Perplexity Computer | పెర్‌ప్లెక్సిటీ ఏఐ కంప్యూట‌ర్ వ‌చ్చేసింది.. ఐఫోన్ ఉంటే చాలు.. ఎక్క‌డి నుంచైనా యాక్సెస్ చేయ‌వ‌చ్చు..

Perplexity Computer | ప్ర‌ముఖ ఆర్టిఫిషియ‌ల్ ఇంటెలిజెన్స్ (AI) ప్లాట్‌ఫామ్ పెర్‌ప్లెక్సిటీ తన పర్సనల్ కంప్యూటర్ ఫీచర్‌ను ఇప్పుడు మాక్ యూజర్లకు అందుబాటులోకి తీసుకొచ్చింది. కొత్త పెర్‌ప్లెక్సిటీ మాక్ యాప్ ద్వారా ఈ సదుపాయం లభిస్తోంది. గతంలో ఇది కేవలం ఎర్లీ యాక్సెస్ యూజర్లు, ప్రీమియం సబ్‌స్క్రైబర్లకే పరిమితమై ఉండగా, ఇప్పుడు యూజ‌ర్లంద‌రికీ విడుదల చేశామ‌ని తెలియ‌జేసింది. ఈ కొత్త ప‌ర్స‌న‌ల్ కంప్యూట‌ర్ ఫీచర్ ద్వారా పెర్‌ప్లెక్సిటీ ఏఐ ఏజెంట్లు యూజర్ మాక్‌లోని లోకల్ ఫైల్స్, నేటివ్ మాక్ యాప్స్, వెబ్, పెర్‌ప్లెక్సిటీ సర్వర్ల మధ్య సమన్వయంతో పనులు నిర్వహిస్తాయి. అంటే పీడీఎఫ్‌లు, స్ప్రెడ్‌షీట్లు, నోట్స్, బ్రౌజర్ ట్యాబ్స్, సీఎస్‌వీ ఫైల్స్ వంటి వివిధ సోర్స్‌ల నుంచి డేటాను తీసుకుని భారీ స్థాయి వర్క్‌ఫ్లోలను ఆటోమేటిక్‌గా నిర్వహించవచ్చని కంపెనీ తెలిపింది.

ఏఐ కంప్యూట‌ర్ ఇప్పుడు మాక్‌లో..

ఈ సిస్టమ్ కామ్ కంప్యూటింగ్ మోడల్ ఆధారంగా పనిచేస్తుంది. యూజర్ నిరంతరం స్క్రీన్ ముందు ఉండాల్సిన అవసరం లేకుండా బ్యాక్‌గ్రౌండ్‌లో దీర్ఘకాలిక పనులు కొనసాగుతాయి. అవసరమైనప్పుడు మాత్రమే నోటిఫికేషన్లు లేదా అప్రూవల్ రిక్వెస్టులు వ‌స్తాయి. ఈ ఫీచర్ ను ముఖ్యంగా మల్టీ-సోర్స్ వర్క్‌ఫ్లోల కోసం రూపొందించారు. ప్రాజెక్ట్ మెటీరియల్స్‌ను ఫోల్డర్లలో ఆర్గనైజ్ చేయడం, రెండు డాక్యుమెంట్ల మధ్య తేడాలను పోల్చి సమ్మ‌రీ తయారు చేయడం, స్ట్రక్చర్డ్ రిపోర్ట్స్ రూపొందించడం, తదుపరి ప్రాజెక్ట్ వర్క్‌ఫ్లోలను సెటప్ చేయడం, లైవ్ డాష్‌బోర్డ్స్ సృష్టించడం వంటి పనులను ఇది నిర్వహిస్తుంద‌ని కంపెనీ వివరించింది. పెర్‌ప్లెక్సిటీ కంప్యూటర్ అనే ప్రధాన మల్టీ-మోడల్ ఏఐ వ్యవస్థను ఈ ఏడాది ప్రారంభంలో పరిచయం చేసింది. అది 19 ఏఐ మోడళ్ల సమన్వయంతో పనిచేస్తూ రీసెర్చ్, కోడింగ్, డేటా అనాలిసిస్, డాక్యుమెంట్ తయారీ వంటి పనులను విభజించి నిర్వహిస్తుంది. ఇప్పుడు పర్సనల్ కంప్యూటర్ రూపంలో అవే సామర్థ్యాలను నేరుగా యూజర్ మాక్ డివైస్‌లోకి తీసుకువచ్చింది.

ఐఫోన్ తోనూ కంట్రోల్ చేయ‌వ‌చ్చు..

ఈ యాప్‌ను పెర్‌ప్లెక్సిటీ ఇప్ప‌టికే అందుబాటులో ఉంచిన కామెట్ (Comet) అనే బ్రౌజర్‌తో అనుసంధానం చేస్తే వెబ్ ఆధారిత టూల్స్‌ను డైరెక్ట్ కనెక్టర్స్ అవసరం లేకుండానే ఆపరేట్ చేయవచ్చు. యూజర్ ఐఫోన్‌లో టాస్క్ ప్రారంభించి, మాక్‌లో దాన్ని కొనసాగించి, అవసరమైన అప్రూవల్స్‌ను ఇతర డివైస్‌ల నుంచి కూడా ఇవ్వవచ్చని కంపెనీ తెలిపింది. యాపిల్ ఎకోసిస్టమ్ కంటిన్యూయిటీని దృష్టిలో పెట్టుకుని ఈ వ్యవస్థను రూపొందించినట్లు వివరించింది. మాక్ మినీ వంటి ఆల్వేస్ ఆన్ డివైస్‌లపై ఈ ఫీచర్ మరింత సమర్థవంతంగా పనిచేస్తుందని పెర్‌ప్లెక్సిటీ పేర్కొంది. నిరంతరం ఏఐ ఏజెంట్లు పనిచేసే సెంట్రల్ హబ్‌లా మాక్ మినీని ఉపయోగించవచ్చని తెలిపింది.

ప‌క‌డ్బందీగా సెక్యూరిటీ..

సెక్యూరిటీ విషయంలో కూడా కంపెనీ ప్రత్యేకంగా దృష్టి పెట్టినట్లు తెలిపింది. ఫైల్స్ సురక్షిత శాండ్‌బాక్స్ వాతావరణంలో ప్రాసెస్ అవుతాయని, యూజర్ అప్రూవల్ లేకుండా కీలక చర్యలు చేపట్టబోమ‌ని పేర్కొంది. యూజర్లు చేసే ప్రతి చర్య ఆడిటబుల్, రివర్సబుల్‌గా ఉంటుందని వెల్లడించింది. కొత్త పెర్‌ప్లెక్సిటీ మాక్‌ యాప్‌లో క్వెరీస్, అటాచ్‌మెంట్స్, డిక్టేషన్ వంటి సాధారణ ఫీచర్లు కూడా ఉన్నాయి. యాప్‌ను ప్రస్తుతం యాప్ స్టోర్ వెలుపల నుంచి డైరెక్ట్‌గా డౌన్‌లోడ్ చేసుకోవాల్సి ఉంటుంది. ప‌ర్స‌న‌ల్ కంప్యూట‌ర్ ఫీచర్ ను ఉపయోగించాలంటే పెర్‌ప్లెక్సిటీ ప్రొ లేదా మ్యాక్స్ సబ్‌స్క్రిప్షన్ అవసరమని సంస్థ‌ తెలిపింది. పాత మాక్ యాప్‌ను వచ్చే కొన్ని వారాల్లో నిలిపివేస్తామని, అందువ‌ల్ల యూజ‌ర్లు కొత్త యాప్‌ను డౌన్‌లోడ్ చేసి ఇన్‌స్టాల్ చేసుకోవాల‌ని పెర్‌ప్లెక్సిటీ సూచించింది.