NEET UG కి ప్రిపేర్ అయ్యేవారి కోసం జెమిని ఏఐ ప్లాట్‌ఫామ్‌లో ఉచితంగా మాక్ టెస్టులు

NEET UG | టెక్ దిగ్గ‌జ సంస్థ గూగుల్ త‌న ఏఐ ప్లాట్‌ఫామ్ జెమినిని మ‌రింత మంది యూజ‌ర్ల‌కు విస్త‌రించేలా ప్ర‌ణాళిక‌లు రచిస్తోంది. అందులో భాగంగానే అన్ని రంగాల‌కు చెందిన వినియోగ‌దారులకు త‌న ఏఐని ద‌గ్గ‌ర చేసేందుకు భిన్న ర‌కాల ఫీచ‌ర్ల‌ను జెమినిలో అందిస్తోంది. ఇప్పుడు తాజాగా NEET UG ప‌రీక్ష‌కు ప్రిపేర్ అయ్యే విద్యార్థుల‌కు ఉచిత ప్రాక్టీస్ టెస్టుల‌ను ప్రవేశ‌పెట్టిన‌ట్లు ప్ర‌క‌టించింది. జెమినిలో ఇప్ప‌టికే SAT, JEE Main వంటి ప‌రీక్ష‌ల‌కు చెందిన ప్రాక్టీస్ టెస్టులు అందుబాటులో ఉండగా, వాటికి అద‌నంగా ఇప్పుడు ఆయా టెస్టుల‌ను అందుబాటులో ఉంచింది.

వివిధ విద్యాసంస్థ‌ల‌తో భాగ‌స్వామ్యం..

విద్యార్థులకు విశ్వసనీయమైన ప్రిపరేషన్ అనుభవాన్ని అందించేందుకు గూగుల్ ప్రముఖ విద్యా వేదికలైన Physics Wallah, Careers360 లతో భాగస్వామ్యం కుదుర్చుకుంది. ఈ భాగస్వామ్యాల ద్వారా అందిస్తున్న NEET UG ప్రాక్టీస్ టెస్ట్‌లు నాణ్యతా ప్రమాణాలను పరిశీలించి రూపొందించిన కంటెంట్‌పై ఆధారపడి ఉంటాయి. దీంతో విద్యార్థులకు సాధారణ ప్రశ్నల ప్రాక్టీస్ కంటే, అసలు పరీక్ష విధానం, కఠినత స్థాయి ఎలా ఉంటుందో అచ్చంగా అనుభవించే అవకాశాన్ని కల్పిస్తోంది. ఈ విధంగా టెస్ట్ డే అనుభవాన్ని నిజానికి దగ్గరగా అనుకరించేలా రూపొందించారు.

నిజ‌మైన ప‌రీక్ష అనుభ‌వాన్ని పొంద‌వ‌చ్చు..

ఈ కొత్త ఫీచర్ ద్వారా విద్యార్థులు పూర్తి స్థాయి ఉచిత మాక్ పరీక్షలను యాక్సెస్ చేయవచ్చు. పరీక్షలా అనిపించే సిమ్యులేషన్‌ల ద్వారా పరీక్షకు అవసరమైన అనుభ‌వాన్ని పెంపొందించుకోవచ్చు. తమ బలహీన అంశాలను గుర్తించి మెరుగుపరుచుకునే అవకాశం ఉంటుంది. అలాగే పరీక్షకు అనుగుణంగా రూపొందించిన కంటెంట్‌తో తమ సొంత వేగంలో చదువుకోవచ్చు. ఈ ఫీచర్ ప్రస్తుతం జెమిని యాప్‌లో దశలవారీగా అందుబాటులోకి వస్తోంది. ఇంగ్లిష్ భాషలో ప్ర‌స్తుతానికి ఈ ఫీచ‌ర్‌ను అందిస్తున్నారు. విద్యార్థులు I want to take a NEET mock exam అనే ప్రాంప్ట్ ఇవ్వడం ద్వారా ఈ మాక్ టెస్ట్‌ను ప్రారంభించవచ్చు. గూగుల్‌కు చెందిన జెమిని యాప్స్‌తోపాటు వెబ్ వెర్ష‌న్ జెమిని ప్లాట్‌ఫామ్‌లోనూ ఈ కొత్త అప్‌డేట్‌ను ఇస్తున్నారు.