లేషించి అది స్కామ్‌కు సంబంధించినదా కాదా అని గుర్తిస్తుంది. ఏదైనా సందేశం అనుమానాస్పదంగా ఉన్నట్లు ఏఐ మోడల్ గుర్తిస్తే, అదే చాట్‌లో యూజ‌ర్‌కు హెచ్చరిక కనిపిస్తుంది. అయితే ఈ హెచ్చరికను సందేశం పంపిన వ్యక్తి చూడలేరు. హెచ్చరిక వచ్చిన తర్వాత వినియోగదారుడికి ఆ వ్యక్తిని బ్లాక్ చేయడం, రిపోర్ట్ చేయడం లేదా సంభాషణను కొనసాగించడం వంటి ఆప్షన్లు ఉంటాయి. ఆ వ్యక్తితో మాట్లాడటం సురక్షితమేనని వినియోగదారు భావిస్తే, ఆ చాట్‌ను విశ్వసనీయమైనదిగా గుర్తించవచ్చు. అలా చేసిన తర్వాత అదే చాట్‌కు సంబంధించి స్కామ్ హెచ్చరిక మళ్లీ ఇబ్బంది పెట్టదు.