TVS Motor | ఇస్తాంబుల్‌లో టీవీఎస్ కాలిస్టో 110.. టర్కీలోకి టీవీఎస్ అడుగు..

TVS Motor | భారతీయ ద్విచక్ర వాహన తయారీ సంస్థ టీవీఎస్ మోటార్ కంపెనీ అంతర్జాతీయ మార్కెట్లో తన విస్తరణను కొనసాగిస్తోంది. ఇందులో భాగంగా టర్కీలోని ఇస్తాంబుల్‌లో టీవీఎస్ కాలిస్టో 110 స్కూటర్‌ను విడుదల చేసింది. స్థానిక సంస్థ ఉగుర్ మోటర్లూ అరచ్లార్‌తో భాగస్వామ్యంతో ఈ స్కూటర్‌ను మార్కెట్లోకి తీసుకొచ్చింది.

టీవీఎస్ మోటార్ కంపెనీ టర్కీ మార్కెట్లోకి అడుగుపెడుతూ తన కొత్త స్కూటర్ టీవీఎస్ కాలిస్టో 110ను ఆవిష్కరించింది. ఇస్తాంబుల్‌లో ఉగుర్ మోటర్లూ అరచ్లార్ సంస్థతో కలిసి ఈ స్కూటర్‌ను విడుదల చేసినట్లు టీవీఎస్ మోటార్ కంపెనీ వెల్లడించింది. ఈ భాగస్వామ్యం ద్వారా టర్కీలో తమ ఉత్పత్తుల విక్రయాలు, మార్కెట్ విస్తరణకు సంస్థ ప్రాధాన్యత ఇవ్వనున్నట్లు తెలుస్తోంది.

టీవీఎస్ కాలిస్టో 110 స్కూటర్‌ను ఆకర్షణీయమైన రెట్రో డిజైన్‌తో అందుబాటులోకి తీసుకొచ్చారు. లేత ఆకుపచ్చ రంగు, బ్రౌన్ సీటు, క్లాసిక్ స్టైలింగ్‌తో ఈ స్కూటర్ ప్రత్యేకంగా కనిపిస్తోంది. టర్కీ మార్కెట్లో ఈ మోడల్‌కు వినియోగదారుల నుంచి ఎలాంటి స్పందన లభిస్తుందో ఆసక్తికరంగా మారింది.