Google | భూకంప హెచ్చ‌రిక‌లు.. 200కు పైగా దేశాల‌కు సేవ‌ల‌ను విస్తరించిన గూగుల్‌..

Google | గూగుల్ తన ఆండ్రాయిడ్ భూకంప హెచ్చరికల వ్యవస్థను మరిన్ని దేశాలు, ప్రాంతాలకు విస్తరిస్తున్నట్లు ప్రకటించింది. ఇప్పటివరకు 98 దేశాలు, ప్రాంతాల్లో అందుబాటులో ఉన్న ఈ సేవను 200కు పైగా దేశాలు, ప్రాంతాలకు విస్తరించనుంది. కొత్తగా పనామా, గ్వాటెమాలాతోపాటు మరిన్ని ప్రాంతాలకు ఈ సేవ అందుబాటులోకి రానుంది. గూగుల్ 2021లో ప్రారంభించిన ఆండ్రాయిడ్ భూకంప హెచ్చరికల వ్యవస్థ ఇప్పటివరకు మొబైల్ ఆధారిత భూకంప గుర్తింపు నెట్‌వర్క్ ద్వారా ఒక బిలియన్‌కు పైగా హెచ్చరికలను పంపింది. భూమి కంపించడం ప్రారంభమయ్యే ముందే ప్రజలకు ముందస్తు సమాచారం అందించడం ఈ వ్యవస్థ ప్రధాన ఉద్దేశం. దీనివల్ల వినియోగదారులు అప్రమత్తమై సురక్షితంగా ఉండేందుకు అవసరమైన చర్యలు తీసుకునే అవకాశం ఉంటుంది.

హెచ్చ‌రిక‌లు ఎలా వ‌స్తాయి..?

భూకంప హెచ్చరికలు అందుబాటులో ఉన్న ప్రాంతాల్లోని ఆండ్రాయిడ్ వినియోగదారులకు భూమి కంపించే తీవ్రత అంచనాల ఆధారంగా మూడు రకాల హెచ్చరికలు అందుతాయి. స్వల్ప స్థాయి ప్రకంపనలు నమోదయ్యే అవకాశం ఉన్నప్పుడు బీ అవేర్‌ హెచ్చరిక జారీ అవుతుంది. సమీపంలో భూకంపం గుర్తించినట్లు ఈ హెచ్చరిక వినియోగదారులకు తెలియజేస్తుంది. మరింత బలమైన ప్రకంపనలు సంభవించే అవకాశం ఉన్నప్పుడు బీ రెడీ హెచ్చరిక అందుతుంది. ఇది మరింత వివరమైన సమాచారాన్ని అందిస్తూ, అవసరమైన చర్యలు తీసుకునేందుకు సిద్ధంగా ఉండాలని సూచిస్తుంది. మధ్యస్థాయి నుంచి తీవ్ర స్థాయి వరకు ప్రకంపనలు సంభవించే అవకాశం ఉన్నప్పుడు టేక్ యాక్షన్ హెచ్చరిక కనిపిస్తుంది. ఈ హెచ్చరిక పూర్తి స్క్రీన్‌పై ప్రదర్శితమవుతుంది. భూకంప సమయంలో ఎలా సురక్షితంగా ఉండాలనే దానిపై తక్షణ సూచనలను అందిస్తుంది.

బీ రెడీ హెచ్చరికలో మరిన్ని వివరాలు..

గూగుల్ బీ రెడీ హెచ్చరికలో అదనపు సమాచారాన్ని కూడా అందించనుంది. రాబోయే నెలల్లో ఈ హెచ్చరికలో భూకంప ప్రకంపనలు గుర్తించిన ప్రాంతాన్ని సూచించే వ్యాసార్థంతో కూడిన మ్యాప్‌ను జోడించనుంది. అలాగే అంచనా వేసిన భూకంప తీవ్రత, వినియోగదారులు తీసుకోవాల్సిన చర్యలు, భూకంపానికి సంబంధించిన మరింత సమాచారాన్ని తెలుసుకునేందుకు ప్రత్యేక బటన్‌ను అందించనుంది. భూకంపానికి సంబంధించిన కొత్త వివరాలు అందుబాటులోకి వచ్చిన కొద్దీ ఈ సమాచారం కూడా అప్‌డేట్ అవుతుంది. కొత్తగా ఈ సేవకు ఎంపిక చేసిన ప్రాంతాల్లోని వినియోగదారులకు గూగుల్ నేటి నుంచే హెచ్చరికలను దశలవారీగా అందించడం ప్రారంభించనుంది. వచ్చే వారంలోగా ఈ విస్తరణ పూర్తిస్థాయిలో అందుబాటులోకి వస్తుందని సంస్థ అంచనా వేస్తోంది.