SpaceXAI | స్పేస్‌ఎక్స్‌ఏఐ నుంచి గ్రోక్ బాట్.. ఇక పనులన్నింటినీ ఏఐ ఏజెంట్లే చేస్తాయి..

SpaceXAI | స్పేస్‌ఎక్స్‌ఏఐ గ్రోక్ బాట్‌ను లాంచ్ చేసింది. ఇది ప్రస్తుతం ప్రారంభ బీటా దశలో ఉన్న ఏఐ ఏజెంట్ వ్యవస్థ కాగా యాప్‌లు, టూల్స్‌, వెబ్‌సైట్లు, ఇన్‌బాక్స్‌లలో వివిధ పనులను స్వయంగా నిర్వహించేలా దీన్ని రూపొందించారు. ప్రతి బాట్‌కు క్లౌడ్‌లో ప్రత్యేకమైన కంప్యూటర్ ఉంటుంది. దీంతో వినియోగదారు కంప్యూటర్ లేదా ఫోన్ నుంచి దూరంగా వెళ్లిపోయిన తర్వాత కూడా బాట్ తన పనిని కొనసాగిస్తుంది. వినియోగదారులు ఇప్పటికే ఉపయోగిస్తున్న టూల్స్‌లోకి బాట్లు స్వయంగా సైన్‌ఇన్ చేసి, అప్పగించిన పనులను మొదటి నుంచి చివరి వరకు పూర్తి చేస్తాయి. అయితే ఎక్కడైనా వినియోగదారు అనుమతి లేదా నిర్ణయం అవసరమైనప్పుడు బాట్ తిరిగి వినియోగదారుని సంప్రదిస్తుంది. ఫోన్ లేదా డెస్క్‌టాప్‌ నుంచి బాట్‌కు సందేశం పంపి పనిని అప్పగించవచ్చు. ఆ తర్వాత అదే సంభాషణను కొనసాగించవచ్చు.

సొంత కంప్యూటర్‌తో గ్రోక్ బాట్..

గ్రోక్ బాట్‌ను తొలుత స్పేస్‌ఎక్స్‌ఏఐ అంతర్గత ప్రోటోటైప్‌గా అభివృద్ధి చేసింది. కంపెనీకి చెందిన వివిధ బృందాలు సేల్స్ ఔట్‌బౌండ్, మార్కెటింగ్ ప్రచారాలు, కార్యాలయ నిర్వహణ, బగ్ పరిష్కారాలు తదితర పనుల కోసం బాట్లను రూపొందించాయి. ప్రతి బాట్ క్లౌడ్‌లో తనకంటూ ప్రత్యేకమైన కంప్యూటర్‌తో పనిచేస్తుంది. యాప్‌లు, టూల్స్‌, వెబ్‌సైట్లలోకి సైన్‌ఇన్ చేసి పని చేస్తుంది. క్లియర్ ఏపీఐ లేదా ఎంసీపీ ఇంటిగ్రేషన్ లేని ప్లాట్‌ఫామ్‌లపైనా పనిచేయడం దీని ప్రత్యేకత. వినియోగదారు మధ్యలో పని వదిలేసినా బాట్ తన పనిని కొనసాగిస్తుంది. వినియోగదారు నిరంతరం పర్యవేక్షించాల్సిన అవసరం లేకుండా బహుళ దశలతో కూడిన పనులను కూడా పూర్తి చేస్తుంది.

వివిధ యాప్‌లలో స్వయంగా పనులు..

స్పేస్ ఎక్స్ కంపెనీలోని వివిధ విభాగాలు ఇప్పటికే గ్రోక్ బాట్‌ను ఉపయోగిస్తున్నాయి. సేల్స్ విభాగంలో కాల్ ట్రాన్స్‌క్రిప్ట్‌లలోని వివరాలతో సీఆర్‌ఎం రికార్డులను అప్‌డేట్ చేయడం, ఫాలోఅప్ సందేశాలను రూపొందించడం వంటి పనులను బాట్ నిర్వహిస్తోంది. ఆపరేషన్స్ విభాగంలో కొత్త ఉద్యోగులకు సీటింగ్ ఏర్పాట్లు చేయడం, జీమెయిల్ ద్వారా వచ్చిన ఇన్‌వాయిస్‌లను ప్రాసెస్ చేయడం వంటి పనులను నిర్వహిస్తోంది. ఇంజినీరింగ్ విభాగంలో ఉత్పత్తి యూజర్ ఇంటర్‌ఫేస్‌లోని బగ్‌లను పునరుత్పత్తి చేయడం, టికెట్లు నమోదు చేయడం, సమస్యలను పరిష్కరించే బాట్లకు పనులను అప్పగించడం వంటి పనులు చేస్తోంది. వృద్ధి, మార్కెటింగ్, ఫైనాన్స్, ప్రొడక్ట్, కమ్యూనిటీ విభాగాల్లోనూ తమ బృందాలు గ్రోక్ బాట్‌ను ఉపయోగిస్తున్నట్లు కంపెనీ తెలిపింది.

ఒకేసారి ఎన్నో బాట్లు...

వినియోగదారులు ఒకేసారి అనేక బాట్లను ర‌న్ చేయ‌వ‌చ్చు. ఇన్‌బాక్స్ నిర్వహణ, ఖర్చులు, రిక్రూట్‌మెంట్, బగ్ పరిష్కారాలు, ఆపరేషన్స్ వంటి విభిన్న పనులకు ఒక్కో బాట్‌ను కేటాయించవచ్చు. ఈ బాట్లు పరస్పరం స్వతంత్రంగా సందేశాలు పంపుకోవడంతోపాటు థ్రెడ్‌లలో సమాచారాన్ని పంచుకుంటాయి. ఒకే ఖాతా లేదా ప్రాజెక్టుకు సంబంధించిన పనులు ఒకదానితో ఒకటి కలిసినప్పుడు, వినియోగదారు ఒక చాట్ నుంచి మరో చాట్‌కు సమాచారాన్ని కాపీ చేయాల్సిన అవసరం లేకుండా బాట్లు పరస్పరం సమన్వయం చేసుకుంటాయి. గ్రూప్ చాట్‌లలో కూడా బాట్లను చేర్చవచ్చు. అక్కడ అవి పనులను సమన్వయం చేసుకోవడం, ఒక బాట్ నుంచి మరో బాట్‌కు పనిని అప్పగించడం, బాధ్యతను కేటాయించడం వంటి పనులు చేస్తాయి. అవసరమైనప్పుడు మాత్రమే వినియోగదారుని నిర్ణయం కోసం సంప్రదిస్తాయి.

గ్రోక్ బాట్ ప్రస్తుతం బీటా దశలో ఉంది. విండోస్‌, ఐఓఎస్‌లో సూపర్‌గ్రోక్ హెవీ, కర్సర్ అల్ట్రా, కర్సర్ టీమ్స్ ప్రీమియం సబ్‌స్క్రైబర్లకు అందుబాటులో ఉంది. ఎంటర్‌ప్రైజ్ వినియోగదారులు భవిష్యత్ యాక్సెస్ కోసం వెయిట్‌లిస్ట్‌లో చేరవచ్చు.