Alphabet | గూగుల్‌కు ఏఐ దెబ్బ.. ఒక్కరోజే 511 బిలియన్ డాల‌ర్ల‌ నష్టం..

Alphabet | ఆర్టిఫిషియల్ ఇంటెలిజెన్స్ (ఏఐ) కారణంగా గూగుల్ ప్రధాన ఆదాయ వనరైన సెర్చ్, ప్రకటనల వ్యాపారంపై ఒత్తిడి పెరుగుతోంది. మూడో త్రైమాసిక ఆర్థిక ఫలితాలు అంచనాలను అందుకోకపోవడంతో మాతృసంస్థ ఆల్ఫాబెట్ షేర్లు 13 శాతానికి పైగా పడిపోయాయి. దీంతో ఒక్కరోజులోనే కంపెనీ మార్కెట్ విలువ నుంచి 511 బిలియన్ డాలర్లు ఆవిరయ్యాయి.

511 బిలియ‌న్ డాల‌ర్లు ఆవిరి..

టెక్నాలజీ దిగ్గజం గూగుల్ మాతృసంస్థ ఆల్ఫాబెట్‌కు ఏఐ రూపంలో గట్టి సవాల్ ఎదురవుతోంది. కంపెనీ ప్రకటించిన మూడో త్రైమాసిక ఫలితాలు ఇన్వెస్టర్ల అంచనాలను అందుకోలేకపోవడంతో షేర్లు భారీగా పతనమయ్యాయి. న్యూయార్క్ మార్కెట్లో ఉదయం 9.35 గంటల సమయానికి ఆల్ఫాబెట్ షేరు 13 శాతం పడిపోయి 281.37 డాలర్లకు చేరింది. దీంతో కంపెనీ మార్కెట్ విలువ ఏకంగా 511 బిలియన్ డాలర్లు తగ్గింది. భాగస్వాములకు చెల్లింపులు మినహాయించిన తర్వాత మూడో త్రైమాసిక ఆదాయం 111.2 బిలియన్ డాలర్లుగా నమోదైంది. ఇది విశ్లేషకుల అంచనాల కంటే తక్కువ. మొత్తం ఆదాయంలో దాదాపు సగం వాటా కలిగిన గూగుల్ సెర్చ్, ఇతర ప్రకటనల వ్యాపారం కూడా అంచనాలను అందుకోలేదు. గత ఐదు త్రైమాసికాల్లో ఎన్నడూ లేనంత నెమ్మదిగా ఈ విభాగం వృద్ధి చెందింది.

ఏఐ మోడ్‌తో గూగుల్‌కు క‌ష్టాలు..

గూగుల్ సెర్చ్‌లో ప్రవేశపెట్టిన ఏఐ మోడ్ వినియోగం పెరగడం కూడా ప్రకటనల ఆదాయంపై ప్రభావం చూపిందని కంపెనీ చీఫ్ బిజినెస్ ఆఫీసర్ ఫిలిప్ షిండ్లర్ వెల్లడించారు. సాధారణ సెర్చ్ ప్రకటనలతో పోలిస్తే ఏఐ ఆధారిత ప్రశ్నల ద్వారా వచ్చే ఆదాయం తక్కువగా ఉంటోందని తెలిపారు. అయితే ఏఐ మోడ్‌లోనూ ప్రకటనలను పెంచేందుకు ప్రణాళికలు రూపొందిస్తున్నామని చెప్పారు. మరోవైపు చాట్‌జీపీటీ, క్లాడ్ వంటి ఏఐ సేవలు ప్రజాదరణ పొందుతుండడంతో గూగుల్ సెర్చ్ వ్యాపార భవిష్యత్తుపై ఇన్వెస్టర్లలో ఆందోళన పెరుగుతోంది. సెర్చ్ ప్రకటనల ద్వారా భారీగా ఆదాయం సంపాదించే గూగుల్, ఇప్పుడు ఏఐ పోటీకి అనుగుణంగా తన వ్యాపార నమూనాను మార్చుకోవాల్సిన పరిస్థితి ఏర్పడింది. ముఖ్యంగా ఏఐ మౌలిక సదుపాయాల కోసం కంపెనీ చేస్తున్న భారీ పెట్టుబడులకు తగిన ఆదాయం వస్తుందా అనే ప్రశ్నలు తలెత్తుతున్నాయి.

భారీగా పెరుగుతున్న వ్య‌యం..

ఏఐ డేటా సెంటర్లు, కంప్యూటింగ్ సామర్థ్యం, విద్యుత్ వంటి వనరుల కోసం గూగుల్ భవిష్యత్తులో చేయాల్సిన చెల్లింపులు మూడో త్రైమాసికం చివరికి 924 బిలియన్ డాలర్లకు చేరాయి. ప్రారంభం కాని డేటా సెంటర్ లీజుల వంటి భవిష్యత్తు బాధ్యతలు మరో 152 బిలియన్ డాలర్లుగా నమోదయ్యాయి. దీంతో మొత్తం భవిష్యత్తు ఆర్థిక బాధ్యతలు ఒక ట్రిలియన్ డాలర్లను దాటాయి. ఈ ఏడాది మూలధన వ్యయం 205 బిలియన్ డాలర్ల వరకు ఉంటుంద‌ని ఆల్ఫాబెట్ గత జూలైలో ప్రకటించింది. కంపెనీ వరుసగా రెండో త్రైమాసికంలోనూ నెగెటివ్ ఫ్రీ క్యాష్ ఫ్లో నమోదు చేసింది. మూడో త్రైమాసికంలో ఒక్కో షేరుకు నికర ఆదాయం 2.12 డాలర్లుగా ఉండగా, విశ్లేషకుల అంచనా 2.99 డాలర్లుగా ఉంది. గూగుల్ సర్వీసెస్ ఆదాయం 96.3 బిలియన్ డాలర్లుగా నమోదై, 98.4 బిలియన్ డాలర్ల అంచనాను అందుకోలేదు. యూట్యూబ్ ప్రకటనల ఆదాయం కూడా 11.2 బిలియన్ డాలర్లతో అంచనాల కంటే తక్కువగా నిలిచింది. అంతేకాకుండా స్పేస్‌ఎక్స్‌లో పెట్టుబడుల కారణంగా ప్రధానంగా కంపెనీ ఈక్విటీ పెట్టుబడులపై 8.7 బిలియన్ డాలర్ల నష్టం నమోదైంది.

క్లౌడ్ విభాగం ఆశాజ‌న‌క ఫ‌లితాలు..

అయితే గూగుల్ క్లౌడ్ విభాగం మాత్రం ఆశాజనక ఫలితాలు సాధించింది. ఈ విభాగం 30.7 బిలియన్ డాలర్ల ఆదాయం, 11.1 బిలియన్ డాలర్ల లాభాన్ని నమోదు చేసింది. ఇవి విశ్లేషకుల అంచనాలైన 29.1 బిలియన్ డాలర్ల ఆదాయం, 9.8 బిలియన్ డాలర్ల లాభం కంటే ఎక్కువ. మరోవైపు మైక్రోసాఫ్ట్ క్లౌడ్ వ్యాపారం అంచనాలను మించి వృద్ధి సాధించడంతో ఆల్ఫాబెట్‌పై ఒత్తిడి మరింత పెరిగింది. గూగుల్ ఇటీవల జెమిని 4తోపాటు కార్బన్ పేరుతో మరో కొత్త ఏఐ మోడల్‌ను ప్రకటించింది. వేగం, ఖర్చు తగ్గింపు, విస్తృత వినియోగంపై దృష్టి సారిస్తూ మరిన్ని మోడళ్లను త్వరలో తీసుకొస్తామని సీఈఓ సుందర్ పిచాయ్ తెలిపారు. అయితే ఏఐ సేవలను అభివృద్ధి చేయడంతోపాటు వాటి ద్వారా ప్రకటనల తరహాలో భారీ ఆదాయం సంపాదించడం గూగుల్‌కు కీలక సవాల్‌గా మారింది. ఏఐ పోటీలో నాయకత్వాన్ని నిలబెట్టుకోవాలంటే పెట్టుబడులకు తగిన ప్రతిఫలం చూపించాల్సిన పరిస్థితి ఏర్పడింది.