Professor Tejasri Complaint | రాజేంద్రనగర్ పీఎస్ వద్ద తీవ్ర ఉద్రిక్తత: వీసీపై ఫిర్యాదు చేసిన మహిళా ప్రొఫెసర్‌కు పోలీసుల వేధింపులు

• వీసీపై ఫిర్యాదు
• పోలీసుల దురుసు ప్రవర్తన
• హాస్టళ్ల నుంచి విద్యార్థుల అరెస్టు
• ఉన్నతాధికారుల జోక్యానికి డిమాండ్

Professor Tejasri Complaint | త్రినేత్ర న్యూస్ : హైదరాబాద్ రాజేంద్రనగర్‌లోని ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం (PJTSAU)లో వివాదం భగ్గుమంది. వర్సిటీ వైస్ ఛాన్సలర్ (వీసీ) అల్దాస్ జానయ్యపై ఫిర్యాదు చేసేందుకు రాజేంద్రనగర్ పోలీస్ స్టేషన్‌కు వెళ్లిన మహిళా ప్రొఫెసర్ తేజశ్రీ పట్ల పోలీసులు అనుచితంగా ప్రవర్తించారన్న ఆరోపణలతో పోలీస్ స్టేషన్ వద్ద ఒక్కసారిగా ఉద్రిక్త వాతావరణం నెలకొంది.

అక్నాలెడ్జ్‌మెంట్ అడిగితే దురుసు ప్రవర్తన

పోలీస్ స్టేషన్‌లో జరిగిన పరిణామాలపై ప్రొఫెసర్ తేజశ్రీ తీవ్ర ఆవేదన వ్యక్తం చేశారు. వీసీ జానయ్యపై తాను లిఖితపూర్వకంగా ఇచ్చిన ఫిర్యాదును పోలీసులు స్వీకరించినప్పటికీ, దానికి సంబంధించిన రసీదు (అక్నాలెడ్జ్‌మెంట్) ఇవ్వడానికి నిరాకరించారని ఆమె తెలిపారు. చట్టబద్ధంగా ఇవ్వాల్సిన రసీదును ఎందుకు ఇవ్వడం లేదని ప్రశ్నించినందుకు డ్యూటీలో ఉన్న పోలీసులు తనతో అగౌరవంగా, దురుసుగా మాట్లాడారని ఆమె వాపోయారు.

హాస్టళ్లలోకి చొరబడి విద్యార్థుల బలవంతపు అరెస్టులు

మరోవైపు మహిళా ప్రొఫెసర్‌కు అండగా నిలిచిన విద్యార్థులపై పోలీసులు ఉక్కుపాదం మోపుతున్నారనే విమర్శలు వ్యక్తమవుతున్నాయి. క్యాంపస్‌లో శాంతియుతంగా ధర్నా చేపట్టిన విద్యార్థులను రాత్రివేళ హాస్టల్ గదుల్లోకి ప్రవేశించి బలవంతంగా ఈడ్చుకెళ్లి పోలీస్ స్టేషన్‌కు తరలించారని సహచర విద్యార్థులు తీవ్ర ఆగ్రహం వ్యక్తం చేశారు. శాంతియుత నిరసనలపై పోలీసుల దౌర్జన్యం ఏంటని వారు ప్రశ్నిస్తున్నారు.

TASA ప్రతినిధులకు పోలీసుల హెచ్చరికలు

బాధిత ప్రొఫెసర్ తేజశ్రీకి మద్దతు తెలిపేందుకు పోలీస్ స్టేషన్‌కు చేరుకున్న తెలంగాణ అగ్రికల్చరల్ స్టూడెంట్స్ అసోసియేషన్ (TASA) సభ్యులు, విద్యార్థులను పోలీసులు బెదిరించినట్లు ఆరోపణలు వచ్చాయి. అక్కడి నుంచి వెంటనే వెళ్లిపోవాలని, లేదంటే కేసులు నమోదు చేసి జైలుకు పంపుతామని పోలీసులు వార్నింగ్ ఇచ్చినట్లు విద్యార్థి నేతలు ఆరోపించారు.

పోలీసులు వీసీకి కొమ్ముకాస్తున్నారంటూ ఆగ్రహం

బాధితులకు న్యాయం చేయాల్సిన పోలీసులే ఉద్దేశపూర్వకంగా నిందితుడైన వీసీకి అండగా నిలుస్తున్నారని విద్యార్థి సంఘాలు తీవ్రస్థాయిలో మండిపడ్డాయి. మహిళా ప్రొఫెసర్‌తో పాటు విద్యార్థుల పట్ల దురుసుగా ప్రవర్తించిన పోలీసుల వ్యవహారశైలిపై ఉన్నతాధికారులు తక్షణమే జోక్యం చేసుకుని సమగ్ర విచారణ జరపాలని వారు డిమాండ్ చేస్తున్నారు.