Instagram | ఇన్‌స్టాగ్రామ్ ప్లస్ వచ్చేసింది.. కొత్త ప్రీమియం ఫీచర్లతో యూజర్లకు అదిరే అనుభవం..

Instagram | ఇన్‌స్టాగ్రామ్‌పై గత కొన్ని నెలలుగా వినిపిస్తున్న ఊహాగానాలకు తెరదించుతూ సంస్థ అధికారికంగా ఇన్‌స్టాగ్రామ్ ప్లస్ అనే కొత్త ఐచ్ఛిక సబ్‌స్క్రిప్షన్ ప్లాన్‌ను ప్రపంచవ్యాప్తంగా ప్రారంభించింది. మరింత వ్యక్తిగతీకరణ, లోతైన అనలిటిక్స్, అధునాతన షేరింగ్ నియంత్రణలను కోరుకునే యూజర్ల కోసం ఈ కొత్త ప్రీమియం ప్లాన్‌ను తీసుకొచ్చింది. అయితే ఇన్‌స్టాగ్రామ్ సాధారణ అనుభవం పూర్తిగా ఉచితంగానే కొనసాగుతుందని కంపెనీ స్పష్టం చేసింది. ఇది యాప్ వినియోగ విధానంలో పెద్ద మార్పు కాదని, అదనపు ఫీచర్లను కోరుకునే వారికి మాత్రమే అందుబాటులో ఉండే ప్రీమియం అప్‌గ్రేడ్ అని పేర్కొంది. కొత్త సబ్‌స్క్రిప్షన్‌ను మూడు ప్రధాన విభాగాలుగా విభజించారు. అవి సోషల్ కనెక్టివిటీ, ఇన్‌సైట్స్, ప్రివ్యూలు, అలాగే ప్రొఫైల్ కస్టమైజేషన్.

కంటెంట్‌పై మ‌రింత నియంత్ర‌ణ‌..

ఇన్‌స్టాగ్రామ్ ప్లస్ ద్వారా యూజర్లు తమ కంటెంట్‌ను ఎవరు చూడాలి, అది ఎలా ప్రాధాన్యత పొందాలి అనే అంశాలపై మరింత నియంత్రణ పొందవ‌చ్చు. యూజర్ల స్టోరీలు వారి స్నేహితుల స్టోరీ ఫీడ్‌లో ముందువరుసలో కనిపించేలా ప్రాధాన్యత ఇస్తుంది. ప్రస్తుతం ఉన్న క్లోజ్ ఫ్రెండ్స్ ఫీచర్‌కు విస్తరణగా, అపరిమిత కస్టమ్ ఆడియెన్స్ జాబితాలను సృష్టించుకునే అవకాశం కల్పిస్తుంది. దీంతో వివిధ గ్రూపులకు వేర్వేరుగా స్టోరీలను షేర్ చేయవచ్చు. సాధారణంగా 24 గంటలు మాత్రమే కనిపించే స్టోరీలు ఇప్పుడు 48 గంటల వరకు అందుబాటులో ఉంటాయి. స్నేహితుల స్టోరీలను చూస్తున్నప్పుడు రంగురంగుల యానిమేటెడ్ హార్ట్ రియాక్షన్లు స్క్రీన్‌పై ప్రత్యేకంగా కనిపిస్తాయి. ఎంగేజ్‌మెంట్ మెట్రిక్స్‌ను విశ్లేషించాలనుకునే లేదా గోప్యతకు ప్రాధాన్యత ఇచ్చే యూజర్ల కోసం ప్రత్యేక టూల్స్‌ను అందిస్తున్నారు. యూజర్ల స్టోరీలను వీక్షకులు ఎన్ని సార్లు మళ్లీ చూశారనే వివరాలను చూపిస్తుంది.

యాప్ ఐకాన్‌ను మార్చుకోవ‌చ్చు..

స్టోరీ వ్యూవర్ జాబితాలో సెర్చ్ ఆప్షన్‌ను జోడించింది. దీంతో నిర్దిష్ట ఖాతాలు స్టోరీని చూశాయా లేదా అనే విషయాన్ని త్వరగా తెలుసుకోవచ్చు. వ్యూ రిసీట్ నమోదు కాకుండా, ఎలాంటి ఇంటరాక్షన్ ఒత్తిడి లేకుండా స్టోరీలను ముందుగానే ప్రివ్యూ చేసే అవకాశం కల్పిస్తుంది. ఇన్‌స్టాగ్రామ్ ప్లస్‌లో మరో ప్రధాన ఆకర్షణ ప్రొఫైల్ వ్యక్తిగతీకరణ, పోస్టింగ్ నిర్వహణ. ఇన్‌స్టాగ్రామ్, స్వతంత్ర క్రియేటర్లు రూపొందించిన ప్రత్యేక ఐకాన్లలో నుంచి ఎంపిక చేసుకుని హోమ్ స్క్రీన్‌లో యాప్ ఐకాన్‌ను మార్చుకోవచ్చు. ప్రొఫైల్ బయోలో ప్రత్యేక ఫాంట్లను ఉపయోగించే అవకాశం ఉంటుంది. ప్రస్తుతం మూడు పోస్టులను మాత్రమే పిన్ చేయగలిగే అవకాశం ఉండగా, ఇప్పుడు ఆ సంఖ్యను ఆరు పోస్టులకు పెంచారు. కొత్త కంటెంట్‌ను ఫాలోవర్ల ప్రధాన ఫీడ్‌లో చూపించకుండా నేరుగా ప్రొఫైల్ గ్రిడ్ లేదా హైలైట్స్‌లో ప్రచురించవచ్చు.

చార్జిలు ఎంతంటే..

ఇన్‌స్టాగ్రామ్ ప్లస్ గ్లోబల్ రోల్‌అవుట్ ఈరోజు నుంచే ప్రారంభమైంది. ప్రస్తుతం అందిస్తున్న ఫీచర్లు ఈ సబ్‌స్క్రిప్షన్‌కు ప్రారంభ దశ మాత్రమేనని, రాబోయే నెలల్లో మరిన్ని ప్రీమియం టూల్స్, సామర్థ్యాలను అందించనున్నట్లు కంపెనీ వెల్లడించింది. ఇన్‌స్టాగ్రామ్ ప్లస్ ధర నెలకు 3.99 అమెరికన్ డాలర్లు. అయితే ప్రాంతాన్ని బట్టి ధరల్లో మార్పులు ఉంటాయి. స్థానిక ధర వివరాలను యాప్‌లోని సెట్టింగ్స్ మెనూ ద్వారా తెలుసుకోవచ్చు.