Vodafone Idea | వీఐ కస్టమర్లకు గుడ్‌న్యూస్.. ఉచితంగా స్పాటిఫై ప్రీమియం..

Vodafone Idea | దేశంలోని తమ పోస్ట్‌పెయిడ్ వినియోగదారులకు ప్రీమియం మ్యూజిక్ స్ట్రీమింగ్ అనుభవాన్ని అందించేందుకు వొడాఫోన్ ఐడియా (వీఐ) ప్రముఖ ఆడియో స్ట్రీమింగ్ ప్లాట్‌ఫామ్ స్పాటిఫైతో భాగస్వామ్యాన్ని ప్రకటించింది. ఈ భాగస్వామ్యంతో వీఐ కనెక్టివిటీ సేవలతోపాటు స్పాటిఫై ప్రీమియం ప్రయోజనాలను కూడా వినియోగదారులు పొందే అవకాశం కల్పిస్తోంది. అర్హత కలిగిన వీఐ పోస్ట్‌పెయిడ్ కస్టమర్లు కొత్త కనెక్షన్ యాక్టివేట్ చేసుకున్నా లేదా ఇప్పటికే ఉన్న కనెక్షన్‌ను కొనసాగించినా, ఎలాంటి అదనపు ఛార్జీలు లేకుండా మూడు నెలల పాటు స్పాటిఫై ప్రీమియంను ఉచితంగా పొందవచ్చు. భవిష్యత్తులో ఈ భాగస్వామ్యాన్ని మరింత విస్తరించి వినియోగదారులకు అదనపు డిజిటల్ సేవలను అందించేందుకు కూడా రెండు సంస్థలు ప్రణాళికలు సిద్ధం చేస్తున్నాయి.

ఫ్రీ గ‌డువు త‌రువాత‌..

ప్రయాణం చేస్తున్నప్పుడు, వ్యాయామం చేసే సమయంలో, విశ్రాంతి తీసుకుంటున్నప్పుడు లేదా రోజువారీ పనుల మధ్య సంగీతం, పోడ్‌కాస్ట్‌లను అంతరాయం లేకుండా ఆస్వాదించేందుకు ఈ సేవ ఉపయోగపడుతుందని కంపెనీ తెలిపింది. ఈ ఆఫర్‌లో భాగంగా అర్హత కలిగిన వీఐ పోస్ట్‌పెయిడ్ వినియోగదారులు వీఐ యాప్ ద్వారా మూడు నెలల పాటు స్పాటిఫై ప్రీమియంను ఉచితంగా యాక్టివేట్ చేసుకోవచ్చు. అయితే ఈ ప్రయోజనం ఇంతకుముందు స్పాటిఫై ప్రీమియంను ఉపయోగించని వినియోగదారులకు మాత్రమే అందుబాటులో ఉంటుంది. మూడు నెలల ఉచిత కాలం ముగిసిన తర్వాత, వినియోగదారులు వీఐలోని యాడ్ టు బిల్ సదుపాయం ద్వారా నెలకు రూ.139 చెల్లించి స్పాటిఫై ప్రీమియంను కొనసాగించవచ్చు.

ఏయే ప్లాన్ల‌కు అందుబాటులో..

స్పాటిఫై ప్రీమియంతో ప్రకటనలు లేకుండా 100 మిలియన్లకు పైగా పాటలు, 70 లక్షలకు పైగా పోడ్‌కాస్ట్‌లు వినే అవకాశం ఉంటుంది. సంగీతం, పోడ్‌కాస్ట్‌లను ఆఫ్‌లైన్‌లో డౌన్‌లోడ్ చేసుకోవచ్చు. అపరిమితంగా పాటలను స్కిప్ చేయడం, కావాల్సిన పాటను వెంటనే ప్లే చేయడం, ప్లేలిస్ట్ క్యూను నియంత్రించడం వంటి ఫీచర్లు అందుబాటులో ఉంటాయి. అలాగే 320 కేబీపీఎస్ వరకు హైక్వాలిటీ ఆడియో స్ట్రీమింగ్‌ను కూడా పొందవచ్చు. ఈ ప్రయోజనం ఎంపిక చేసిన వీఐ పోస్ట్‌పెయిడ్ ప్లాన్లలో స్థిరమైన బెనిఫిట్‌గా అందుబాటులో ఉంటుంది. వ్యక్తిగత పోస్ట్‌పెయిడ్ ప్లాన్లలో రూ.451, రూ.551, రూ.751, రూ.1201 (రెడ్‌ఎక్స్) ప్లాన్లకు ఈ ఆఫర్ వర్తిస్తుంది. ఫ్యామిలీ పోస్ట్‌పెయిడ్ ప్లాన్లలో రూ.701, రూ.751, రూ.871, రూ.1201, రూ.1301, రూ.1401, రూ.1526, రూ.1601 (రెడ్‌ఎక్స్ ఫ్యామిలీ) ప్లాన్లలో ఈ సదుపాయం లభిస్తుంది. అయితే ఫ్యామిలీ ప్లాన్లలో ఈ ప్రయోజనం ప్రైమరీ మెంబర్‌కు మాత్రమే వర్తిస్తుంది.