Whatsapp | వాట్సాప్‌లో కొత్త ఫీచ‌ర్‌.. ఇక ఏఐతో ఇన్‌కాగ్నిటో మోడ్‌లో చాట్ చేయొచ్చు..

Whatsapp | మెటా (Meta) తన ఏఐ అసిస్టెంట్ వినియోగంలో గోప్యతకు మరింత ప్రాధాన్యం ఇస్తూ ఇన్‌కాగ్నిటో చాట్ విత్ మెటా AI అనే కొత్త ఫీచర్‌ను ప్రకటించింది. పూర్తిగా గోప్యమైన సంభాషణలను సులభతరం చేయడమే ఈ ఫీచర్ ప్రధాన లక్ష్యమని కంపెనీ వెల్లడించింది. ఈ వ్యవస్థను మెటా అభివృద్ధి చేసిన ప్రైవేట్ ప్రాసెసింగ్ టెక్నాలజీ ఆధారంగా రూపొందించారు. వినియోగదారుల చాట్ డేటా ఎవరికీ కూడా అందుబాటులో లేకుండా ఉండేలా ప్రత్యేక భద్రతా వ్యవస్థలను ఇందులో అమలు చేసినట్లు సంస్థ పేర్కొంది. మెటా తెలిపిన‌ వివరాల ప్రకారం, ఇన్‌కాగ్నిటో చాట్‌లో జరిగే అన్ని ఏఐ ఇన్‌ఫరెన్స్ ప్రక్రియలు ట్రస్టెడ్ ఎగ్జిక్యూషన్ ఎన్విరాన్‌మెంట్ (TEE)లోనే కొన‌సాగుతాయి. ఈ ఇన్‌ఫ్రాస్ట్రక్చర్ వల్ల మెటాతోపాటు ఇతర థ‌ర్డ్ పార్టీ వ్య‌క్తులు లేదా సంస్థ‌ల‌కు కూడా వినియోగదారుల సంభాషణలు కనిపించకుండా ఉంటాయని కంపెనీ చెబుతోంది. గోప్యతా పరిరక్షణలో ఇది కీలక ముందడుగుగా అభివర్ణించింది.

స‌ర్వ‌ర్‌ల‌లోనూ చాట్స్ స్టోర్ కావు..

ఈ ఫీచర్‌లో ముఖ్యంగా జీరో సర్వర్ లాగ్స్ వ్యవస్థను ప్రవేశపెట్టినట్లు మెటా తెలిపింది. కంపెనీ సర్వర్‌లలో సంభాషణల లాగ్‌లు నిల్వ కాకుండా రూపొందించిన తొలి ప్రధాన ఏఐ ఉత్పత్తి ఇదేనని పేర్కొంది. దీంతో వినియోగదారుల వ్యక్తిగత చాట్ వివరాలు కంపెనీ డేటాబేస్‌లలో నిల్వ అయ్యే అవకాశమే ఉండదని స్పష్టం చేసింది. ఇన్‌కాగ్నిటో చాట్‌లో అదృశ్యమయ్యే సందేశాల‌ ఫీచర్ కూడా డిఫాల్ట్‌గా అమల్లో ఉంటుంది. తాత్కాలిక సంభాషణలు ఆటోమేటిక్‌గా సేవ్ కాకుండా ఉండటమే కాకుండా, వినియోగదారు సెషన్ ముగిసిన వెంటనే అన్ని సందేశాలు పరికరం నుంచి పూర్తిగా తొలగిపోతాయని మెటా తెలిపింది. దీని ద్వారా సున్నితమైన విషయాలపై మరింత నమ్మకంగా చర్చించుకునే అవకాశం లభిస్తుందని సంస్థ భావిస్తోంది.

ఇత‌ర ఏఐ మోడ్‌ల‌కు భిన్నంగా..

అలాగే, ఈ ఫీచర్ గోప్యతా స్థాయిని ఇప్పటికే అమల్లో ఉన్న ఎండ్-టు-ఎండ్ ఎన్‌క్రిప్షన్ ప్రోటోకాల్స్‌తో సమానంగా రూపొందించినట్లు కంపెనీ వెల్లడించింది. అంటే సంభాషణల డేటా పరిశీలకులకు మాత్రమే కాకుండా, ప్లాట్‌ఫామ్ హోస్ట్‌కూ కనిపించదని మెటా స్పష్టం చేసింది. ప్రస్తుతం మార్కెట్లో ఉన్న ఇతర అజ్ఞాత-శైలి ఏఐ మోడ్‌లతో పోలిస్తే తమ వ్యవస్థ భిన్నమని మెటా పేర్కొంది. ఇతర అప్లికేషన్‌లు యూజర్ ఇంటర్‌ఫేస్ నుంచి సంభాషణలను దాచిపెట్టినా, ప్రశ్నలు, సమాధానాలను తమ సర్వర్‌లలో నెలల తరబడి నిల్వ ఉంచుతున్నాయని కంపెనీ విమర్శించింది. అయితే మెటా ఇన్‌కాగ్నిటో చాట్‌లో అలాంటి డేటా నిల్వ ఉండదని సంస్థ హామీ ఇచ్చింది. ఈ ఫీచర్‌ను రాబోయే నెలల్లో వాట్సాప్‌, ప్రత్యేక మెటా ఏఐ యాప్‌లలో అందుబాటులోకి తీసుకురానున్నట్లు వెల్లడించింది. వినియోగదారుల నుంచి వచ్చే ఫీడ్‌బ్యాక్ ఆధారంగా దీనిని మరింత విస్తరించే అవకాశాలు కూడా ఉన్నాయని తెలిపింది.

త్వ‌ర‌లో సైడ్ చాట్ విత్ మెటా ఏఐ..

ఇక, ఇన్‌కాగ్నిటో మోడ్‌తోపాటు మెటా తన ప్రైవేట్ ప్రాసెసింగ్ టెక్నాలజీని ఇతర చాట్ ఫీచర్లకు కూడా విస్తరించేందుకు సిద్ధమవుతోంది. త్వరలో సైడ్ చాట్ విత్ మెటా AI అనే కొత్త సదుపాయాన్ని ప్రవేశపెట్టనున్నట్లు ప్రకటించింది. ప్రధాన సంభాషణకు అంతరాయం కలగకుండా, వినియోగదారులకు గోప్యంగా సందర్భానుసార ఏఐ సహాయం అందించేలా ఈ ఫీచర్ ను రూపొందిస్తున్నామ‌ని సంస్థ తెలిపింది. ఈ ప్రాజెక్ట్ వెనుక పనిచేస్తున్న MSL డెవలప్‌మెంట్ ల్యాబ్ తెలిపిన ప్రకారం, అధునాతన ఏఐ సాధనాలను ఉపయోగించే సమయంలో వినియోగదారులు సున్నితమైన అంశాలపై సుర‌క్షితంగా చర్చించుకునేందుకు ఈ అప్‌డేట్‌ ఒక కీలక ముందడుగు అవుతుందని పేర్కొంది.