Google | గూగుల్ స్టోరేజ్‌ను ఇక యూజ‌ర్లు జాగ్ర‌త్త‌గా వాడాల్సిందే.. ఆండ్రాయిడ్ బ్యాకప్‌లకూ అదే లిమిట్..

Google | గూగుల్ ఆండ్రాయిడ్ బ్యాకప్‌లకు సంబంధించిన స్టోరేజ్ విధానంలో కీలక మార్పులు ప్రకటించింది. ఆండ్రాయిడ్ బ్యాకప్ సెట్టింగ్స్ ద్వారా సేవ్ అయ్యే డేటాను కూడా గూగుల్ అకౌంట్‌లో అందుబాటులో ఉన్న స్టోరేజ్‌లోనే లెక్కిస్తారు. దీంతో పాటు యూజర్లకు బ్యాకప్ అయ్యే డేటాపై మరింత నియంత్రణ ఇచ్చే కొత్త బ్యాకప్ కంట్రోల్స్‌ను కూడా కంపెనీ అందుబాటులోకి తీసుకువస్తోంది. ఇప్పటి వరకు గూగుల్ ఫోటోస్ ద్వారా బ్యాకప్ చేసిన ఫోటోలు, వీడియోలు, ఎంఎంఎస్ మీడియాను మాత్రమే గూగుల్ అకౌంట్ స్టోరేజ్‌లో లెక్కించేవారు. అయితే తాజా మార్పులతో ఎస్ఎంఎస్, ఎంఎంఎస్ సందేశాలు, కాల్ హిస్టరీ, డివైస్ సెట్టింగ్స్, యాప్ డేటా, అలాగే ఆండ్రాయిడ్ బ్యాకప్ సెట్టింగ్స్ ద్వారా సేవ్ అయ్యే ఇతర సమాచారం కూడా గూగుల్ అకౌంట్‌లోని స్టోరేజ్ పరిమితిలో భాగమవుతుంది. ఈ మార్పు వల్ల సగటున ప్రతి ఆండ్రాయిడ్ బ్యాకప్ పరిమాణం సుమారు 40 ఎంబీ మేర పెరిగే అవకాశం ఉందని గూగుల్ తెలిపింది.

యూజ‌ర్లు స్వ‌యంగా ఎంచుకోవ‌చ్చు..

యూజర్లకు మరింత నియంత్రణ కల్పించేందుకు గూగుల్ కొత్త బ్యాకప్ టాగుల్స్‌ను అందిస్తోంది. వీటి ద్వారా ఎస్ఎంఎస్, ఎంఎంఎస్ సందేశాలు, కాల్ హిస్టరీ, డివైస్ సెట్టింగ్స్‌ను బ్యాకప్‌లో చేర్చాలా లేదా మినహాయించాలా అనే విష‌యాన్ని యూజర్లు స్వయంగా ఎంపిక చేసుకోవచ్చు. ఇప్పటికే ఆండ్రాయిడ్ బీటా వెర్షన్లలో యాప్‌లకు ప్రత్యేక బ్యాకప్ కంట్రోల్స్‌ను గూగుల్ పరీక్షించింది. ఇప్పుడు వాటితోపాటు ఈ కొత్త ఆప్ష‌న్‌ల‌ను కూడా అందుబాటులోకి తీసుకువచ్చి, ఏ డేటా బ్యాకప్ కావాలో యూజర్లే నిర్ణయించుకునే అవకాశం కల్పిస్తోంది. పిక్సెల్ ఫోన్లలో ఈ కొత్త స‌దుపాయాల‌ను సెట్టింగ్స్ > అకౌంట్స్ అండ్ బ్యాకప్ > గూగుల్ బ్యాకప్ > అదర్ డివైస్ డేటాలో పొంద‌వచ్చు. లేదా సెట్టింగ్స్ యాప్‌లో బ్యాకప్ అని సెర్చ్ చేసినా సంబంధిత ఆప్షన్లు కనిపిస్తాయి. ప్రస్తుతం ప్రతి గూగుల్ అకౌంట్‌కు గూగుల్ డ్రైవ్, జీమెయిల్, గూగుల్ ఫోటోస్ కోసం కలిపి 15 జీబీ ఉచిత స్టోరేజ్ అందుబాటులో ఉంది. అదనపు స్టోరేజ్ అవసరమైతే గూగుల్ వన్ సబ్‌స్క్రిప్షన్ ద్వారా 100 జీబీ నుంచి ప్రారంభమయ్యే ప్లాన్‌లను ఎంచుకోవచ్చు.

మ‌రింత జాగ్ర‌త్త‌గా వాడాల్సిందే..

తాజా మార్పులతో ఆండ్రాయిడ్ బ్యాకప్‌లోని ఎస్ఎంఎస్, ఎంఎంఎస్ సందేశాలు, కాల్ హిస్టరీ, డివైస్ సెట్టింగ్స్, యాప్ డేటా, ఇతర సపోర్ట్ చేసే బ్యాకప్ సమాచారాన్ని కూడా ఈ షేర్డ్ స్టోరేజ్‌లోనే లెక్కిస్తారు. దీంతో గూగుల్ అకౌంట్‌లో అందుబాటులో ఉన్న స్టోరేజ్‌ను యూజర్లు మరింత జాగ్రత్తగా నిర్వహించాల్సిన అవసరం ఉంటుంది. ఈ కొత్త స్టోరేజ్ విధానం మంగ‌ళ‌వారం నుంచి కొత్తగా ఆండ్రాయిడ్ బ్యాకప్ ఉపయోగించే యూజర్లకు దశలవారీగా అమల్లోకి వస్తోంది. ఇప్పటికే ఆండ్రాయిడ్ బ్యాకప్ ఉపయోగిస్తున్న యూజర్లకు రాబోయే నెలల్లో ఈ మార్పు అందుబాటులోకి రానుంది. అలాగే ఎస్ఎంఎస్, ఎంఎంఎస్ సందేశాలు, కాల్ హిస్టరీ, డివైస్ సెట్టింగ్స్‌కు సంబంధించిన కొత్త బ్యాకప్ కంట్రోల్స్ కూడా రాబోయే వారాల్లో దశలవారీగా విడుదల కానున్నాయి.